ទោះជាមានការប្រើប្រាស់ប្រព័ន្ធតុលាការតែមេដឹកនាំសហជីពនៅតែបន្តយុទ្ធនាការទាមទារឡើងប្រាក់ខែកម្មករ ១៧៧ ដុល្លារ ចាប់ពីថ្ងៃ១៧កញ្ញា
មេដឹកនាំសហជីពកម្មករយ៉ាងហោចណាស់ ចំនួន ៤ បានថ្លែងការណ៍ ប្រកាសបន្តយុទ្ធនាការ ទាមទារឡើងប្រាក់ខែកម្មកររោងចក្រកាត់ដេរ ១៧៧ ដុល្លារ។ យុទ្ធនាការនោះ នឹងធ្វើឡើង ចាប់ពីថ្ងៃទី១៧កញ្ញាតទៅ តាមរយៈការជួបជុំតាមសហគ្រាសរោងចក្រកាត់ដេរ តែមិនមានការជួបជុំ ហែក្បួនតាមផ្លូវទេ។ ជាសេចក្តីប្រកាស បន្ទាប់ពីមានការប្រើប្រាស់ប្រព័ន្ធតុលាការ ដើម្បីកោះហៅមេដឹកនាំសហជីពកម្មករ ចូលឆ្លើយបំភ្លឺជាបន្តបន្ទាប់ កាលពីថ្ងៃទី១២កញ្ញា ក្នុងរឿងបាតុកម្ម កើតអំពើហិង្សា នៅផ្លូវវេងស្រេង កាលពីដើមឆ្នាំនេះ។
ចុះផ្សាយនៅថ្ងៃ៖
ស្តាប់ - ០២:៥៤
តំណាងសហព័ន្ធសហជីពកម្មករ បានចេញសេចក្តីថ្លែងការណ៍ចំហរ កាលពីថ្ងៃសៅរ៍ ទី១៣កញ្ញា គឺមួយថ្ងៃបន្ទាប់ពីមេដឹកនាំសហជីពកម្មករ លោក ប៉ាវ ស៊ីណា បានចូលឆ្លើយបំភ្លឺនៅតុលាការរាជធានីភ្នំពេញ ក្រោមបទចោទប្រកាន់ ក្នុងរឿងបាតុកម្ម កើតអំពើហិង្សា នៅផ្លូវវេងស្រេង កាលពីដើមខែមករា ឆ្នាំ២០១៤នេះ។
ក្នុងសំណុំរឿងនេះ លោក ជា មុនី ប្រធានសហជីពសេរីកម្មករ ត្រូវបានចៅក្រម ចេញដីកាកោះហៅ ឲ្យចូលឆ្លើយបំភ្លឺ នៅរសៀលថ្ងៃចន្ទ ទី១៥កញ្ញា។ រីឯលោកអាត់ធន់ត្រូវចូលតុលាការ នៅថ្ងៃ១៨កញ្ញា ក្នុងនាមជាជនជាប់ចោទ ក្នុងសំណុំរឿងបាតុកម្ម នៅផ្លូវវេងស្រេង កាលពីដើមឆ្នាំនេះ។
តាមសេចក្តីថ្លែងការណ៍ ការប្រើប្រាស់ប្រព័ន្ធតុលាការ ប្រឆាំងមេដឹកនាំសហជីពកម្មករ យ៉ាងហោចណាស់ ៦ រូប នៅពេលនេះ គឺដើម្បីដាក់សម្ពាធលើមេដឹកនាំសហជីព ក្នុងអំឡុងពេលរៀបចំធ្វើយុទ្ធនាការប្រាក់ឈ្នួល ហើយក៏ជាការគំរាមកំហែងផ្នែកស្មារតី និងបំបិទសិទ្ធិសេរីភាពសហជីពយ៉ាងធ្ងន់ធ្ងរ។ មេដឹកនាំសហជីព ក៏ចាត់ទុកថា វិធានការផ្លូវច្បាប់របស់តុលាការ នៅពេលនេះ ក៏ជាចេតនាយ៉ាងច្បាស់ ដើម្បីឲ្យមេដឹកនាំសហជីព បញ្ឈប់សកម្មភាពតវ៉ាប្រាក់ឈ្នលតទៅទៀត។
ប៉ុន្តែតាមរយៈសេចក្តីថ្លែងការណ៍ ដែលមានឈ្មោះមេដឹកនាំសហជីពតែ ៤ រូប បានបញ្ជាក់ថា សហជីពកម្មករ នៅតែបន្តយុទ្ធនាការ ទាមទារឲ្យនិយោជក រាជរដ្ឋាភិបាល និងអ្នកបញ្ជាទិញ ដំឡើងប្រាក់ឈ្នួល ១៧៧ ដុល្លារ ដល់កម្មកររោងចក្រកាត់ដេរ ឬប្រាក់ឈ្នួលសមរម្យ ដែលអាចទទួលយកបាន។ ជាគម្រោង យុទ្ធនាការទាមទារប្រាក់ឈ្នួល ១៧៧ ដុល្លារ ចាប់ផ្តើមធ្វើពីថ្ងៃទី១៧កញ្ញាតទៅ។
យុទ្ធនាការប្រាក់ឈ្នួល ១៧៧ ដុល្លារ នៅថ្ងៃទី១៧កញ្ញា ត្រូវបានលោក ប៉ាវ ស៊ីណា ប្រធានសម្ព័ន្ធសហជីពចលនាកម្មករ បានបញ្ជាក់ថា សម្ព័ន្ធសហជីពកម្មករទាំង ៨ នឹងជួបជុំជាមួយកម្មករ នៅជិត ៣០០ កន្លែង តាមសហគ្រាសរោងចក្រ ដោយពាក់អាវយឺត ១៧៧ ដុល្លារ ភ្ជាប់ដោយស្លាកសញ្ញាអ្នកបញ្ជាទិញល្បីៗ លើកបដា និងថ្លែងការណ៍ តែមិនដើរហែក្បួនតាមផ្លូវទេ។ ការជួបជុំនោះ នឹងធ្វើឡើងនៅពេលបាយថ្ងៃត្រង់ តែរយៈពេលប្រហែល ២០ នាទីប៉ុណ្ណោះ។
ជាការកត់សម្គាល់ មេដឹកនាំសហជីពកម្មករ យ៉ាងហោចណាស់ ៦ រូប ដែលបានចេញមុខ ដឹកនាំកម្មករ ទាមទារប្រាក់ខែគោល ១៦០ ដុល្លារ ចាប់ពីថ្ងៃទី២៤ ខែធ្នូ រហូតដល់ថ្ងៃទី៤ ខែមករា ឆ្នាំ២០១៤ រួមមាន លោកអាត់ធន់ លោករ៉ុងឈុន លោកជាមុនី លោកប៉ាវស៊ីណា លោកស្រី ម៉មញឹម និងលោកស្រីយ៉ាងសុភ័ណ្ឌ ជាមុខសញ្ញា ជាប់ចោទក្នុងរឿងដឹកនាំកម្មករ ធ្វើបាតុកម្ម កើតមានអំពើហិង្សា បិទផ្លូវ និងវាយបំផ្លាញទ្រព្យសម្បត្តិរោងចក្រកាត់ដេរ។ ប៉ុន្តែជាការឆ្លើយតប កងកម្លាំងសមត្ថកិច្ច ទាហាន ប៉ូលិស និងប៉េអឹម បានវាយ បាញ់បង្ក្រាប បណ្តាលឲ្យរបួស និងស្លាប់ យ៉ាងហោចណាស់ ៦ នាក់។ តែយ៉ាងណាក៏ដោយ សំណុំរឿងបាញ់សម្លាប់កម្មករ មិនត្រូវបានតុលាការ ចាត់ការទេ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ