បារំាង និងអារ៉ាប៊ីសាអូឌីតជជែកពីស្ថានការណ៍ក្នុងតំបន់ និងកិច្ចសហប្រតិបត្តិការទ្វេភាគី
ចុះផ្សាយនៅថ្ងៃ៖
ស្តាប់ - ០៥:២៨
នៅថ្ងៃអាទិត្យ ទី២៩ ធ្នូនេះ លោកប្រធានាធិបតីបារំាងហ្រ្វង់ស្វ័រ ហូរឡង់អញ្ជើញទៅបំពេញទស្សនកិច្ចក្នុងប្រទេសអារ៉ាប៊ីសាអូឌីតរយៈពេល ២៤ម៉ោង។ នេះជាដំណើរទស្សនកិច្ចលើកទី២ របស់លោកហូរឡង់ទៅកាន់ព្រះរាជាណាចក្រអារ៉ាប៊ីសាអូឌីត បន្ទាប់ពីទស្សនកិច្ចលើកទី១ របស់លោកហូរឡង់កាលពីខែវិច្ឆិកា ឆ្នំា ២០១២ កន្លងទៅ។ ក៏ដូចនៅក្នុងទស្សនកិច្ចលើកទី១ ដែរ ទស្សនកិច្ចលើកទី២នេះមានគោលដៅពង្រឹងបន្ថែមនូវកិច្ចសហប្រតិបត្តិការលើគ្រប់វិស័យរវាងទីក្រុងប៉ារីស និងទីក្រុងរីយ៉ាដ ពិសេសនៅក្នុងវិស័យសេដ្ឋកិច្ច។ ក្រៅពីនោះ ថ្នាក់ដឹកនំានៃប្រទេសទំាងពីរក៏បានលើកយកទៅនិយាយនូវសំណុំរឿងអន្តរជាតិសំខាន់ៗមួយចំនួនទៀតនៅក្នុងតំបន់។
សំណុំរឿងអន្តរជាតិក្តៅគគុក និងដែលភាគច្រើនកំពុងបន្តជាបច្ចុប្បន្នភាពរហូតមកដល់សព្វថ្ងៃ មានដូចជា វិបត្តិនយោបាយនៅក្នុងប្រទេសស៊ីរី នៅក្នុងប្រទេសអេហ្ស៊ីប វិបត្តិនុយក្លេអ៊ែររបស់ប្រទេសអ៊ីរ៉ង់ ឬមួយក៏អស្ថិរភាពនយោបាយនៅក្នុងលីបង់។ នៅក្នុងចំណោមសំណុំរឿងទំាងនេះ មានភាគច្រើនត្រូវបានបារំាង និងអារ៉ាប៊ីសាអូឌីតសម្តែងក្តីព្រួយបារម្ភ និងមានជំហរដោះស្រាយដូចគ្នា។ គឺកាយវិការស្របគ្នានេះហើយដែលបានធ្វើឲ្យទំនាក់ទំនងរវាងទីក្រុងប៉ារីស និងរីយ៉ាដដែលល្អស្រាប់តំាងពីជំនាន់លោកប្រធានាធិបតីបារំាងនីកូឡា សាកូហ្ស៊ីនោះ រឹតតែប្រសើរបន្ថែមទៀត។
ជាក់ស្តែងវិបត្តិនយោបាយនៅក្នុងប្រទេសស៊ីរី បារំាង និងអារ៉ាប៊ីសាអូឌីតបានចេញមុខគំាទ្រក្រុមប្រឆំាងនឹងលោកប្រធានាធិបតីស៊ីរីអាសាដដូចគ្នា និងបានឯកភាពគ្នាថា ដំណោះស្រាយនយោបាយឲ្យប្រទេសស៊ីរីនឹងត្រូវធ្វើឡើងដោយគ្មានវត្តមានលោកអាសាដទេ។ ទន្ទឹមគ្នានេះ ទីក្រុងរីយ៉ាដក៏បានសាទរចំពោះឆន្ទៈរបស់ទីក្រុងប៉ារីសដែលបានព្រមានវាយប្រហារស៊ីរីពីទង្វើប្រើអាវុធគីមីសម្លាប់ជនស៊ីវិល។ នៅក្នុងសំណុំរឿងនុយក្លេអ៊ែរអ៊ីរ៉ង់ ទីក្រុងរីយ៉ាដបានសម្តែងការសាទរចំពោះជំហរម៉ឺងម៉ាត់របស់លោកហ្រ្វង់ស្វ័រ ហូរឡង់ដែលថា អ៊ីរង់ត្រូវតែអនុវត្តភ្លាមៗនូវកិច្ចព្រមព្រៀងដែលខ្លួនទើបបានចុះហត្ថលេខាកាលពីខែវិច្ឆិកា និងបង្ហាញភស្តុតាងពិតៗដើម្បីធានាថា ខ្លួនគ្មានបំណងចង់បំពាក់អាវុធនុយក្លេអ៊ែរដូចដែលបស្ចិមលោកកំពុងសង្ស័យទេ។
ដោយឡែក នៅក្នុងវិបត្តិនយោបាយនៅអេហ្ស៊ីបឯណោះវិញ បារំាង និងអារ៉ាប៊ីសាអូឌីតហាក់ដូចជាមិនសូវយល់ស្របគ្នាប៉ុន្មានទេ។ អារ៉ាបីសាអូឌីតបានចេញមុខគំាទ្រគ្មានលក្ខខណ្ឌចំពោះក្រុមកងទ័ពដែលកំពុងប្រឈមមុខនឹងក្រុមភាតរអ៊ីស្លាមរបស់លោកប្រធានាធិបតីធ្លាក់ពីអំណាចម័រស៊ី។ តែបារំាងវិញ បានព្យាយាមដើរផ្លូវកណ្តាល ដោយបានអំពាវនាវឲ្យគ្រប់ភាគីជម្លោះចូលរួមស្វែងរកដំណោះស្រាយដោយសន្តិវិធី។
បារំាងឆក់ឱកាសដែលអាមេរិក និងអារ៉ាប៊ីសាអូឌីតកំពុងតឹងសរសៃ ក ដាក់គ្នា
នរណាក៏ដឹងដែរថា អាមេររិក និងអារ៉ាប៊ីសាអូឌីត ជាសម្ព័ន្ធមិត្តចាក់ទឹកមិនលេចរវាងគ្នា អាមេរិកមានមូលដ្ឋានទ័ពនៅក្នុងទឹកដីអារ៉ាប៊ីសាអូឌីតដែលបានធានាភាពកក់ក្តៅខ្លំាងណាស់ចំពោះទីក្រុងរីយ៉ាដ ប្រឈមមុខនឹងប្រទេសសត្រូវជិតខាងមួយចំនួនក្នុងតំបន់ ដូចយ៉ាងអ៊ីរ៉ង់ជាដើម។ តែបញ្ហានៅត្រង់ថា ការផ្លាស់ប្តូរជំហរ និងជំហរទន់ជ្រាយ មិនម៉ឺងម៉ាត់របស់ទីក្រុងវ៉ាស៊ីនតោនចំពោះសំណុំរឿងស៊ីរី ឬមួយក៏អ៊ីរ៉ង់នារយៈពេលចុងក្រោយនេះ បានធ្វើឲ្យទីក្រុងរីយ៉ាដមានការខកចិត្តខ្លំាងណាស់។ ជាក់ស្តែងនៅក្នុងវិបត្តិស៊ីរី នៅទីបំផុត លោកប្រធានាធិបតីអាមេរិកអូបាម៉ាបែរជាសម្រេចមិនប្រើកម្លំាងយោធាវាយប្រហារលើរបបរបស់លោកប្រធានាធិបតីស៊ីរីអាសាដទៅវិញ។ នៅក្នុងសំណុំរឿងអ៊ីរ៉ង់ដែលអាមេរិកធ្លាប់បានប្រកាន់ជំហរម៉ឺងម៉ាត់តំាងពីដើមមកនោះ ក៏ស្រាប់តែអាមេរិកធូររលុងខ្សុយ ដោយយល់ព្រមចុះហត្ថលេខាជាមួយអ៊ីរ៉ង់។
គឺកាយវិការចុងក្រោយរបស់ទីក្រុងវ៉ាស៊ីនតោនទំាងអស់នេះហើយដែលបានធ្វើឲ្យទីក្រុងរីយ៉ាដចោទជាសំណួរថា តើឲ្យខ្លួនអាចបន្តទុកចិត្ត និងពឹងពាក់លើអាមេរិកម្តេចនឹងកើតទៀត?។ តែនេះមិនមែនមានន័យថា អារ៉ាប៊ីសាអូឌីតរត់ចោលអាមេរិក ទៅឱបបារំាងទំាងស្រុងនោះទេ គ្រាន់តែថា មានពីរនាក់ពឹង វាគ្រាន់បើជាងមានម្នាក់។ ត្រង់ចំណុចនេះ បារំាងក៏បានយល់ច្បាស់ណាស់ តែសម្រាប់ទីក្រុងប៉ារីស នេះពិតជាឱកាសមួយដ៏ប្រសើរដែលខ្លួនមិនអាចមើលរំលងទេ ពិសេស គឺទាញយកប្រយោជន៍សេដ្ឋកិច្ចបន្ថែមពីអារ៉ាប៊ីសាអូឌីត។
លោកហ្រ្វង់ស្វ័រ ហូរឡង់៖ អារ៉ាប៊ីសាអូឌីតជាអតិថិជនទីមួយរបស់បារំាង
ជារៀងរាល់ឆ្នំា ការដោះដូរពាណិជ្ជកម្មរវាងទីក្រុងប៉ារីស និងរីយ៉ាដមានការកើនឡើងជាលំដាប់។ ជាក់ស្តែងក្នុងឆ្នំា ២០១៣ នេះ ទឹកប្រាក់នៃការដោះដូររវាងប្រទេសទំាងពីរបានកើនជាង ៨ ០០០លានអឺរ៉ូ ក្នុងនោះការនំាចេញពីបារំាងមានទឹកប្រាក់ប្រមាណជា ៣ ០០០លានអឺរ៉ូ។ កំណើននៃការដោះដូរត្រូវបានគេសម្គាល់ឃើញតាមរយៈកិច្ចសន្យាជាមួយក្រុមហ៊ុនបារំាងធំៗ ដូចយ៉ាងការសាងសង់ប្រព័ន្ធផ្លូវរថភ្លើងក្រោមដីក្នុងទីក្រុងរីយ៉ាដដោយក្រុមហ៊ុន Alstom ការផ្គត់ផ្គង់បរិក្ខារឲ្យឆ្មំាជាតិអារ៉ាប៊ីសាអូឌីត និងជួសជុលនាវាចម្បំាងដោយក្រុមហ៊ុនបារំាង DCNS Thales និង MBDA។
ក្រៅពីកិច្ចសន្យាដែលបារំាងមានស្រាប់ជាមួយអារ៉ាប៊ីសាអូឌីត ទីក្រុងប៉ារីសក៏កំពុងសម្លឹងឃើញនូវកិច្ចសន្យាជាច្រើនទៀតដែលទីក្រុងរីយ៉ាដកំពុងសិក្សាដើម្បីរៀបចំប្រព័ន្ធហេដ្ឋារចនាសម្ព័ន្ធរបស់ខ្លួនឡើងវិញ ពិសេសគម្រោងធ្វើឲ្យទំនើបនូវប្រព័ន្ធយោធាក្នុងផ្នែកជើងទឹក និងប្រព័ន្ធការពារផ្លូវអាកាស។ ទន្ទឹមគ្នានេះ បារំាងក៏ចង់ទទួលបានកិច្ចសន្យាពីអារ៉ាប៊ីសាអូឌីតក្នុងវិស័យនុយក្លេអ៊ែរ និងវិស័យអាកាសចរណ៍ដែរ ពិសេសលក់យន្តហោះ Airbus ទៅឲ្យក្រុមហ៊ុនអាកាសចរណ៍ Saoudia។ ទំាងនេះមិនភ្លេចទេ អំពាវនាវឲ្យក្រុមអ្នកវិនិយោគអារ៉ាបីសាអូឌីតចូលមកបោះទុនរកស៊ីក្នុងប្រទេសបារំាង។
ដូច្នេះឃើញថា បារំាងបាន និងកំពុងឆក់យកឱកាសនៃការរំកិលរកគ្នាខាងផ្នែកការទូតជាមួយអារ៉ាប៊ីសាអូឌីត ដើម្បីរឹតចំណង និងពង្រីកបន្ថែមនូវទំនាក់ទំនងសេដ្ឋកិច្ច៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ