Delicious
Digg
Facebook
Twitter
Yahoo!
Technorati
កម្ពុជា -
អត្ថបទចុះផ្សាយនៅថ្ងៃ ព្រហស្បតិ៍ 02 កុម្ភៈ 2012 -
ព័ត៌មានទើបកែប្រើលើកចុងក្រោយ ថ្ងៃ ព្រហស្បតិ៍ 02 កុម្ភៈ 2012
ក្រុមជនរងគ្រោះ ទាមទារឲ្យតុលាការផ្តន្ទាទោស ឌុច ៤៥ ឆ្នាំ ទៅ ១ជីវិត
ក្រុមជនរងគ្រោះ ទាមទារឲ្យតុលាការផ្តន្ទាទោស ឌុច ៤៥ ឆ្នាំ ទៅ ១ជីវិត
©លី ម៉េងហួរ/RFI
មួយថ្ងៃមុនថ្ងៃប្រកាសសាលដីកាស្ថាពរបិទតវ៉ា លើករណី ០០១ ប្រឆាំង លោក កាំង ហ្កេកអ៊ាវ ហៅឌុច ជនរងគ្រោះជាដើមបណ្ដឹងរដ្ឋប្បវេណី និងអ្នកប្ដឹងសាទុក្ខ រួមទាំងមេធាវី បានជួបជុំគ្នានៅសារមន្ទីប្រល័យពូជសាសន៍ទួលស្លែង ដើម្បីរំលឹកប្រវត្តិ នៃសំណុំរឿង០០១។ ក្នុងពិធីជួបជុំកាលពីប៉ុន្មាននាទីមុននេះ មេធាវី លោក ប៊ូ ម៉េង និងលោកជុំម៉ី អតីតអ្នកទោសគុកទួលស្លែង បានទាមទារឲ្យតុលាការ ដាក់ទោស ឌុច មួយជីវិត ឬក៏យ៉ាងហោចណាស់ត្រឹម ៤៥ ឆ្នាំ។ ឌុច ត្រូវបានអង្គជំនុំជម្រះសាលាដំបូង ផ្តន្ទាទោស ដាក់ពន្ធនាគារ ៣៥ ឆ្នាំ។
ក្នុងពិធីជួបជុំនៅគុកទួលស្លែង នារសៀលនេះ ទាំងមេធាវីការពារជនរងគ្រោះ និងទាំងជនរងគ្រោះ ជាអតីតអ្នករស់រានមានជីវិត នៅគុកទួលស្លែង លោក ប៊ូ ម៉េង និងលោក ជុំ ម៉ី បានប្រកាសថា ជនរងគ្រោះ មិនអាចទទួលយកបានការដាក់ទោសឌុច ត្រឹមតែ ៣៥ ឆ្នាំនោះឡើយ។ តាមជនរងគ្រោះ ចៅក្រមតុលាការកំពូល គួរតែប្រកាសសាលដីកាស្ថាពរ បិទផ្លូវតវ៉ា ដោយដាក់ពន្ធនាគារ ឌុច អស់មួយជីវិត ឬក៏យ៉ាងតិចត្រឹម ៤៥ ឆ្នាំ ដូចការទាមទាររបស់សហព្រះរាជអាជ្ញា។
លោក ប៊ូ ម៉េង និងលោក ជុំ ម៉ី អតីតអ្នកទោស នៅគុកទួលស្លែង និងជាអ្នករស់រានមានជីវិត និងមេធាវី បានប្រកាសរួចហើយនៅថ្ងៃនេះថា ការប្រកាសសាលដីកាលើករណីឌុច នៅព្រឹកថ្ងៃទី៣កុម្ភៈស្អែកនេះ តុលាការត្រូវតែដាក់ទោសឌុចមួយជីវិត ឬយ៉ាងហោចណាស់ ៤៥ ឆ្នាំ ទើបជនរងគ្រោះ អាចទទួលយកបាន។
តាមលោក ជុំ ម៉ី ការសុំទោសរបស់ឌុច និងទឹកភ្នែករបស់ឌុចប៉ុន្មានតំណក់នោះ គឺជនរងគ្រោះ ទទួលយកមិនបានទេ។ ដូច្នេះតុលាការមិនត្រូវបន្ធូរបន្ថយឲ្យអតីតមេគុកទួលស្លែង ដែលមានការធ្វើទារុណកម្មដ៏ឃោរឃៅ បណ្តាលឲ្យមនុស្សស្លាប់ជាង ១ ម៉ឺននាក់ ក្នុងសម័យខ្មែរក្រហម។
ការប្រកាសសាលដីកា ស្ថាពរលើករណីឌុច នៅព្រឹកថ្ងៃ៣កុម្ភៈស្អែកនេះ គឺជាការឈានទៅបិទបញ្ចប់សំណុំរឿង ០០១ នៅសាលាក្តីខ្មែរក្រហមជាប្រវត្តិសាស្ត្រ និងនាំយកនូវយុត្តិធម៌ និងការពិតជូនដល់អ្នករស់រានមានជីវិតពីការធ្វើទារុណកម្ម និងសម្លាប់នៅគុកទួលស្លែង និងសាច់ញាតិជនរងគ្រោះទាំងអស់។ នេះបើតាមលោក នេត្រ ភក្ត្រា មន្ត្រីនាំពាក្យសាលាក្តីខ្មែរក្រហម។
សំណុំរឿង០០១ ប្រឆាំង ឌុច ត្រូវបានអង្គជំនុំជម្រះសាលាដំបូង បើកការជំនុំជម្រះរយៈពេល ៧៧ ថ្ងៃ។ រហូតដល់ថ្ងៃទី២៦ ខែកក្កដា ឆ្នាំ ២០១០ អង្គជំនុំជម្រះសាលាដំបូង បានសម្រេចផ្តន្ទាទោសអតីតប្រធានគុកទួលស្លែង អាយុ ៧០ ឆ្នាំ លោកកាំង ហ្កេកអ៊ាវ ហៅ ឌុច ដាក់ពន្ធនាគាររយៈពេល ៣៥ ឆ្នាំ៕
ស្តាប់ការផ្សាយមុនៗ
សេវា វិទ្យុបារាំងអន្តរជាតិ
អត្ថបទដែលពេញនិយមជាងគេ
អត្ថាធិប្បាយ
ប្រតិកម្មជុំវិញអត្ថបទនេះ