របាយការណ៍បង្ហាញថា កុមារកម្ពុជាជាង ៥០% បានទទួលអំពើហិង្សាផ្លូវកាយ
ការសិក្សាមួយថ្មី បានបង្ហាញថា កុមារកម្ពុជាធ្លាប់ទទួលរងអំពើហិង្សាបីប្រភេទ ដែលមានអំពើហិង្សាផ្លូវកាយ ផ្លូវចិត្ត និងផ្លូវភេទ។ អំពើហិង្សាផ្លូវកាយមានចំនួនច្រើនជាងគេរហូតដល់ទៅជាង ៥០% ។ តួលេខនេះ ត្រូវបានបង្ហាញនៅក្នុងឱកាស ការប្រកាសផ្សព្វផ្សាយជាផ្លូវការនូវរបាយការណ៍ នៃការអង្កេតអំពើហិង្សាលើកុមារកម្ពុជា និងការប្តេជ្ញាចិត្តគន្លឹះរបស់រាជរដ្ឋាភិបាលកម្ពុជា ក្នុងការទប់ស្កាត់និងឆ្លើយតប និងអំពើហិង្សាលើកុមារ នៅព្រឹកថ្ងៃទី ២២ តុលានេះ នៅឯសណ្ឋាគាសូហ្វីតែល រាជធានីភ្នំពេញ។
ចុះផ្សាយនៅថ្ងៃ៖
ស្តាប់ - ០១:៤២
ការរកឃើញក្នុងរបាយការណ៍នេះ បានបង្ហាញថា ការអប់រំកូនតាមបែបប្រពៃណីរបស់ប្រជាពលរដ្ឋខ្មែរមួយចំនួន ក៏អាចចាត់ចូលជាការប្រព្រឹត្តអំពើហិង្សាទៅលើកុមារផងដែរ។ ហើយអំពើហិង្សាដែលរួមមានដូចជាការវាយនឹងរំពាត់ ការទះកំផ្លៀង ការច្រាន ការដាល់ ការទាត់ធាក់ ជាដើមនោះ គឺសុទ្ធសឹងតែជាអំពើហិង្សាផ្លូវកាយលើកុមារ។
លោកស្រី អ៊ឹង កន្ថាផាវី រដ្ឋមន្ត្រីក្រសួងកិច្ចការនារី បានមានប្រសាសន៍ថា កន្លងមកយើងធ្លាប់គិតថា អំពើហិង្សាផ្លូវភេទលើកុមារកម្ពុជាអាចនឹងមានច្រើន ប៉ុន្តែផ្ទុយទៅវិញ អំពើហិង្សាផ្លូវភេទនេះ គឺមានតិចជាងគេ ហើយអំពើហិង្សាផ្លូវកាយមានច្រើនជាងគេរហូតដល់ទៅជាង ៥០% និងបន្ទាប់មកមានអំពើហិង្សាផ្លូវចិត្ត។
លោកស្រីរដ្ឋមន្ត្រី បានបន្តថាការរកឃើញនេះ នឹងបង្ហាញជាគន្លឹះមួយសម្រាប់រដ្ឋាភិបាលកម្ពុជា ក្នុងការជួយលុបបំបាត់ និងទប់ស្កាត់ការប្រើអំពើហិង្សាលើកុមារកម្ពុជា តាមរយៈការបញ្ជ្រាបព័ត៌មាននេះទៅកាន់គ្រប់ភាគីពាក់ព័ន្ធនានា និងជាពិសេសដល់អាណាព្យាបាលរបស់កុមារទាំងអស់ពីបញ្ហានេះ។
របាយការណ៍ក៏បានកត់សម្គាល់ថា នេះគឺជាប្រវត្តិសាស្ត្រសម្រាប់ប្រទេសកម្ពុជា ដែលក្លាយជាប្រទេសដំបូងគេនៅអាស៊ីបូព៌ា និងប៉ាស៊ីហ្វិក ដែលបានធ្វើការអង្កេតមួយ និងបានផ្តល់នូវទិន្នន័យអំពីប្រេវ៉ាឡង់ និងលក្ខណៈនៃអំពើហិង្សាលើកុមារនៅទូទាំងប្រទេស។
សូមបញ្ជាក់ថា ការសិក្សាស្រាវជ្រាវនេះ ដឹកនាំដោយវិទ្យាស្ថានស្ថិតិ របស់ក្រសួងផែនការ ហើយត្រូវបានធ្វើឡើងក្នុងខែកុម្ភៈ និងមីនា ឆ្នាំ ២០១៣។ ការអង្កេតត្រូវបានធ្វើឡើងទៅលើគ្រួសាររបស់កុមារា និងកុមារីដែលមានអាយុចន្លោះពី ១៣ ទៅ ២៤ ឆ្នាំ នៅទូទាំងខេត្ត ក្រុង ក្នុងប្រទេសកម្ពុជា។ មានកុមារា និងកុមារីចំនួនជាង ២ពាន់នាក់ បានចូលរួមនៅក្នុងការអង្កេតនេះ។ការសិក្សាស្រាវជ្រាវនេះ បានទទួលការឧត្តមថវិកា ពីខាងអង្គការUnicef កម្ពុជា៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ