លីប៊ីកំពុងស្គាល់រលកហិង្សាថ្មី បស្ចឹមលោកណែនាំពលរដ្ឋឱ្យត្រលប់ចូលស្រុក
បណ្តាប្រទេសជាច្រើននៅអឺរ៉ុប មានជាអាទិ៍ អង់គ្លេស អាល្លឺម៉ង់ បានអំពាវនាវឱ្យពលរដ្ឋខ្លួនទាំងអស់ ចាកចេញពីប្រទេសលីប៊ី បន្ទាប់ពីក្បួនរថយន្តឯកអគ្គរដ្ឋទូតអង់គ្លេសរងការវាយប្រហារនៅព្រឹកថ្ងៃអាទិត្យទី ២៧ កក្កដា និងមួយថ្ងៃក្រោយពីសហរដ្ឋអាមេរិកជម្លៀសបុគ្គលិកទូតចេញអស់ពីប្រទេសលីប៊ីនេះ។ លីប៊ីបាននិងកំពុងស្គាល់អំពើហិង្សា និងការប្រយុទ្ធគ្នារវាងកងកម្លាំងទាហានជាមួយពួកឧទ្ទាមអ៊ីស្លាមជ្រុលនិយម ដែលក្នុងរយៈពេលតែ២៤ម៉ោងចុងក្រោយនេះសោះ មានជនស៊ីវិលយ៉ាងហោចណាស់៩៧នាក់បានបាត់បង់ជីវិត។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:២០
ស្ថានភាពសន្តិសុខនៅប្រទេសលីប៊ី មានអស្ថិរភាពនិងមិនជាក់លាក់កាន់តែខ្លាំង ! ពលរដ្ឋអាល្លឺម៉ង់អាចនឹងរកគ្រោះជាប់ជាចំណាប់ថ្នូរ ឬរងភេរវកម្ម! នេះជាសាររបស់ក្រសួងការបរទេសអាល្លឺម៉ង់ ដែលអំពាវនាវឱ្យពលរដ្ឋចាកចេញពីលីប៊ី។ ឯចំណែកអង់គ្លេសវិញ បានអំពាវនាវឱ្យពលរដ្ឋអង់គ្លេសទាំងអស់ចាកចេញពីប្រទេសលីប៊ីដែរ ដោយមធ្យោបាយផ្ទាល់ខ្លួន និងណែនាំពលរដ្ឋកុំឱ្យធ្វើដំណើរទៅប្រទេសនេះ តាំងពីល្ងាចថ្ងៃសៅរ៍ មុនការវាយប្រហារប្រឆាំងក្បួនរថយន្តឯកអគ្គរដ្ឋទូតអង់គ្លេសប្រចាំលីប៊ីទៀត។ ការវាយប្រហារប្រឆាំងក្បួនទូត ជាសំណាងល្អមិនបានបង្កឱ្យគ្រោះថ្នាក់និងការខូចខាតអ្វីទេ។
បែលហ្សិក ព្រមទាំងបណ្តាប្រទេសនៅអឺរ៉ុបមួយចំនួនទៀតអេស្ប៉ាញ ហូឡង់ ព័រទុយហ្កាល់ ន័រវេស ដាណឺម៉ាក ស្វីស ... បានចេញសេចក្តីណែនាំនេះដូចគ្នា តាំងពីថ្ងៃទី ១៦កក្កដាមក។ ចំណែកសហរដ្ឋអាមេរិកវិញ បានប្រើមធ្យោបាយធំ ជម្លៀស បុគ្គលិក និងតំណាងការទូតខ្លួនចេញអស់ពីប្រទេសលីប៊ីនេះ កាលពីថ្ងៃសៅរ៍។ សូមបញ្ជាក់ថា តាំងពីថ្ងៃទី ១៣ កក្កដាមក លីប៊ីបានធ្លាក់ចូលក្នុងអន្ទាក់ហិង្សាជាថ្មី រហូតអង្គការសហប្រជាជាតិបានសម្រេចជម្លៀសបុគ្គលិកចេញជាបណ្តោះអាសន្ន។ ការប្រយុទ្ធគ្នាមានកើតឡើងស្ទើរគ្រប់ទីកន្លែង រវាងក្រុមជាគូប្រជែងគ្នា ដើម្បីដណ្តើមគ្រប់គ្រងអាកាសយានដ្ឋាននៅទីក្រុងទ្រីប៉ូលី ឬនៅក្រុងបិនហ្កាហ្ស៊ីរវាងកងទ័ពរដ្ឋាភិបាល និងពួកអ៊ីស្លាមជ្រុលនិយម បានរុញច្រានប្រទេសឱ្យធ្លាក់ក្នុងភាពវិកវរជាថ្មី៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ