លោកស្រីអ៊ុង សានស៊ូជីសុំឲ្យជប៉ុនជួយគំាទ្រដំណើរការលទ្ធិប្រជាធិបតេយ្យនៅភូមា
លោកស្រីអ៊ុង សានស៊ូជី ប្រធានគណបក្សសម្ព័ន្ធជាតិដើម្បី លទ្ធិប្រជាធិបតេយ្យនៅក្នុងប្រទេសភូមាទើបបានទៅដល់ប្រទេសជប៉ុននៅថ្ងៃសៅរ៍ ទី១៣ មេសានេះ ដើម្បីបំពេញទស្សនកិច្ចរយៈពេលមួយសប្តាហ៍។ ដំណើរទៅកាន់ប្រទេសជប៉ុនរបស់លោកស្រីអ៊ុង សានស៊ូជីពេលនេះ គឺជាលើកទីមួយបង្អស់ គិតតំាងពី ២៧ឆ្នំាកន្លងទៅ។ គោលដៅនៃទស្សនកិច្ច គឺដើម្បីសុំឲ្យរដ្ឋាភិបាលក្រុងតូក្យូជួយគំាទ្រដំណើរការលទ្ធិប្រជាធិបតេយ្យដែលកំពុងបន្តមាននៅក្នុងប្រទេសភូមា។
ចុះផ្សាយនៅថ្ងៃ៖
ស្តាប់ - ០២:៣១
« ប្រទេសជប៉ុនសូមស្វាគមន៍ » នេះជាសម្រែកសាទររបស់ក្រុមអ្នកកាសែត រួមជាមួយប្រជាជនភូមាប្រមាណជា ១៥០នាក់នៅពេលដែលលោកស្រីអ៊ុង សានស៊ូជីបានទៅដល់អាកាសយានដ្ឋានក្នុងទីក្រុងតូក្យូ។ « Arigato អរគុណ » នេះជាការឆ្លើយតបវិញរបស់លោកស្រីអ៊ុង សានស៊ូជី។ តាមពិតទៅ វត្តមានរបស់ស្រី្តប្រមុខបក្សប្រឆំាងភូមាមានអាយុ ៦៧ឆ្នំារូបនេះ ត្រូវបានអញ្ជើញដោយលោករដ្ឋមន្រ្តីក្រសួងការបរទេសជប៉ុន។ លោកប្រមុខការទូតជប៉ុនដែលសង្ឃឹមពង្រឹងទំនាក់ទំនងជាមួយស្រ្តីជ័យលាភីរង្វាន់ណូបែលសន្តិភាពដែលកំពុងមានប្រជាប្រិយភាពនិងឥទ្ធិពលនៅក្នុងប្រទេសភូមា ក៏ដូចជានៅក្នុងពិភពលោក។
គួរជម្រាបជូនថា តំាងពីភូមាបានចាប់ផ្តើមដំណើរការលទ្ធិប្រជាធិបតេយ្យក្នុងខែមីនា ឆ្នំា ២០១១ មក ជប៉ុនក៏បានចាប់ផ្តើមប្រឹងប្រែងជួយជាថវិកា និងទឹកចិត្តដល់រដ្ឋាភិបាលភូមាឲ្យបន្តកំណែទម្រង់នយោបាយ និងការអភិវឌ្ឍន៍សេដ្ឋកិច្ច។ បច្ចុប្បន្ននេះ មានក្រុមហ៊ុន រោងចក្រសហគ្រាសជប៉ុនជាច្រើនកំពុងតម្រៀបជួរគ្នាត្រៀមខ្លួនចូលទៅរកស៊ីនៅក្នុងប្រទេសភូមាដែលសម្បូរកម្លំាងពលកម្ម និងមានតម្លៃទាប។ ការអំពាវនាវឲ្យជប៉ុនផ្តើមបោះទុនរកស៊ីនៅភូមានេះនឹងត្រូវលោកស្រីអ៊ុង សានស៊ូជីគ្រោងលើកយកទៅជជែកជាមួយលោកនាយករដ្ឋមន្រ្តីជប៉ុន Shinzo Abe លោកប្រមុខការទូត Fumio Kishida ប្រធានព្រឹទ្ធសភា ប្រធានរដ្ឋសភា ព្រមទំាងក្រុមប្រធានក្រុមហ៊ុន រោងចក្រសហគ្រាសជប៉ុន។
ក្រៅពីទីក្រុងតូក្យូ លោកស្រីអ៊ុង សានស៊ូជីនឹងបន្តដំណើរទៅកាន់ទីក្រុងក្យូដូដែលនៅទីនោះ លោកស្រីធ្លាប់បានស្នាក់នៅពីឆ្នំា ១៩៨៥ ដល់ឆ្នំា ១៩៨៦ ក្នុងនាមជាអ្នកស្រាវជ្រាវម្នាក់ដែលបានអញ្ជើញដោយជប៉ុននៅពេលនោះ។ តែនៅពេលត្រលប់ចូលស្រុកវិញ ក្រោយពេលបញ្ចប់បេសកកម្មក្នុងប្រទេសជប៉ុនក្នុងឆ្នំា ១៩៨៦ លោកស្រីត្រូវបានរដ្ឋាភិបាលរបបសឹកភូមាចាប់ឃុំខ្លួនក្នុងគេហដ្ឋាន។
សូមជម្រាបជូនថា ទំនាក់ទំនងរវាងលោកស្រីអ៊ុង សានស៊ូជី និងជប៉ុនបានបន្សល់ទុកតំាងពីជំនាន់ឪពុករបស់លោកស្រី គឺលោកអ៊ុង សានមកម្ល៉េះ។ លោកអ៊ុង សានដែលបានដឹកនំាចលនាឯករាជ្យមួយប្រឆំាងនឹងអាណានិគមនិយមអង់គ្លេស។ នៅដំណាច់ឆ្នំា ១៩៤០ លោកអ៊ុង សានបានស្នាក់នៅក្នុងប្រទេសជប៉ុនរយៈពេល ៧ខែដែលក្នុងឱកាសនោះ លោកទទួលបានជំនួយជាប្រាក់ និងសព្វាវុធពីរដ្ឋាភិបាលជប៉ុនដើម្បីដេញទាហានអង់គ្លេស។ ២ឆ្នំាក្រោយមក លោកអ៊ុង សានបានរៀបចំរដ្ឋាភិបាលភូមាមួយដោយមានការគំាទ្រពីក្រុងតូក្យូ។ តែសា្រប់ក្នុងឆ្នំា ១៩៤៥ លោកអ៊ុង សានបានទទួលជំនួយពីអង់គ្លេសដើម្បីបណ្តេញទាហានជប៉ុនចេញពីភូមាវិញម្តង៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ