សហរដ្ឋអាមេរិក ៖ ម៉ូស្គូរំលោភសន្ធិសញ្ញាអាវុធនុយក្លេអ៊ែរទ្វេភាគី
សហរដ្ឋអាមេរិក បានចោទប្រកាន់រុស្ស៊ី ថាបានរំលោភសន្ធិសញ្ញាត្រួតពិនិត្យអាវុធ ឆ្នាំ១៩៨៧ ដោយបានធ្វើការសាកល្បងមីស៊ីល។ នេះបើតាមអ្នកទទួលខុសត្រូវអាមេរិក ដែលសុំមិនបញ្ចេញឈ្មោះ និងដែលបានអះអាងថា បានលើកយកបញ្ហាដ៏សំខាន់មួយនេះមកពិភាក្សាជាមួយរុស្ស៊ី ច្រើនដងមកហើយ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:០០
សហរដ្ឋអាមេរិកចង់ឃើញខ្លាំងណាស់ ថាក្នុងពេលបច្ចុប្បន្ននេះ រុស្ស៊ីគោរពតាមសន្ធិសញ្ញាឆ្នាំ ១៩៨៧ និងរំលាយអស់នូវអាវុធហាមឃាត់ទាំងអម្បាលម៉ានពីទឹកដី និងដែលគេអាចធ្វើការផ្ទៀងផ្ទាត់បាន។ វ៉ាស៊ីនតោន បានត្រៀមជាស្រេច បើកការចរចាជាន់ខ្ពស់ទ្វេភាគី ភ្លាមៗ ដើម្បីប្រាកដក្នុងចិត្តថារុស្ស៊ីពិតជាបានបំពេញកាតព្វកិច្ចតាមការតម្រូវ និងផ្តល់តម្លៃខ្ពស់ណាស់ដល់សន្ធិសញ្ញាត្រួតពិនិត្យអាវុធ ឆ្នាំ១៩៨៧ ទើបប្រធានាធិបតីអាមេរិកបានផ្ញើលិខិតមួយទៅសមភាគីរុស្ស៊ីលោក វា្លដេមៀ ពូទីន។
តាមការពិត រុស្ស៊ីបានសាកល្បងមីស៊ីល រំលោភសន្ធិសញ្ញា តាំងពីជាច្រើនខែមកហើយ ! កាលពីខែមករា ដើមឆ្នាំ វ៉ាស៊ីនតោនធ្លាប់បានបង្ហាញក្តីព្រួយបារម្ភជុំវិញបញ្ហាសាកល្បងមីស៊ីលនេះ ដោយបានត្រឹមគូសបញ្ជាក់ថា ម៉ូស្គូទំនងជាបានរំលោភសន្ធិសញ្ញាស្តីពីកម្លាំងនុយក្លេអ៊ែរអន្តរការ ចុះថ្ងៃទី ៨ ធ្នូ ១៩៨៧ រវាងសហរដ្ឋអាមេរិកនិងអតីតសហភាពសូវៀត។ ហើយបើតាមប្រភពព័ត៌មានញីវយ៉កថែមស៍ បានផ្តើមសាកល្បងមីស៊ីល តាំងពីឆ្នាំ២០០៨មកម្ល៉េះ។
សន្ធិសញ្ញាស្តីពីអាវុធនុយក្លេអ៊ែរអន្តរការនេះ ដំបូងឡើយជាកិច្ចព្រមព្រៀងរវាងសហរដ្ឋអាមេរិក និងសហភាពសូវៀត (មុននឹងក្លាយជាសន្ធិសញ្ញាពហុបក្ស ក្រោយការដួលរលំរបបសហភាពសូវៀត) បានចូលជាធរមាននៅថ្ងៃទី ១ មិថុនា ឆ្នាំ ១៩៨៨។ នៅក្នុងសន្ធិសញ្ញា ភាគីទាំងពីរ អាមេរិកនិងរុស្ស៊ី ត្រូវមានកាតព្វកិច្ច កាត់បន្ថយ ក្នុងរយៈពេលបីឆ្នាំ គិតចាប់ពីថ្ងៃដែលសន្ធិសញ្ញាមានសុពលភាពទៅ រាល់អាវុធមីស៊ីល គ្រប់ប្រភេទបាញ់ចេញពីដី ក្នុងរយៈចម្ងាយពី ៥០០ ទៅ ១០០០គីឡូម៉ែត្រ និងមីស៊ីសរយៈឆ្ងាយ ពី ១០០០ ទៅ ៥៥០០គ.ម.។ នេះបើតាមអង្គការសហប្រជាជាតិ។
អ្វីជាការកត់សម្គាល់ គឺអាមេរិកបានសង្ស័យពីការរំលោភសន្ធិសញ្ញាយូរហើយ ប៉ុន្តែការបង្ហើបព័ត៌មានចោទប្រកាន់រុស្ស៊ី ទើបតែធា្លក់មក ក្នុងខណៈដែលទំនាក់ទំនង សហរដ្ឋអាមេរិកនិងរុស្ស៊ី កំពុងតានតឹងខ្លាំងជាពិសេស ដោយមូលហេតុវិបត្តិនៅអ៊ុយក្រែន៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ