អាមេរិកទាមទារឲ្យសហគមន៍អន្តរជាតិបង្កើនទណ្ឌកម្មលើស៊ីរី
នៅថ្ងៃសុក្រ ១២ សីហា ២០១១នេះ កងទ័ពស៊ីរីនៅតែបន្តប្រើកម្លាំងបង្រ្កាបបាតុករប្រឆាំង បណ្តាលឲ្យមនុស្សយ៉ាងតិច ១៦នាក់បាត់បង់ជីវិត។ លោកស្រីហ៊ីឡារី គ្លីនតុន រដ្ឋមន្រ្តីការបរទេសអាមេរិកបានទាមទារឲ្យចិន ឥណ្ឌា និងរុស្ស៊ី ចូលរួមដាក់ទណ្ឌកម្មលើរបបដឹកនាំស៊ីរី ដើម្បីដាក់សម្ពាធឲ្យលោកអាសាដបញ្ឈប់អំពើហិង្សាលើបាតុករ។ លោកអូបាម៉ាវិញ កំពុងតែពិចារណាចង់ប្រកាសជាសាធារណៈ ទាមទារឲ្យលោកអាសាដចុះចេញពីតំណែង។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៤៥
កាលពីថ្ងៃពុធ អាមេរិកបានសម្រេចបង្កើនទណ្ឌកម្មទៅលើក្រុមហ៊ុនពីរទៀតរបស់ស៊ីរី គឺធនាគារពាណិជ្ជ និងក្រុមហ៊ុនទូរស័ព្ទដៃដ៏ធំបំផុតរបស់ស៊ីរី។ ក៏ប៉ុន្តែ ទណ្ឌកម្មទាំងនេះហាក់ដូចជាមិនមានប្រសិទ្ធិភាពអ្វីនោះទេ។ កងទ័ពស៊ីរីនៅតែបន្តប្រើកម្លាំងបង្រ្កាបបាតុករប្រឆាំង។ ថ្ងៃព្រហស្បតិ៍ ម្សិលមិញនេះ លោកស្រីហ៊ីឡារី គ្លីនតុន បានទាមទារឲ្យចិន និងឥណ្ឌាដាក់ទណ្ឌកម្មលើវិស័យប្រេង និងឧស្ម័នរបស់ស៊ីរី ហើយឲ្យរុស្ស៊ីបញ្ឈប់ការលក់អាវុធទៅឲ្យស៊ីរី។
គួរបញ្ជាក់ថា ចិន និងឥណ្ឌា គឺជាប្រទេសដែលមានការវិនិយោគយ៉ាងច្រើនក្នុងវិស័យប្រេង និងឧស្ម័ននៅស៊ីរី។ ចំណែករុស្ស៊ីវិញគឺជាអ្នកផ្គត់ផ្គង់គ្រឿងសព្វាវុធដ៏ចម្បងមួយរបស់ស៊ីរី។
មន្រ្តីសេតវិមានម្នាក់ ដែលមិនបញ្ចេញឈ្មោះ បានប្រាប់ទីភ្នាក់ងារព័ត៌មានបារាំង អាអែហ្វប៉េ (AFP) ថា រដ្ឋាភិបាលអាមេរិកកំពុងតែពិចារណាធ្វើការប្រកាសជាសាធារណៈ ទាមទារឲ្យលោកបាស្ហា អាល់ អាសាដ ចុះចេញពីតំណែងប្រធានាធិបតីស៊ីរី។ មន្រ្តីនេះបានបង្ហើបឲ្យដឹងថា ការប្រកាសនេះអាចនឹងធ្វើឡើងនៅសប្តាហ៍ក្រោយ។ ក៏ប៉ុន្តែ លោកស្រីគ្លីនតុនវិញ បានអះអាងថា អាមេរិកមិនចង់ប្រកាសទាមទារឲ្យមេដឹកនាំស៊ីរីចុះចេញពីតំណែង ដោយគ្មានការគាំទ្រពីសំណាក់ប្រទេសផ្សេងទៀតនោះទេ។
គួររំឭកឡើងវិញថា កន្លងមក ក្រុមប្រឹក្សាសន្តិសុខអ.ស.ប.ធ្លាប់បានចេញសេចក្តីថ្លែងការណ៍ថ្កោលទោសស៊ីរីម្តងរួចមកហើយ ចំពោះការប្រើអំពើហិង្សាទៅលើបាតុករ។ សហភាពអឺរ៉ុប សហរដ្ឋអាមេរិក ព្រមទាំងមហាអំណាចក្នុងតំបន់មជ្ឈិមបូព៌ា រួមមាន តួកគី អេហ្ស៊ីប និងអារ៉ាប៊ីសាអ៊ូឌីត ជាដើម ក៏សុទ្ធតែបានទាមទារឲ្យស៊ីរីបញ្ឈប់ការប្រើកម្លាំងបង្រ្កាបបាតុកម្មដែរ។ ក៏ប៉ុន្តែ ទាហាន និងរថក្រោះ របស់ស៊ីរី នៅតែបន្តធ្វើការបាញ់ប្រហារទៅលើក្រុមបាតុករ បណ្តាលឲ្យមនុស្សស្លាប់ស្ទើរតែរាល់ថ្ងៃ។ បើយោងតាមមន្រ្តីអ.ស.ប. រហូតមកទល់ពេលនេះមានជនស៊ីវិលប្រមាណ ២ពាន់នាក់ហើយ ដែលបានបាត់បង់ជីវិតក្នុងការបង្រ្កាបបាតុកម្ម នៅស៊ីរី៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ