សភាបារាំងផ្តល់ទំនុកចិត្តអោយលោកម៉ានុយអែល វ៉ាល់ ធ្វើជានាយករដ្ឋមន្ត្រី
នៅថ្ងៃអង្គារម្សិលមិញ សភាបារាំងបានបោះឆ្នោតផ្តល់ទំនុកចិត្តដល់លោកម៉ានុយអែល វ៉ាល់ អោយឡើងធ្វើជានាយករដ្ឋមន្ត្រី កាន់កាប់រដ្ឋាភិបាលបារាំង។ សម្លេងបោះឆ្នោតគាំទ្រលោកវ៉ាល់ មាន៣០៦ សម្លេង ឈ្នះសម្លេងប្រឆាំងដែលមានរហូតដល់២៣៩សម្លេងដែរ។ នាយករដ្ឋមន្ត្រីបារាំងថ្មី ម៉ានុអែល វ៉ាល់បានអំពាវនាវអោយគ្រប់ភាគីនយោបាយ រួបរួមគ្នា ដើម្បីបំរើជាតិ។
ចុះផ្សាយនៅថ្ងៃ៖
ស្តាប់ - ០១:៤៩
ម្សិលមិញ សភាបារាំងបានបោះឆ្នោតផ្តល់ទំនុកចិត្តអោយលោកម៉ានុយអែល វ៉ាល់ ឡើងធ្វើជានាយករដ្ឋមន្ត្រីបារាំង ដោយសារតែលោកវ៉ាល់ បានធ្វើសន្ទរកថានយោបាយធ្វើអោយអ្នកតំណាងរាស្ត្រច្រើនរូបពេញចិត្ត។ លោកវ៉ាល់ ដែលជាអតីតរដ្ឋមន្ត្រីមហាផ្ទៃ របស់អតីតនាយករដ្ឋមន្ត្រី ហ្សង់ម៉ាក អៃរ៉ូលនោះ បានលើកឡើងនៅចំពោះមុខសភាបារាំងថា នឹងសន្សំសំចៃថវិការដ្ឋអោយបាន៥០ពាន់លានអឺរ៉ូ ចាប់ពីឆ្នាំ២០១៥ដល់ឆ្នាំ២០១៧។ ពាក្យថា ជួយលើកតំកើងសេដ្ឋកិច្ចជាតិ សន្សំសំចៃលុយរដ្ឋ រឺក៏កាត់បន្ថយពន្ធដែលលោកវ៉ាល់បានសន្យាម្សិលមិញនេះ គឺជាអ្វីដែលគ្រប់បក្សនយោបាយបារាំងរង់ចាំលឺជាយូរហើយ។
លោកម៉ានុយអែល វ៉ាល់ បានសុំអោយបក្សប្រឆាំងចូលរួមជជែកការងារក្នុងលក្ខណៈបែបកសាង។ ម្សិលមិញ លោកវ៉ាល់ក៏បានព្យាយាមធ្វើសន្ទរកថា ប្រាប់បក្សសង្គមនិយមដែលកំពុងកាន់អំណាច ប្រាប់បក្សការពារបរិស្ថានដែលជាដៃគូរបស់បក្សកាន់អំណាច ដែរថា លោកចង់ធ្វើការជាមួយតំណាងរាស្ត្រគ្រប់រូប។
គួរបញ្ជាក់ថា ថ្វីបើលោកវ៉ាល់ ជាសមាជិកបក្សកាន់អំណាចឆ្វេងនិយមក៏ពិតមែន ប៉ុន្តែ សមាជិកបក្សកាន់អំណាច និងបក្សឆ្វេងនិយមច្រើនរូបមិនសូវពេញចិត្តលោកវ៉ាល់ នោះទេ ព្រោះពួកគេយល់ថា គាត់មានទំនោរនយោបាយស្តាំនិយមច្រើនជាង។ កន្លងមក បក្សការពារបរិស្ថានបានប្រកាសដើរចេញពីរដ្ឋាភិបាល ក៏ដោយសារតែប្រធានាធិបតីហូឡង់ បានជ្រើសយកលោកវ៉ាល់ ធ្វើជានាយករដ្ឋមន្ត្រីផងដែរ។ ម្សិលមិញនេះ ថ្វីបើសភាមានសម្លេងបោះឆ្នោតផ្តល់ទំនុកចិត្តអោយលោកវ៉ាល់ ដល់ទៅ៣០៦សម្លេងក្តី សម្លេងបោះឆ្នោតប្រឆាំង មានដល់ទៅ២៣៩សម្លេងឯណោះ។ ទន្ទឹមនេះដែរ គេដឹងថា តំណាងរាស្ត្របក្សកាន់អំណាចជាង១០រូប មិនបានបោះឆ្នោតផ្តល់ទំនុកចិត្តដល់លោកវ៉ាល់ទេ។
គួររំលឹកថា បារាំងបានរុះរើសមាសភាពរដ្ឋាភិបាលចាស់ចោល ដោយតែងតាំងលោកម៉ានុយអែល វ៉ាល់ អោយធ្វើនាយករដ្ឋមន្ត្រីថ្មី។ មូលហេតុ ដោយសារតែបក្សកាន់អំណាចរបស់ប្រធានាធិបតីហូឡង់ បានចាញ់ឆ្នោតឃុំ-សង្កាត់ កាលពីចុងខែមិនាមុននេះ។ ក្នុងការបោះឆ្នោតនេះ បក្សប្រឆាំងស្តាំនិយមរបស់អតីតប្រធានាធិបតីសាកូហ្ស៊ី និងបក្សស្តាំជ្រុលនិយម ដណ្តើមបានក្រុងជាច្រើនមកកាន់កាប់៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ