អ.ស.ប.ថាការបាញ់ទម្លាក់យន្តហោះម៉ាឡេស៊ីនៅអ៊ុយក្រែនអាចចាត់បញ្ចូលជាឧក្រិដ្ឋកម្មសង្រ្គាម
លោកស្រីណាវី ភីឡៃ (Navi Pillay) អគ្គស្នងការសិទ្ធិមនុស្សអ.ស.ប បានលើកឡើង នៅថ្ងៃចន្ទនេះថា ការបាញ់ទម្លាក់យន្តហោះរបស់ក្រុមហ៊ុន Malaysia Airlines នៅតំបន់ប៉ែកខាងកើតអ៊ុយក្រែន កាលពីថ្ងៃទី១៧កក្កដា អាចត្រូវចាត់បញ្ចូលជាឧក្រិដ្ឋកម្មសង្រ្គាម។ នៅថ្ងៃចន្ទនេះដែរ ប៉ូលិសហូឡង់ និងអូស្រ្តាលី បានព្យាយាមជាលើកទី២ ដើម្បីធ្វើដំណើរចូលទៅកាន់ទីតាំងធ្លាក់យន្តហោះ ដែលស្ថិតក្រោមការកាន់កាប់របស់ក្រុមឧទ្ទាមផ្តាច់ទឹកដី។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:១៩
នៅក្នុងសេចក្តីថ្លែងការណ៍នៅថ្ងៃចន្ទនេះ លោកស្រីណាវី ភីឡៃ បានធ្វើការថ្កោលទោស “ការបាញ់ទម្លាក់” យន្តហោះដឹកអ្នកដំណើររបស់ក្រុមហ៊ុន Malaysia Airlines នៅខាងកើតអ៊ុយក្រែន ដែលបណ្តាលឲ្យអ្នកដំណើរចំនួន ២៩៨ត្រូវបាត់បង់ជីវិត ដោយចាត់ទុកថាជា “ការរំលោភច្បាប់អន្តរជាតិ ដែលអាចចាត់បញ្ចូលជាឧក្រិដ្ឋកម្មសង្រ្គាម”។ លោកស្រីអគ្គស្នងការសិទ្ធិមនុស្សអ.ស.ប ក៏បានទាមទារផងដែរឲ្យមានការស៊ើបអង្កេតដោយឯករាជ្យ និងម៉ត់ចត់បំផុតទៅលើករណីនេះ។
ការទាមទារនេះត្រូវបានធ្វើឡើង នៅក្នុងពេលដែលដំណើរការស៊ើបអង្កេតលើករណីធ្លាក់យន្តហោះម៉ាឡេស៊ីនេះ កំពុងតែជួបនឹងបញ្ហាស្មុគស្មាញខ្លាំង ដោយសារតែទីតាំងដែលយន្តហោះធ្លាក់ ស្ថិតក្រោមការកាន់កាប់របស់ក្រុមឧទ្ទាមផ្តាច់ទឹកដី ហើយការវាយប្រយុទ្ធគ្នា រវាងទាហានរដ្ឋាភិបាលអ៊ុយក្រែន និងក្រុមឧទ្ទាមនៅតែកើតមាន នៅជុំវិញតំបន់នោះ ដែលជាហេតុធ្វើឲ្យក្រុមស៊ើបអង្កេតមិនអាចបំពេញការងាររបស់ខ្លួនបាន។ សូម្បីតែបំណែកសាកសពអ្នកដំណើរលើយន្តហោះក៏នៅមិនទាន់ត្រូវបានយកចេញអស់នៅឡើយដែរ រហូតមកទល់នឹងពេលនេះ។
កាលពីប៉ុន្មានថ្ងៃកន្លងទៅនេះ ហូឡង់ និងអូស្រ្តាលីបានជជែកគ្នា អំពីគម្រោងការណ៍បញ្ជូនកងកម្លាំងប្រដាប់អាវុធចូលទៅគ្រប់គ្រងកន្លែងធ្លាក់យន្តហោះ ក៏ប៉ុន្តែ ក្រោយមកបានលុបចោលគម្រោងនេះទៅវិញ ដោយបារម្ភខ្លាចផុងខ្លួននៅក្នុងសង្រ្គាមស៊ីវិលអ៊ុយក្រែន ជាពិសេស ដោយមើលឃើញថា ទីតាំងធ្លាក់យន្តហោះនេះស្ថិតនៅក្បែរនឹងព្រំដែនជាមួយរុស្ស៊ី។
ចុងក្រោយ កាលពីថ្ងៃអាទិត្យ ហូឡង់ និងអូស្រ្តាលី បានសម្រេចបញ្ជូនក្រុមប៉ូលិសដោយមិនបំពាក់អាវុធឲ្យចូលទៅកាន់ទីតាំងធ្លាក់យន្តហោះ មានក្រុមអ្នកសង្កេតការណ៍របស់អង្គការ OSCE អមដំណើរទៅជាមួយ។ ក៏ប៉ុន្តែ ធ្វើដំណើរបានពាក់កណ្តាលផ្លូវ ទាំងប៉ូលិសហូឡង់និងអូស្រ្តាលី និងទាំងក្រុមអ្នកសង្កេតការណ៍របស់ OSCE បានបកក្រោយមកវិញ ក្រោយពីឃើញមានការបាញ់ផ្លោងកាំភ្លើងធំ នៅក្បែរទីតាំងធ្លាក់យន្តហោះនេះ។ ពួកគេព្យាយាមម្តងទៀត នៅថ្ងៃចន្ទនេះ។ នេះបើយោងតាមការអះអាងរបស់អគ្គនាយករងនៃប៉ូលិសអូស្រ្តាលី។
គួរបញ្ជាក់ផងដែរថា បើយោងតាមរបាយការណ៍របស់អ.ស.ប គិតមកត្រឹមថ្ងៃទី២៦កក្កដានេះ ជម្លោះប្រដាប់អាវុធនៅតំបន់ខាងកើតអ៊ុយក្រែន បានបណ្តាលឲ្យមនុស្សយ៉ាងតិច ១១២៩នាក់ ត្រូវបាត់បង់ជីវិត និង ៣៤៤២នាក់ផ្សេងទៀតត្រូវរងរបួស។ អង្គការកាកបាទក្រហមអន្តរជាតិវិញបានកំណត់ជាផ្លូវការ កាលពីសប្តាហ៍មុនថា វិបត្តិនៅខាងកើតអ៊ុយក្រែននេះត្រូវចាត់បញ្ចូលជាសង្រ្គាមស៊ីវិល ដែលមានន័យថា ភាគីជម្លោះត្រូវតែគោរព អនុសញ្ញាក្រុងហ្សឺណែវ ស្តីពីច្បាប់សង្រ្គាម ហើយការរំលោភលើអនុសញ្ញានេះនឹងត្រូវចាត់ទុកជាឧក្រិដ្ឋកម្មសង្រ្គាម ដែលអាចត្រូវជំនុំជម្រះដោយតុលាការព្រហ្មទណ្ឌអន្តរជាតិក្រុងឡាអេ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ