ក្រុងម៉ូស្គូបញ្ចេញកំហឹងចំពោះការបាញ់ប្រហារនៅភាគខាងកើតអ៊ុយក្រែន
នៅភាគខាងកើតអ៊ុយក្រែន ថ្ងៃអាទិត្យនេះ ក្រុមអ្នកបះបោរគាំទ្ររុស្ស៊ីបានប្រាប់ថា មានមនុស្ស៤នាក់ បានស្លាប់ក្នុងការបាញ់ប្រហារមួយ នៅជិតក្រុងស្លាវីយ៉ង់ Slaviansk។ លោក Viatcheslav Ponomarev វីយ៉ាតឆេស្លាវ ប៉ូណូម៉ារេវ ដែលបានប្រកាសម្នាក់ឯងថា ខ្លួន ជាចៅហ្វាយក្រុងស្លាវីយ៉ង់នោះ បានដាក់ចេញបម្រាមគោចរ មិនអោយប្រជាជនចេញដើរពីពាក់កណ្តាលអាធ្រាត រហូតដល់ម៉ោង៦ព្រឹក។ ការបាញ់ប្រហារនេះកើតឡើង តែ៣ថ្ងៃប៉ុណ្ណោះ ក្រោយពេលអ៊ុយក្រែន សហភាពអឺរ៉ុប អាមេរិក និងរុស្ស៊ី ទើបបានសម្រេចកិច្ចព្រមព្រៀងបិទបញ្ចប់វិបត្តិអ៊ុយក្រែន។ រុស្ស៊ីបានបរិហារថា ក្រុមជាតិនិយមអ៊ុយក្រែន ជាអ្នកធ្វើការប្រហារជនស៊ីវិលស្លូតត្រង់។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៥០
នៅអ៊ុយក្រែន ថ្ងៃអាទិត្យនេះ ការបាញ់ប្រហារបានកើតឡើង នៅភាគខាងកើត ជិតក្រុងស្លាវីយ៉ង់ សម្លាប់មនុស្សជាច្រើននាក់។ អ្នកថតរូបសារព័ត៌មានបារាំង AFP អា អេហ្វ ប៉េ បានឃើញសាកសពសកម្មជនគាំទ្ររុស្ស៊ី២នាក់ ត្រូវបានគេដាក់ចូលក្នុងរថយន្តកាំម្ញ៉ុងតូចមួយ។ ប្រឈមនឹងអំពើហិង្សានេះ រដ្ឋមន្ត្រីមហាផ្ទៃអ៊ុយក្រែនបារម្ភខ្លាចមានការវាយលុកកើតឡើង ហើយបានចុះទៅភាគខាងកើតប្រទេស ដើម្បីត្រួតពិនិត្យកងការពារដែលដាក់ពង្រាយដើម្បីទប់ទល់នឹងការបះបោររបស់ក្រុមអ្នកផ្តាច់ទឹកដីនិយម នៅទីនោះ។
ការបាញ់ប្រហារនេះ ធ្វើអោយរដ្ឋាភិបាលរុស្ស៊ីខឹងសម្បារជាខ្លាំង និងបានបរិហារទំលាក់កំហុសការបាញ់ប្រហារនេះ ទៅលើក្រុមជាតិនិយមអ៊ុយក្រែន។ សម្រាប់រុស្ស៊ី ដែលទើបសម្រេចចេញកិច្ចព្រមព្រៀងបញ្ចប់វិបត្តិនយោបាយអ៊ុយក្រែន នៅពាក់កណ្តាលសប្តាហ៍នេះ ការបាញ់ប្រហារនេះ សបង្ហាញថាអាជ្ញាធរក្រុងគៀវ គ្មានបំណងល្អពេញលេញ ក្នុងការសម្រេចអោយក្រុមជាតិនិយម និងក្រុមជ្រុលនិយមដាក់អាវុធចុះបានទេ។ ក្រុមជាតិនិយមអ៊ុយក្រែនខាងផ្នែកច្បាប់ បានបដិសេធថាមិនបានបង្កការបាញ់ប្រហារនេះឡើយ ហើយបានទំលាក់ការទទួលខុសត្រូវទៅកងកម្លាំងពិសេសរុស្ស៊ីវិញ ដោយចោទថា ការបាញ់ប្រហារនេះជាការផ្គើនដាក់បណ្តាសា ពីសំណាក់រុស្ស៊ី ព្រោះវាធ្វើឡើងចំថ្ងៃអាទិត្យនេះ ជាថ្ងៃបុណ្យសាសនាគ្រិស្ត។
គួររំលឹកថា ក្នុងជំនួបចតុភាគីរវាងរុស្ស៊ី អ៊ុយក្រែន សហភាពអឺរ៉ុប និងអាមេរិក កាលពីថ្ងៃព្រហស្បតិ៍១៧មេសា កន្លងទៅ ភាគីទាំងអស់បានស្រុះស្រួលគ្នាសម្រេចបានកិច្ចព្រមព្រៀងមួយ។ ជាកិច្ចព្រមព្រៀងចែងដកហូតអាវុធពីក្រុមប្រដាប់អាវុធខុសច្បាប់ ដែលកំពុងធ្វើសកម្មភាពនៅអ៊ុយក្រែន ចែងបញ្ចប់ហិង្សា សកម្មភាពបង្ក្រាប រឺការបង្ករឿងពីគ្រប់ភាគី និងចែងមិនយកទោសពៃរ៍សកម្មជនគាំទ្ររុស្ស៊ី ដែលបានចូលរួមបះបោរ។ អង្គការសន្តិសុខនិងសហប្រតិបត្តិការអឺរ៉ុបជាអ្នកត្រួតពិនិត្យមើលការអនុវត្តន៍កិច្ចព្រមព្រៀងនេះ។
នៅថ្ងៃអាទិត្យនេះ អន្តរការីម្នាក់នៃអង្គការសន្តិសុខនិងសហប្រតិបត្តិការអឺរ៉ុប មានវត្តមាននៅក្រុងដូណេត ចំងាយប្រមាណ១០០គីឡូម៉ែត្រពីក្រុងស្លាវីយ៉ង់ដែលរងការបាញ់ប្រហារនេះ ដើម្បីព្យាយាមចរចារអោយក្រុមផ្តាច់ទឹកដីនិយមគាំទ្ររុស្ស៊ីដែលកំពុងកាន់កាប់អគារសាធារណៈនៅទីនោះ អោយយល់ព្រមដកថយ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ