នាយករដ្ឋមន្រ្តីឥណ្ឌាទៅទស្សនកិច្ចក្នុងប្រទេសជប៉ុនដើម្បីពង្រឹងវិស័យសេដ្ឋកិច្ច
លោកនាយករដ្ឋមន្រ្តីឥណ្ឌាណារ៉េនដ្រា ម៉ូឌីផ្តើមទស្សនកិច្ចផ្លូវការក្នុងប្រទេសជប៉ុននៅថ្ងៃសៅរ៍ ទី៣០ សីហានេះ។ នៅក្នុងដំណើរទស្សនកិច្ចនោះ លោកប្រមុខរដ្ឋាភិបាលឥណ្ឌាម៉ូឌីអាចនឹងឆ្លៀតឱកាសដែលលោកកំពុងមានទំនាក់ទំនងល្អជាមួយលោកនាយករដ្ឋមន្រ្តីជប៉ុនស៊ីនហ្សូ អាបេដើម្បីពង្រឹងបន្ថែមលើវិស័យដោះដូរពាណិជ្ជកម្មរវាងប្រទេសមហាអំណាចសេដ្ឋកិច្ចលំដាប់ទី២ និងទី៣នៅក្នុងទ្វីបអាស៊ី។ ទន្ទឹមគ្នានេះ ការរឹតចំណងមិត្តភាពរវាងឥណ្ឌា និងជប៉ុនក៏ដើម្បីប្រឆំាងទប់នឹងកំណើនឥទ្ធិពលរបស់ប្រទេសចិននៅក្នុងតំបន់ដែរ។
ចុះផ្សាយនៅថ្ងៃ៖
ស្តាប់ - ០២:០០
អ្វីជាការកត់សម្គាល់ដំបូងនោះគឺថា លោកនាយករដ្ឋមន្រ្តីឥណ្ឌាណារ៉េនដ្រា ម៉ូឌី និងលោកនាយករដ្ឋមន្រ្តីជប៉ុនស៊ីនហ្សូ អាបេជាឥស្សរជននយោបាយដែលចេញពីគណបក្សជាតិនិយមដូចគ្នា និងដែលបានសន្យាផ្តល់សន្ទុះសេដ្ឋកិច្ចរបស់ប្រទេសឡើងវិញ។ ទន្ទឹមគ្នានេះ មេដឹកនំាអាស៊ីទំាងពីររូបក៏ធ្លាប់បានប្រកាសពីការពង្រឹងសម្ព័ន្ធភាពរវាងគ្នានៅក្នុងតំបន់ដើម្បីប្រឈមទប់នឹងមហិច្ឆិតារបស់ប្រទេសចិនដែរ។ ចិនដែលកំពុងមានជម្លោះដែនដីដាច់ដោយឡែកពីគ្នាជាមួយឥណ្ឌា និងជប៉ុន។ អាមេរិកដែលជាសម្ព័ន្ធមិត្តរបស់ជប៉ុន និងដែលកំពុងបារម្ភពីឥទ្ធិពលរបស់ចិននៅក្នុងតំបន់នោះ បានលួចញញឹមពីក្រោយចំពោះភាពស្និទ្ធស្នាលរវាងជប៉ុន និងឥណ្ឌាពេលនេះ។
តំាងពីបានជាប់ឆ្នោតជានាយករដ្ឋមន្រ្តីឥណ្ឌាកាលពី ៣ខែមុនមក នេះជាលើកទី១ បង្អស់ដែលលោកម៉ូឌីចេញទៅបំពេញទស្សនកិច្ចនៅក្រៅតំបន់អាស៊ីខាងត្បូង។ តែមុននឹងទទួលជួបដោយលោកនាយករដ្ឋមន្រ្តីជប៉ុនអាបេជាផ្លូវការក្នុងទីក្រុងតូក្យូ លោកម៉ូឌីត្រូវចូលជួបលោកអាបេជាលក្ខណៈឯកជនសិន។ កម្មវត្ថុនៃដំណើរទស្សនកិច្ចរបស់លោកម៉ូឌីក្នុងប្រទេសជប៉ុននឹងជួយផ្តល់សន្ទុះដល់ការនំាផលិតផលឥណ្ឌាទៅកាន់ប្រទេសជប៉ុន ព្រមទំាងទទួលបានការគំាទ្រពីប្រទេសជប៉ុនវិញនៅក្នុងផ្នែកអភិវឌ្ឍន៍ហេដ្ឋារចនាសម្ព័ន្ធនៅក្នុងប្រទេសឥណ្ឌា។ អ្វីដែលឥណ្ឌាត្រូវការពីជប៉ុននោះ គឺការវិនិយោគរបស់ក្រុមហ៊ុនជប៉ុននៅក្នុងវិស័យសាងសង់ផ្លូវដែក និងវិស័យការពារ។ បន្ទាប់មក ភាគីទំាងពីរអាចនឹងផ្តើមជជែកគ្នាឡើងវិញអំពីបញ្ហានុយក្លេអ៊ែរដែលបានអាក់ខាន តំាងពីក្រោយគ្រោះថ្នាក់នៅមជ្ឈមណ្ឌលនុយក្លេអ៊ែរ Fukushima ក្នុងប្រទេសជប៉ុនកាលពីឆ្នំា ២០១១។ គួរជម្រាបជូនថា ឥណ្ឌាដែលកំពុងប្រឈមមុខនឹងបញ្ហាប្រព័ន្ធអគ្គិសនីនោះ បាន និងកំពុងស្វែងរកប្រភពថាមពលផ្សេង ពិសេសថាមពលបានមកពីនុយក្លេអ៊ែរ។
សូមបញ្ជាក់ថា ជប៉ុន និងឥណ្ឌាបានចុះហត្ថលេខាលើកតិកសញ្ញាដោះដូរសេរីរវាងគ្នាក្នុងឆ្នំា ២០១១។ ជប៉ុន គឺជាអ្នកធ្វើវិនិយោគលំដាប់ទី៤ នៅក្នុងប្រទេសឥណ្ឌា ពិសេសផ្នែកសាងសង់រថភ្លើងក្រោមដីក្នុងទីក្រុងញូដែលី ព្រមទំាងមានរោងចក្រផលិតរថយន្តជប៉ុនជាច្រើននៅឥណ្ឌា៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ