អត្ថបទចុះផ្សាយនៅថ្ងៃ ព្រហស្បតិ៍ 20 កញ្ញា 2012 - ព័ត៌មានទើបកែប្រើលើកចុងក្រោយ ថ្ងៃ ព្រហស្បតិ៍ 20 កញ្ញា 2012

លោកអូបាម៉ាទទួលជួបលោកស្រីអ៊ុង សានស៊ូជី និងដកទណ្ឌកម្មពីមេដឹកនាំភូមា

លោកស្រីអ៊ុង សានស៊ូជី ពេលជួបជាមួយលោកអូបាម៉ា នៅសេតវិមាន ថ្ងៃទី១៩ កញ្ញា ២០១២

REUTERS/Kevin Lamarque

ដោយ សេង ឌីណា

លោកស្រីអ៊ុង សានស៊ូជី ដែលកំពុងបំពេញទស្សនកិច្ច នៅសហរដ្ឋអាមេរិក ត្រូវបានលោកប្រធានាធិបតីអូបាម៉ា ទទួលជួបស្វាគមន៍នៅសេតវិមាន កាលពីថ្ងៃពុធម្សិលមិញ ក្រោយពីលោកស្រីបានទទួលមេដាយមាសពីសភាអាមេរិក។ រដ្ឋាភិបាលរបស់លោកអូបាម៉ាក៏បានប្រកាសផងដែរ អំពីការដកទណ្ឌកម្មចេញពីប្រមុខដឹកនាំភូមា។

សេចក្តីរាយការណ៍របស់ សេង ឌីណា

ស្តាប់ (01:28)

20/09/2012

កាលពីម្សិលមិញនេះ សហរដ្ឋអាមេរិក ទាំងសភា និងទាំងរដ្ឋាភិបាល បានរៀបចំទទួលស្វាគមន៍ លោកស្រីអ៊ុង សានស៊ូជី ដោយផ្តល់នូវកិត្តិយសដ៏ខ្ពង់ខ្ពស់បំផុត។ បន្ទាប់ពីបានទទួលមេដាយមាសពីសភាអាមេរិក នៅវិមានកាពីតូល លោកស្រីប្រមុខដឹកនាំបក្សប្រឆាំងភូមា និងជាជ័យលាភីរង្វាន់ណូបែលសន្តិភាព ត្រូវបានលោកប្រធានាធិបតីអូបាម៉ាទទួលជួបនៅក្នុងសេតវិមាន។

យោងតាមមន្រ្តីសេតវិមាន នៅក្នុងជំនួបជាមួយលោកស្រីអ៊ុង សានស៊ូជី កាលពីម្សិលមិញនេះ លោកអូបាម៉ាបានបញ្ជាក់ពីជំហររបស់អាមេរិក ដែលគាំទ្រការធ្វើកំណែទម្រង់នយោបាយ និងសេដ្ឋកិច្ច ព្រមទាំងជំរុញឲ្យមានការគោរពសិទ្ធិមនុស្សឲ្យបានពេញលេញនៅភូមា។

ស្របពេលនឹងការទទួលស្វាគមន៍ប្រមុខបក្សប្រឆាំងភូមាយ៉ាងអឹកអធិកនេះ រដ្ឋាភិបាលរបស់លោកអូបាម៉ាក៏មិនភ្លេចលើកសរសើរផងដែរ ដល់ប្រមុខដឹកនាំរដ្ឋាភិបាលភូមា ដែលបានធ្វើកំណែទម្រង់នយោបាយជាច្រើននាពេលកន្លងមក។

ក្រសួងហិរញ្ញវត្ថុអាមេរិកបានប្រកាសឲ្យដឹងថា អាមេរិកបានសម្រេចដកទណ្ឌកម្មចេញពីប្រមុខដឹកនាំភូមាចំនួន ២រូប គឺរួមមាន លោកប្រធានាធិបតី ថេន សេន (Thein Sein) និងប្រធានរដ្ឋសភា លោក ធូរ៉ា ស្វេម៉ាន់ (Thura Shwe Mann)។ ក្រសួងហិរញ្ញវត្ថុអាមេរិកបានបញ្ជាក់ នៅក្នុងសេចក្តីថ្លែងការណ៍របស់ខ្លួនថា ប្រមុខដឹកនាំភូមាទាំងពីររូបបានចាត់វិធានការសំខាន់ៗជាច្រើន ក្នុងការធ្វើកំណែទម្រង់ផ្នែកនយោបាយ និងសិទ្ធិមនុស្ស ហើយបង្វែរទិសរបបដឹកនាំភូមា ពីការកាន់អំណាចផ្តាច់ការ ឆ្ពោះទៅរកប្រជាធិបតេយ្យ និងសេរីភាព។

គួរបញ្ជាក់ថា នៅចុងខែនេះ លោកប្រធានាធិបតី ថេន សេន ក៏នឹងត្រូវធ្វើដំណើរទៅកាន់សហរដ្ឋអាមេរិកដែរ ដើម្បីទៅចូលរួមមហាសន្និបាតអ.ស.ប. នៅទីក្រុងញូវយ៉ក៕