រដ្ឋកូឡូរ៉ាដូ របស់សហរដ្ឋអាមេរិកដាក់លក់កញ្ឆាស្របច្បាប់ រដ្ឋផ្សេងទៀតស្រម៉ៃចង់ធ្វើតាម
ចុះផ្សាយនៅថ្ងៃ៖
ស្តាប់ - ០៤:៤៣
ទោះមានទឹកកកធ្លាក់ខ្លាំង អាកាសធាតុត្រជាក់ក្រោមសូន្យយ៉ាងណាក៏ដោយ ក៏មិនខ្លាច ! តាំងពីព្រលឹមអ្នកស្នេហាកញ្ឆា បាននាំគ្នាឈរតម្រង់ជួរចាំហាងបើក ! ចាប់ពីថ្ងៃទី ១មករា ឆ្នាំ២០១៤នេះ តទៅ នៅរដ្ឋកូឡូរ៉ាដូ សហរដ្ឋអាមេរិក ការលក់ទិញកញ្ឆា ជាការស្របច្បាប់ និងអនុញ្ញាតដោយច្បាប់។ សម្រាប់អ្នកគាំទ្រ ការបើកទីផ្សារកញ្ឆាដោយចំហដែលជានយោបាយឈ្នះៗ ចំណេញទាំងសងខាង ៖ ទាំងអ្នកលក់ ទាំងហិបរដ្ឋ និងទាំងការប្រយុទ្ធប្រឆាំងនឹងជួញដូរគ្រឿងញៀនខុសច្បាប់។ ពេលនេះក្រសែភ្នែកពិភពលោកកំពុងបាញ់ទៅរករដ្ឋកូឡូរ៉ាដូ ចំពោះបទពិសោធន៍ដ៏គួរឱ្យចាប់អារម្មណ៍ និងព្រួយបារម្ភ។
នេះជាលើកទីមួយ នៅសហរដ្ឋអាមេរិក នៅលើពិភពលោកផងក៏ថាបាន ដែលកញ្ឆាត្រូវបានដាក់លក់ ដោយសេរី និងដោយស្របច្បាប់ ជូនអតិថិជនទូទៅ ដែលមានអាយុចាប់ពី ២១ឆ្នាំ ឡើងទៅ ក្នុងបរិមាណយ៉ាងច្រើនបំផុត ២៨ក្រាម ដោយមិនចាំបាច់មានលិខិតពេទ្យដូចមុន។
ច្បាប់ដាក់កញ្ឆាជារបស់ស្របច្បាប់ សម្រេចដោយសំឡេងតំណាងរាស្ត្រចំនួន ៥៥% នៃរដ្ឋកូឡូរ៉ាដូ កាលពីខែវិច្ឆិកា ២០១២ ទើបចូលជាធរមាននៅព្រឹកថ្ងៃពុធទី ១មករា២០១៤ ព្រោះគេត្រូវការតាក់តែងច្បាប់ ឱ្យល្អិតល្អន់ ដើម្បីគ្រប់គ្រងទីផ្សារ ដ៏មានហានិភ័យ ឱ្យបានត្រឹមត្រូវ។ ក្នុងថ្ងៃចាប់ផ្តើមមាន ហាងលក់រាយ “Coffee Shops” ចំនួនជាង សែសិបបានបើកទ្វារលក់ដូរ ក្នុងចំណោមហាងទាំង៣៤៨ ដែលបានទទួលសិទ្ធិចែកចាយលក់កញ្ឆា ពីការិយាល័យប្រមូលពន្ធ។
ពន្ធនៃការលក់ដូរកញ្ឆា ត្រូវបានកំណត់ក្នុងកំរិត ២៥%។ រដ្ឋកូឡូរ៉ាដូ សង្ឃឹមប្រមូលប្រាក់ចូលហិបរដ្ឋបានរាប់ពាន់លានពីទីផ្សារនេះ។ ពន្ធ៤០លានដំបូងនឹងត្រូវយកទៅឧបត្ថម្ភវិស័យអប់រំសាធារណៈ។ គេបានដឹងថា គ្រាន់តែលក់កញ្ឆាសម្រាប់ព្យាបាលជំងឺ ដែលយកពន្ធត្រឹម១៥%សោះ ទីផ្សារនេះបានប្រមូលប្រាក់ជាងមួយពាន់លានដុល្លារចូលហិបកាលពីឆ្នាំ២០១២។
ចៅហ្វាយរដ្ឋកូឡូរ៉ាដូ និងអភិបាលក្រុង Denver ប្រឆាំងនឹងការដាក់កញ្ឆាឱ្យលក់ស្របច្បាប់ ទោះបីជាអាចប្រមូលថវិកាមកបំរើវិស័យសិក្សាធិការក៏ដោយ។ ប៉ុន្តែ អភិបាលទាំងពីរ ក៏ដូចជាក្រុមប៉ូលិស ត្រូវតែសម្របខ្លួនតាមមតិប្រជាជន ហើយសហការយ៉ាងពេញទំហឹង ដើម្បីដោយទីផ្សារកញ្ឆាប្រព្រឹត្តទៅតាមច្បាប់ និងមានការគ្រប់គ្រងល្អ តាំងពីការដាំដុះរហូតដល់ការដាក់លក់។ ជាបឋម អ្នកដែលអាចទទួលអាជ្ញាបណ្ណលក់ ត្រូវតែក្រុមអ្នកធ្លាប់លក់ដូរកញ្ឆាសម្រាប់ព្យាបាលជំងឺ។ ការជក់ ប្រព្រឹត្តគ្រឿងញៀនត្រូវតែហាមឃាត់ជាដាច់ខាត នៅតាមទីសាធារណៈ។ ថៅកែហាងមានសិទ្ធិគ្រប់យ៉ាងក្នុងធ្វើតេស្តលើបុគ្គលិក។ បរិមាណនៃការលក់ ត្រូវមានកំរិត ស្របទៅតាមស្ថានភាពស៊ាំរបស់អ្នកជក់ ជាពិសេសចរាចរណ៍កញ្ឆាមានដំណើរការស្របច្បាប់ក្នុងរដ្ឋកូឡូរ៉ាដូប៉ុណ្ណោះ គ្មាននរណាមានសិទ្ធិនាំគ្រឿងញៀននេះចេញក្រៅរដ្ឋបានឡើយ។
សម្រាប់ក្រុមអ្នកគាំទ្រឱ្យមានច្បាប់អនុញ្ញាតលក់កញ្ឆា សេរីភាពនៃការលក់ដូរនេះ គឺជាដំណើរឈានដល់ការបិទបញ្ចប់ការហាមឃាត់។ ការហាមឃាត់ដែលមិនធ្លាប់ចាប់អ្នកមានកញ្ឆាក្នុងខ្លួនបានម្នាក់សោះ។ ផ្ទុយទៅវិញ ការបើកសិទ្ធិស្របច្បាប់ អាចកាត់បន្ថយទីផ្សារងងឹត និងហានិភ័យនៃការជួញដូរខុសច្បាប់ដែលជាទូទៅច្រើនរកស៊ីជាមួយពួកឧក្រិដ្ឋជន។ សេដ្ឋកិច្ចក៏មានសកម្មភាពខ្លាំងទាក់ទាញទេសចរ “គ្រឿងញៀន” ប៉ូលិស តុលាការក៏នឹងត្រូវធ្វើការខ្លាំងនិងច្រើនជាងមុន។
ប៉ុន្តែចំពោះក្រុមអ្នកប្រឆាំង និងសមាគមប៉ូលិសអន្តរជាតិ ការបើកសិទ្ធិលក់កញ្ឆា គឺដូចជាចំណុចចាប់ផ្តើមនៃការលក់គ្រឿងញៀន ម៉ារីហ័រណា និងគ្រឿងញៀនផ្សេងៗទៀត ដែលឧស្សាហកម្មរបៀបនេះ នឹងមានទំហំធំជាងបារី និងមានសមត្ថភាពធន់បានយូរឆ្នាំណាស់ប្រឆាំងរាល់នឹងគំនិតចង់គ្រប់គ្រងវិស័យនេះ។ គ្រប់គ្នានឹងភ្ញាក់ផ្អើលបើកភ្នែកក្រឡោតឡើង។ ប៉ូលិសតំបន់ក៏បានព្រមានជាស្រេចនឹងគ្រោះចរាចរណ៍កើនឡើងខ្លាំង បណ្តាលមកជក់គ្រឿងញៀនពេលបើកបរ។
►សូមអាន ៖ កញ្ឆា និងសុខភាព
យ៉ាងណាក៏ដោយ ក៏ពេលនេះ ការគាំទ្រឱ្យបិទបញ្ចប់ការហាមឃាត់កញ្ឆា បានឡើងខ្ពស់ដល់កំរិត។ បណ្តាជនអាមេរិក ៥៨% ចង់ឱ្យមានការលក់ដូរកញ្ឆា ម៉ារីហ័រណា ដោយសេរី នេះបើតាមការស្ទង់មតិ កាលពីខែតុលា ២០១៣។ មតិសាធារណៈប្តូរផ្លាស់ រដ្ឋបាលលោកអូបាម៉ា ក៏បង្ខំចិត្តសម្របខ្លួនទៅតាមនោះដែរ ដោយចេញបញ្ជា កាលពីខែសីហា មិនឱ្យរដ្ឋអាជ្ញាធរសហព័ន្ធដាក់ទោសបុគ្គលក្នុងបញ្ហាកញ្ឆានេះទេ តែត្រូវវាយប្រហារដៅលើបណ្តាញជួញដូរវិញ។
រដ្ឋវ៉ាស៊ីនតោន នៅប៉ែកខាងលិចសហរដ្ឋអាមេរិក ក៏នឹងត្រូវចាប់បើកលក់កញ្ឆាដោយសេរី ចាប់ពីរដូវផ្ការីកខាងមុខទៅ ប៉ុន្តែច្បាប់អនុញ្ញាតនេះ មិនមែនជារបៀបវារៈថ្នាក់រដ្ឋសហព័ន្ធឡើយ។ នៅសហរដ្ឋអាមេរិកមានរដ្ឋជាង២០ ដែលមានលក់កញ្ឆាក្នុងបុព្វហេតុព្យាបាលជំងឺ ហើយរដ្ឋទាំងនេះកំពុងតាមដានបទពិសោធន៍នៃភាពស្របច្បាប់របស់កញ្ឆាក្នុងរដ្ឋកូឡូរ៉ាដូ មុននឹងសម្រេចចិត្តពង្រីកការប្រើប្រាស់កញ្ឆា។
នៅបរទេសវិញ ប្រទេសអ៊ុយរាហ្គេ ដែលបានអនុម័តច្បាប់លក់កញ្ឆា នៅថ្ងៃទី ២២ធ្នូ ២០១៣ នឹងអាចបើកទីផ្សារកញ្ឆាពាក់កណ្តាលឆ្នាំ២០១៤។ ប្រទេសនេះចង់យកគំរូតាមហូឡង់ ដោយលក់ឱ្យតែជនជាតិអ៊ុយរូហ្កាយ និងអ្នកស្នាក់នៅយូរអង្វែងក្នុងប្រទេសនេះ មិនមែនជាអ្នកទេសចរទេ។ ហូឡង់ល្បីខាងសេរីភាពផ្នែកគ្រឿងញៀន គ្មានច្បាប់ទេ ប៉ុន្តែអាចអត់អោនមិនយកទោសអ្នកជក់ និងអ្នកលក់ក្នុងCoffee Shops តាំងពីឆ្នាំ១៩៧៦មក៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ