វៀតណាម -

អត្ថបទចុះផ្សាយនៅថ្ងៃ អង្គារ 30 តុលា 2012 - ព័ត៌មានទើបកែប្រើលើកចុងក្រោយ ថ្ងៃ អង្គារ 30 តុលា 2012

អ្នកប្រឆាំងនឹងការរំលោភដែនដីរបស់ចិនត្រូវតុលាការវៀតណាមផ្តន្ទាទោស

អ្នកនិពន្ធបទភ្លេង និងទំនុកច្រៀងវៀតណាមដែលតុលាការផ្តន្ទាទោសឲ្យជាប់គុក៤ឆ្នាំ និង៦ឆ្នាំ ពីបទឃោសនាប្រឆាំងរដ្ឋាភិបាល

ដោយ ឈាង បុប្ផា

នៅភាគខាងត្បូងវៀតណាម តុលាការប្រជាជនបានប្រកាសផ្តន្ទាទោសអ្នកនិពន្ធបទភ្លេង និងទំនុកច្រៀង ពីរនាក់ ឲ្យជាប់គុក ៤ឆ្នាំ និង៦ឆ្នាំ។ យោងតាមមេធាវីរបស់ជនជាប់ចោទ តុលាការបានចោទអ្នកទាំងពីរនាក់ក្នុងបទបានធ្វើការឃោសនាប្រឆាំងរដ្ឋអំណាច។

សេចក្តីរាយការណ៍របស់ឈាង បុប្ផា

ស្តាប់ (01:51)

30/10/2012 by ឈាង បុប្ផា

មនុស្សទាំងពីរនាក់ដែលតុលាការវៀតណាមផ្តន្ទាទោសឲ្យជាប់គុកនោះ ដោយពិតទៅមិនបានរិះគន់ដោយផ្ទាល់ ចំៗទៅលើរដ្ឋាភិបាលវៀតណាមទេ។ ពួកគេទាំងពីរនាក់ត្រូវបានអាជ្ញាធរចាប់ខ្លួន កាលពីចុងឆ្នាំ ២០១១ ក្នុងអំឡុងបង្រ្កាបរបស់អាជ្ញាធរទៅលើចលនាដែលប្រឆាំងនឹងចិន។

អ្នកទាំងពីរត្រូវគេស្គាល់ជាទូទៅថា ជាអ្នកនិពន្ធបទភ្លេង និងសរសេរទំនុកច្រៀងឲ្យតារាចម្រៀងល្បីៗនៅវៀតណាម។ បុរសឈ្មោះ Viet Khang អាយុ ៣៤ឆ្នាំ ដែលតុលាការបានកាត់ទោសឲ្យជាប់គុក ៤ឆ្នាំនោះ មានឈ្មោះល្បី ដោយមកពីគាត់បាននិពន្ធបទចម្រៀង មានលក្ខណៈស្នេហាជាតិ ដូចជា បទ តើអ្នកជានរណា? ឬបទ តើប្រទេសវៀតណាមរបស់ខ្ញុំនៅឯណា? បទទាំងពីរនេះចង់សំដៅទៅលើជម្លោះដែនដីសមុទ្រដែលវៀតណាមកំពុងមានជាមួយចិន។

អង្គការការពារសិទ្ធិមនុស្សមួយចំនួន បានថ្កោលទោសការសម្រេចរបស់តុលាការ និងបានទាមទារឲ្យគេដោះលែង អ្នកនិពន្ធទាំងពី ដែលគេចាត់ទុកថា ជាអ្នកជាប់ទោសមនសិការ។

សូមបញ្ជាក់ថា នៅក្នុងប្រទេសវៀតណាម ជាទីដែលការពិភាក្សាប្រជាធិបតេយ្យត្រូវរដ្ឋាភិបាលកុម្មុយនិស្តបិទ ហាមឃាត់ អាជ្ញាធរឧស្សាហ៍យកបទចោទប្រកាន់”ធ្វើការឃោសនាប្រឆាំងរដ្ឋ” ឬបទចោទប្រកាន់ចង់ផ្តួលរំលំរដ្ឋាភិបាល មកប្រើប្រាស់ ដើម្បីដាក់សម្ពាធទៅលើក្រុមចលនាតវ៉ានានា។ បទចោទប្រកាន់ខាងលើ នឹងអាចធ្វើឲ្យអ្នកតវ៉ាបញ្ចេញមតិអាចប្រឈមមុខនឹងការដាក់ទោសជាប់ពន្ធនាគារដល់ទៅ២០ឆ្នាំ។

រហូតមកដល់ពេលនេះ សកម្មជនប្រឆាំងអំពើពុករលួយ អ្នកប្រជាធិបតេយ្យដែលសរសេរបញ្ចេញមតិរិះគន់ និងកវីនិពន្ធ ជាច្រើននាក់កំពុងជាប់ក្នុងគុកនយោបាយរបស់រដ្ឋាភិបាលវៀតណាម។ អង្គការការពារសិទ្ធិមនុស្សបានវាយតម្លៃថា សកម្មភាពរបស់រដ្ឋាភិបាល ធ្វើឡើង ដើម្បីគាបសង្កត់ និងបិទសិទ្ធិសេរីភាពបញ្ចេញមតិរបស់អ្នកសេ្នហាប្រជាធិបតេយ្យ៕