មានភ្លើងទើបមានផ្សែង រឿងទឹកស៊ុបគួរតែមានការពន្យល់ជាផ្លូវការពីសមត្ថកិច្ច
ចុះផ្សាយនៅថ្ងៃ៖
ស្តាប់ - ០៥:២៤
ប្រសិនបើមានការនាំទឹកស៊ុបពីប្រទេសវៀតណាមចូលមកប្រទេសកម្ពុជាដើម្បីប្រើប្រាស់នៅក្នុងអាជីវកម្មអាហារដ្ឋានមែននោះ វាជារឿងមួយមិនគួរឲ្យជឿហើយកម្ពុជាគ្មានសល់អ្វីទៀតទេទាក់ទងទៅនឹងការនាំចូលទំនិញពីបរទេស។ ការបន្លឺសម្លេងតៗគ្នា ព្រមទាំងមានការបង្ហោះនៅតាមទំព័របណ្តាញសង្គមផងនោះ ពីរឿងទឹកស៊ុបនេះ បានធ្វើឲ្យប្រជាជនខ្មែរមានការភ្ញាក់ផ្អើលយ៉ាងខ្លាំងរយៈពេលជាងមួយសប្តាហ៍មកហើយ។ ទោះជាយ៉ាងនេះក្តី គេនៅមិនទាន់ឃើញអាជ្ញាធរដែលពាក់ព័ន្ធចេញមុខ ពន្យល់ជាផ្លូវការនៅឡើយទាក់ទងទៅនឹងបញ្ហានេះ។
គ្រាន់តែឮសូរថា «ខ្មែរនាំទឹកស៊ុបពីប្រទេសវៀតណាមចូលមកក្នុងប្រទេសកម្ពុជា» មហាជនបានគក់ដើមទ្រូងហើយលាន់មាត់ថា ចុះស្រុកខ្មែរឥលូវដល់ថ្នាក់ហ្នឹង!បន្ទាប់មកគេបន្ទរបន្ថែ មថាតើមានអ្វីទៀតដែលនឹកស្មានមិនដល់នឹងត្រូវនាំចូលមកបន្ថែមទៀត ដែលគេមិនបានដឹង។
ការនាំចូលទឹកស៊ុបពីប្រទេសវៀតណាមនេះ ត្រូវបានបែកធ្លាយតាមប្រព័ន្ធបណ្តាញសង្គមមិនទាន់អស់ចំហាយនៅឡើយទេ ទោះជាមានព័ត៌មានមួយចំនួនបានផ្សព្វផ្សាយដើម្បីជួយសម្រួលស្ថានការណ៍ជ្រួលច្របល់ កុំឲ្យអ្នកប្រកបអាជីវកម្មលក់គុយទាវ និងលក់ស៊ុបមានការប្រឈមកាន់តែខ្លាំង។
ការដែលមិនទាន់ទុកចិត្តទាំងស្រុងរបស់ប្រជាពលរដ្ឋខ្មែរ ដែលម្នាក់ៗបានស៊ាំរួចទៅហើយក្នុងការផ្ទុកជាតិគីមីនៅក្នុងខ្លួននោះ គឺដោយសារកន្លងមកក៏ដូចជាបច្ចុប្បន្នមានផលិតផលជាច្រើន ក្រៅពីទឹកស៊ុបនេះត្រូវគេនាំចូលពីប្រទេសជិតខាង តាមមធ្យោបាយផ្សេងៗដូចជាបន្លែ ផ្លែឈើ ភេសជ្ជៈ និងគ្រឿងបរិភោគជាច្រើនទៀតហើយជាញឹកញយគេឃើញសមត្ថកិច្ចបានចាប់ជង្គង់ស្អុយរលួយនាំចូលពីថៃដុតចោលទាំងតោនៗហើយមួយចំនួនក៏ធ្លាយរហូតមកដល់កណ្តាលក្រុងភ្នំពេញ រាជធានីអច្ឆរិយៈ។
ការលើកឡើងពីរូបភាពទាំងអស់នេះបង្ហាញថា ពលរដ្ឋខ្មែរឆាប់ផ្អើល ឆាប់ខ្លាច ហើយក៏មិនងាយរសាយទៅវិញដែរ ខណៈដែលអ្នកមានលទ្ធភាពចាប់ផ្តើមគិតគូរពីផលប៉ះពាល់សុខភាពរបស់គេឡើងវិញ។ជាការពិតប្រទេសកម្ពុជានៅមិនទាន់ក្លាយជាប្រទេសផលិតដើម្បីនាំចេញពេញលេញ នៅឡើយទេ ក៏ប៉ុន្តែមានការនាំចូលសម្បូរបែប។
ជាងមួយសប្តាហ៍កន្លងទៅនេះព័ត៌មាន ស្តីពីទឹកស៊ុបនាំចូលពីវៀតណាមត្រូវបានគេផ្សាយតៗគ្នា ដោយមានការលើកឡើងពីការព្រួយបារម្មណ៍ថាអាចមានដាក់ជាតិគីមី ឬក៏មិនដឹងជាយកវត្ថុអ្វីទៅស្ងោរធ្វើទឹកស៊ុបនោះទេ។សូម្បីតែការហៅទូរស័ព្ទចូលទៅកាន់ប្រព័ន្ធផ្សព្វផ្សាយមួយចំនួននៅក្នុងកម្មវិធីដំណឹងទាន់ហេតុការណ៍ក៏បានលើករឿងនេះដែរ ដោយអ្នកហៅចូលបានប្រាប់ពីប្រភពមកពីខេត្តកំពង់ចាម។
ការនាំចូលមកក្នុងប្រទេសកម្ពុជាត្រូវគេធ្វើឡើងតាមលក្ខណៈពីរយ៉ាងគឺ ទី១នាំចូលដោយផ្លូវការណ៍កាត់តាមច្រកទ្វារអន្តរជាតិផ្លូវគោកធំៗ ដោយមានការត្រួតពិនិត្យពីស្ថាប័នពាក់ព័ន្ធនានាមានគយ កាំកុងត្រូល និងប៉ូលីសសេដ្ឋកិច្ចជាដើម។
រីឯការនាំចូលម្យ៉ាងទៀតនោះគឺជាការនាំចូលតាមច្រករបៀង។តាមការឲ្យដឹងពីប្រជាជនដែលរស់នៅតាមបណ្តោយព្រំដែនកម្ពុជានិងប្រទេសជិតខាង ការនាំចូលផលិតផល សំភារៈប្រើប្រាស់ ផ្សេងៗ រួមទាំងប្រេងសាំងផងនោះ ត្រូវគេធ្វើឡើងតាមច្រករបៀង។ ច្រករបៀងដែលជាច្រកមិនផ្លូវការ សម្បូរណាស់នៅតាមព្រំដែនកម្ពុជាទាំងខាងកើត និង ខាងលិច។ តើអាចនិយាយថា ក្នុងចំណោមទំនិញដែលចូលមកតាមច្រករបៀងទាំងអស់នោះ អាចមានទឹកស៊ុបដែរឬយ៉ាងណានោះទេ។បើនិយាយពីវត្ថុរាវដែលនាំចូលដាក់ប៊ីដុងវិញ មានប្រេងសាំង ស្រាស ប្រេងឆា ហើយវត្ថុរាវទាំងអស់នេះ បើនៅក្នុងប៊ីដុងហើយមើលពីចំងាយទៅហាក់ដូចស្រដៀងៗគ្នា។
តើប្រភពនៃការលើកឡើងថា មានការនាំចូលទឹកស៊ុបចេញមកពីណា? ប្រជាជនឬអាជ្ញាធរមានសមត្ថកិច្ចជាអ្នកស៊ើបរឿងនេះ ហើយយកមកនិយាយប្រាប់មហាជន។ បើមិនមានអ្វីជា អំណះអំណាងច្បាស់លាស់ទេ ពលរដ្ឋខ្មែរមួយចំនួននៅតែមានការរអា និងប្រយ័ត្នប្រយែងក្នុងការចូលទទួលទានអាហារដែលប្រើប្រាស់ទឹកស៊ុបជារៀងរាល់ថ្ងៃ។
សូមបញ្ជាក់ថាគ្រាន់តែបានទទួលដំណឹងពីវត្តមានទឹកស៊ុបនាំចូលពីប្រទេសវៀតណាមមកកម្ពុជាភ្លាម ហាងគុយទាវ និងអាហារដ្ឋានដទៃទៀតមានការព្រួយបារម្មណ៍ទៅហើយ ហើយកន្លែងខ្លះលួចបង្ហើបប្រាប់ថា ទំនងដូចជាមានការធ្លាក់ភ្ញៀវអំឡុងពេលដែលលេចឮថាមានការប្រើប្រាស់ទឹកស៊ុបវៀតណាមនៅក្នុងប្រទេសកម្ពុជា។អតិថិជនខ្លះចូលទៅទទួលទានក្នុងហាងតែងមានការសួរនាំទៅអ្នកលក់ពីរឿងឆ្អឹងស៊ុប ដែលឆ្អឹងស៊ុបនេះជាភស្តុតាងដ៏រឹងមាំ ក្នុងការមានជំនឿចិត្តថាទឹកស៊ុបពិតជារំងាស់ដោយ អ្នកលក់ផ្ទាល់នៅក្នុងប្រទេសកម្ពុជា។
ជាការកត់សម្គាល់គេមិន ឃើញមានការចេញមុខបំភ្លឺ ពន្យល់ជាផ្លូវការ ជាពិសេសផ្នែកកាំកុងត្រូលរបស់ក្រសួងពាណិជ្ជកម្មនិងសមត្ថកិច្ចពាក់ព័ន្ធដទៃទៀត។រឿងធំបែបនេះគួរតែសមត្ថកិច្ចមានចំណាត់ការច្បាស់លាស់ ថាតើវាជាការឃោសនាអកុសល ឬក៏ជាការពិត។
ករណីបែបនេះគួរតែមានការ ចេញសេចក្តីប្រកាសជាលាយលក្ខណ៍អក្សរណាមួយ ឬក៏មន្ត្រីមានសមត្ថកិច្ចចេញមុខនិយាយច្បាស់ៗ នៅតាមប្រព័ន្ធផ្សព្វផ្សាយជាតិដើម្បីធ្វើឲ្យប្រជាពលរដ្ឋមានការកក់ក្តៅ និងជឿទុកចិត្ត ព្រមទាំងយល់ថាបញ្ហាសុខមាលភាព និងសុវត្ថិភាព របស់ពួកគេត្រូវបាន យកចិត្តទុកដាក់។
មិនថាតែរឿងទឹកស៊ុបនេះទេ គ្រប់រឿងដែលមានផលប៉ះពាល់ដល់អារម្មណ៍ សុខមាលភាព និងសុវត្ថិភាពរបស់ប្រជាជន អាជ្ញាធរគួរតែមានកិច្ចអន្តរាគមន៍ជាបន្ទាន់ ដើម្បីបញ្ចប់ភាពរំជើបរំជួល។និងដឹងស ខ្មៅថាការពិតវាទៅជាយ៉ាងណានោះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ