Delicious
Digg
Facebook
Twitter
Yahoo!
Technorati
បារំាង-ហ្វីលីពីន -
អត្ថបទចុះផ្សាយនៅថ្ងៃ សៅរ៍ 20 តុលា 2012 -
ព័ត៌មានទើបកែប្រើលើកចុងក្រោយ ថ្ងៃ សៅរ៍ 20 តុលា 2012
ទស្សនកិច្ចរបស់លោកនាយករដ្ឋមន្រ្តីបារំាងនៅទ្វីបអាស៊ីក្នុងគោលដៅសេដ្ឋកិច្ច
លោកប្រធានាធិបតីហ្វីល្លីពីន Benigno Aquino (រូបឆ្វេង) និងលោកនាយករដ្ឋមន្រ្តីបារំាង Jean-Marc Ayrault
REUTERS/Cheryl Ravelo
លោកនាយករដ្ឋមន្រ្តីបារំាង Jean-Marc Ayrault បានផ្តើមទស្សនកិច្ចមួយជុំទ្វីបអាស៊ីអាគ្នេយ៍។ បន្ទាប់ពីប្រទេសសិង្ហបុរី លោក Jean-Marc Ayrault កំពុងបំពេញទស្សនកិច្ចនៅក្នុងប្រទេសហ្វីល្លីពីននៅថ្ងៃសៅរ៍ ទី២០ តុលានេះ។ លោកប្រមុខរដ្ឋាភិបាលបារំាងបានធ្វើដំណើរជាមួយប្រធានក្រុមហ៊ុន និងប្រធានរោងចក្រសហគ្រាសបារំាងជាច្រើនរូប។ គោលដៅសំខាន់នៃទស្សនកិច្ចបានផ្តោតសំខាន់លើវិស័យសេដ្ឋកិច្ចដោយសង្ឃឹមថា នឹងមានការចុះហត្ថលេខាលើកិច្ចកិច្ចសន្យាជាច្រើន។
នៅតាមផ្លូវចូលវិមានប្រធានាធិបតីហ្វីល្លីពីនក្នុងទីក្រុងម៉ានីល លោកនាយករដ្ឋមន្រ្តីបារំាង Jean-Marc Ayrault ត្រូវបានទទួលស្វាគមន៍យ៉ាងរាក់ទាក់ និងប្រកបដោយកិត្តិយសខ្ពង់ខ្ពស់។ បន្ទាប់ពីបានដើរឆ្លងកាត់ពិធីត្រួតពលមក លោកប្រមុខរដ្ឋាភិបាលបារំាងក៏ត្រូវបានលោកប្រធានាធិបតីហ្វីល្លីពីន Benigno Aquino ចេញមកទទួលដោយសេចក្តីសោមនស្សរីករាយជាលើកទីមួយ។
« គេត្រូវតែទទួលស្គាល់ថា ប្រជាជនហ្វីល្លីពីន និងបារំាងបានចែករំលែកនូវតម្លៃរួមតែមួយដូចគ្នា តែរដ្ឋាភិបាលនៅមិនទាន់បានសហការណ៍គ្នាឲ្យបានខ្លំាងក្លានៅឡើយទេ។ ដូច្នេះ ដំណើរទស្សនកិច្ចរបស់លោកនៅពេលនេះ គឺជាឱកាសមួយដើម្បីអនុញ្ញាតឲ្យប្រទេសយើងទំាងពីរផ្តើមពង្រឹងទំនាក់ទំនងរវាងគ្នា » នេះជាការថ្លែងរបស់លោក Benigno Aquino ទៅកាន់លោក Jean-Marc Ayrault។ លោកMarc Ayrault ដែលបានឆ្លើយតបវិញថា « លោកប្រធានាធិបតី អរគុណចំពោះការទទួលយ៉ាងរាក់ទាក់ កក់ក្តៅរបស់លោក ដែលនេះ គឺជាសញ្ញាមួយដែលបញ្ជាក់ពីមហាមិត្តភាពរវាងប្រទេសយើងទំាងពីរ »។
ទន្ទឹមគ្នានេះ និងក្រៅពីមិត្តភាព លោកនាយករដ្ឋមន្រ្តីបារំាងក៏មិនភ្លេចនិយាយពីការផ្តោះប្តូរនៅលើវិស័យពាណិជ្ជកម្មទេ។ « ខ្ញុំមានបំណងចង់ឲ្យរោងចក្រសហគ្រាសបារំាងដែលមានប្រមាណជា ១០០ នៅក្នុងប្រទេសហ្វីល្លីពីនសព្វថ្ងៃអាចនឹងទទួលបាននូវការជួយជ្រោមជ្រែងបន្ថែមទៀតពីរដ្ឋាភិបាលហ្វីល្លីពីនក្នុងការពង្រីកបន្ថែមទៀតនូវសកម្មភាពរបស់ខ្លួន។ នេះហើយគឺជាកម្មវត្ថុនៃដំណើរទស្សនកិច្ចរបស់ខ្ញុំ » នេះជាការបញ្ជាក់បន្ថែមរបស់លោក Jean-Marc Ayrault។
អ្វីជាការកត់សម្គាល់ ទស្សនកិច្ចរបស់លោកប្រមុខរដ្ឋាភិបាលបារំាងនៅទ្វីបអាស៊ីអាគ្នេយ៍ពេលនេះបានបង្ហាញយ៉ាងច្បាស់ អំពីឆន្ទៈរបស់លោកក្នុងការអភិវឌ្ឍន៍ការទូតសេដ្ឋកិច្ចមួយដើម្បីកាត់បន្ថយឱនភាពពាណិជ្ជកម្មក្រៅប្រទេសរបស់បារំាង និងស្វែងរកលំនឹងជញ្ជីងពាណិជ្ជកម្មជាថ្មី ចាប់ពីនេះ ទៅ ៥ឆ្នំាខាងមុខ។ ដូច្នេះ ហ្វីល្លីពីនដែលជាប្រទេសអាស៊ីមួយដែលកំពុងមានកំណើនសេដ្ឋកិច្ចខ្ពស់ ពិតជាដៃគូមួយរបស់បារំាងដែលមិនអាចខ្វះបាន៕
ស្តាប់ការផ្សាយមុនៗ
សេវា វិទ្យុបារាំងអន្តរជាតិ
អត្ថបទដែលពេញនិយមជាងគេ
អត្ថាធិប្បាយ
ប្រតិកម្មជុំវិញអត្ថបទនេះ