សហជីពទាមទារតំលើងប្រាក់ខែកម្មករ ខណៈ GMACបង្ហាញពីការធ្លាក់ចុះនៃក្រុមហ៊ុនបញ្ជាទិញ
មេដឹកនាំសហជីពនឹងដឹកនាំការទាមទារដំឡើងប្រាក់ខែកម្មករឲ្យបាន ១៧៧ ដុល្លារ។ ការទាមទារនេះ នឹងធ្វើនៅថ្ងៃពុធទី១៧កញ្ញានេះ នៅតាមបណ្តារោងចក្រនានាទូទាំងប្រទេស។ ការប្រកាសគម្រោងទាមទារដំឡើងប្រាក់ខែនេះធ្វើឡើង ខណៈដែលសមាគមរោងចក្រកាត់ដេរកម្ពុជា (GMAC) បានឲ្យដឹងថា ការបញ្ជាទិញកំពុងធ្លាក់ចុះយ៉ាងខ្លាំង។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:៣២
មេដឹកនាំសហជីពកម្មករកម្ពុជា ចំនួន ១៨ បានប្រកាសប្រកាន់ជំហរថា នៅតែបន្តការតវ៉ា ទាមទារដំឡើងប្រាក់ខែកម្មករ ១៧៧ដុល្លា នៅថ្ងៃទី ១៧កញ្ញាស្អែកនេះ បើទោះបីជាមេដឹកនាំសហជីពកម្មករខ្លះ កំពុងជាប់បណ្តឹង ក្រោមការត្រួតពិនិត្យរបស់តុលាការក៏ដោយ។ ការទាមទារ នឹងចាប់ផ្តើមនៅវេលាម៉ោង ១២ថ្ងៃត្រង់ ម៉ោងសម្រាកពេលបាយ រយៈពេលប្រមាណជា ៣០នាទី ទៅមួយម៉ោង។
តាមលោក អាត់ ធន ប្រធានសហជីពប្រជាធិបតេយ្យកម្មករកាត់ដេរកម្ពុជា បានឲ្យដឹងថា កម្មករនៅតាមរោងចក្រ ក្នុងទីក្រុងភ្នំពេញ និងតាមបណ្តាខេត្ត ជាង ៣០០កន្លែង នឹងពាក់អាវយឺត មានស្លាកសញ្ញា ទាមទារប្រាក់ឈ្នួល ១៧៧ដុល្លារ លើកបដា និងថ្លែងការណ៍។ ការជួបជុំនោះ នឹងមិនមានការដើរហែក្បួនតាមផ្លូវទេ។ ហើយបន្ទាប់ពីការជួបជុំនេះ មេដឹកនាំសហជីព នឹងនាំយកសារថ្លែងពីទុក្ខលំបាកនៃប្រាក់ឈ្មួលតិច របស់កម្មករ ទៅជូនតំណាងស្ថានទូតនានា និងក្រសួងការងារ ដើម្បីពិនិត្យ និងដោះស្រាយបញ្ចប់។
ស្របពេលជាមួយគ្នានេះដែរ សមាគមរោងចក្រកាត់ដេរកម្ពុជា (GMAC) បានឲ្យដឹងថាការស្ទង់មតិរបស់ពួកគេតាមរយៈទូរស័ព្ទ ឬហៅថា Quick Survey ទៅលើរោងចក្រកាត់ដេរ ដែលជាសមាជិកចំនួន ២៤៧ បានបង្ហាញថា ៥០ភាគរយនៃសមាជិកទាំងនោះ មិនទទួលបានការបញ្ជាទិញគ្រប់គ្រាន់ សម្រាប់ផលិតកម្ម រហូតដល់ចុងឆ្នាំនេះនោះទេ។ GMAC និយាយថា បញ្ហានេះមកពីការតវ៉ា បាតុកម្ម កូដកម្មរបស់កម្មករជាបន្តបន្ទាប់។ ក្រុមហ៊ុនធំៗ ដែលកាត់បន្ថយការបញ្ជាទិញ រួមមាន Wall Mart, H&M, Levis’s, Adidas ជាដើម។
លោក កាំង ម៉ូនីកា អគ្គលេខាធិការរង GMAC បានឲ្យដឹងថា ដោយសារស្ថានការនៃការតវ៉ាទាមទារ ធ្វើកូដកម្ម បាតុកម្ម របស់មេដឹកនាំសហជីព និងកម្មករ នៅក្នុងឆ្នាំនេះ បានធ្វើឲ្យក្រុមហ៊ុនបញ្ជាទិញបាត់បង់ទំនុកចិត្ត រអារលែងចង់ឲ្យវិនិយោគនៅកម្ពុជាបន្តទៀត។
ច្រាលចោលការលើកឡើងនេះ លោកអាត់ ធន់ បាននិយាយថា ដោយសារតែរដ្ឋាភិបាល និងនិយោជក មិនព្រមដោះស្រាយបិទបញ្ចប់ការចរចារទាមទារតំលើងប្រាក់ឈ្មួលកម្មករឲ្យបានសមរម្យ ទើបក្រុមហ៊ុនវិនិយោគទាំងនោះ ពិចារណា ហើយក៏សម្រេចមិនបញ្ជាទិញបន្ត រហូតទាល់តែកម្មករកម្ពុជា ទទួលបានដំណោះស្រាយសមប្រកបមួយ។
លោក ហេង សួរ អ្នកនាំពាក្យក្រសួងការងារ និងបណ្តុះបណ្តាលវិជ្ជាជីវៈ បានលើកឡើងថា ភាគីរដ្ឋាភិបាល និយោជក និងសហជីព តែងតែជួបប្រជុំគ្នាជានិច្ច ដើម្បីពិភាក្សាពីបញ្ហាប្រាក់ខែកម្មករនេះ ដោយមានទាំងការសហការជាមួយអង្កការអន្តរជាតិខាងការងារ ILO ទៀតផង។ លោក ហេង សួរ បានបញ្ជាក់ថា ការតវ៉ាក្នុងក្របខណ្ឌច្បាប់ ជាសិទ្ធរបស់កម្មករ និងសហជីព ប៉ុន្តែការទាមទារប្រាក់ឈ្មួលច្រើនពេក អាចធ្វើឲ្យអ្នកវិនិយោគ ដកខ្លួនចេញ មិនបញ្ជាការទិញ ។ តាមលោក ហេង សួរ មានអ្នកវិនិយោគទុនមកច្រើន ទើបប្រាក់ឈ្មួលកម្មករ អាចកើនឡើង៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ