តើភាគខាងកើតអ៊ុយក្រែនខុសពីគ្រីមេ យ៉ាងណា ?
ចុះផ្សាយនៅថ្ងៃ៖
ស្តាប់ - ០៤:៣១
វិបត្តិអ៊ុយក្រែន បានចូលដល់វគ្គតានតឹងថ្មី មួយដំណាក់ទៀត បន្ទាប់ពីកងកម្លាំងស្និទ្ធនឹងរុស្ស៊ីបានចូលកាន់កាប់អាគារនិងស្ថាប័នរដ្ឋ ក្នុងក្រុងធំៗភាគខាងកើតប្រទេស ជាមួយនឹងការទាមទារធ្វើប្រជាមតិសុំស្វ័យភាព និងផ្តាច់ខ្លួនចេញពីអំណាចកណ្តាលក្រុងគៀវ។ គឺដូចគ្នានឹងតំបន់ភាគខាងត្បូង គ្រីមេ ដែលទើបភ្ជាប់ខ្លួនទៅនឹងរុស្ស៊ី តាមរយៈប្រជាមតិកាលពីថ្ងៃទី ១៦មីនា។ ប្រឈមមុខនឹងការគំរាមកំហែងថ្មីនេះ រដ្ឋាភិបាលក្រុងគៀវ បានប្រកាសបើកប្រតិបត្តិការប្រឆាំងភេរវជន បញ្ជូនប៉ូលិសនិងទាហាន រថក្រោះទៅការពារភាគខាងកើត។រដ្ឋាភិបាល អ៊ុយក្រែន មិនអាចបណ្តោយឱ្យភាគខាងកើតរបូតបាត់ឡើយ តំបន់នេះមានទាំងទម្ងន់សេដ្ឋកិច្ច និងប្រជាជន។
ផ្ទុយពីតំបន់គ្រីមេ ដែលទើបភ្ជាប់ខ្លួននឹងអ៊ុយក្រែននៅឆ្នាំ១៩៥៤ បណ្តាជនអ៊ុយក្រែននៅភាគខាងកើត មានប្រវត្តិនិងចំណងរួមជាមួយក្រុងគៀវ តាំងពីយូរលង់ បើទោះបីជាដែនដីអ៊ុយក្រែនបានឆ្លងកាត់ចលនាពង្រីកបង្រួមព្រំដែនឥតឈប់ តាំងពីសតវត្សរ៍ទី១០មកក៏ដោយ។
► សូមអាន ៖ ពីបដិវត្តក្រុងគៀវ ទៅការសើរើប្រវត្តិគ្រីមេ
ទន្លេDniepr ដែលហូរកាត់ពីជើងទៅត្បូងប្រទេស ត្រូវបានគេប្រើជាគំនូសសម្រាប់បែងចែងភាគខាងកើត និងខាងលិច។ ភាគខាងកើតទន្លេ បានចូលស៊ុបក្រោមរណបចក្រភពរុស្ស៊ី តាំងពីសតវត្សរ៍ទី ១៧ ឯភាគខាងលិចជាអតីតចំណែកមួយរបស់ប៉ូឡូញ។ អ៊ុយក្រែនឯករាជ្យ មូលគ្នាខាងលិចនិងខាងកើត ទើបមានកំណើតនៅឆ្នាំ១៩១៨ មុននឹងបញ្ចូលខ្លួនជារដ្ឋសមាជិកសហភាពសូវៀត នៅឆ្នាំ១៩២២ (រយៈពេល៧០ឆ្នាំ)។
ប្រវត្តិសាស្ត្រដ៏ពុះកញ្ជ្រោល ព្រំដែនប្តូររំកិលជាញឹកញយ ការចងចាំប្រេះឆារវាងខាងកើតនិងខាងលិច មានប្រជាជនចម្រុះជាតិសាសន៍រស់លាយលំគ្នា ទាំងនេះបញ្ជាក់យ៉ាងច្បាស់អំពីចំណងវប្បធម៌និងអរិយធម៌ ភាសារបស់បណ្តាជនភាគខាងកើតជាមួយនឹងរុស្ស៊ី។ ប៉ុន្តែយ៉ាងណាក៏ដោយ ក៏បណ្តាជននៅដូណេស នៅខាគីវ … តំបន់និយាយភាសារុស្ស៊ី (១០%)មែន តែភាគច្រើនមានអារម្មណ៍ថាខ្លួនជាអ៊ុយក្រែន និងនិយាយភាសាអ៊ុយក្រែនជាយាន រស់ចម្រុះគ្នាជាមួយជាតិសាសន៍អាមេនី ហ្ស័កហ្ស៊ី ឬក្រិច ក្នុងនាមជាប្រជាជាតិអ៊ុយក្រែន មិនដូចនៅគ្រីមេ ដែលមានប្រជាជនភាគច្រើននិយាយភាសារុស្ស៊ីទេ។ ការស្ទង់មតិចុងក្រោយបង្ហាញថាប្រជាជននៅក្រុងដូណេស ៧០%ចង់ផ្ញើអនាគតលើអ៊ុយក្រែន។
ប៉ុន្តែលើផ្នែកនយោបាយវិញ ភាពប្រេះឆាមានខ្លាំង រវាងអ៊ុយក្រែនភាគកណ្តាល-ភាគខាងលិច និងអ៊ុយក្រែនភាគខាងត្បូងនិងខាងកើត។ តាំងពីបានឯករាជ្យមក ម្ខាងគាំទ្រនយោបាយស្និទ្ធនឹងអឺរ៉ុបខាងលិច ម្ខាងគាំទ្រអ្នកនយោបាយស្និទ្ធនឹងម៉ូស្គូ។ បដិវត្តលឿងទុំឆ្នាំ២០០៤-២០០៥ បានបង្កើនលឿនខិតចូលជិតលោកខាងលិច តែក៏បានធ្វើប្រជាជនចាប់ផ្តើមបែងចែងគ្នាខ្លាំងអំពីអនាគតរបស់អ៊ុយក្រែន ៖ ខាងកើតមើលឃើញរុស្ស៊ីជាប្រទេសអាចធានាស្ថិរភាពឱ្យអ៊ុយក្រែនបាន តែខាងលិចគិតថារុស្ស៊ីកំពុងប្រើអំណាចចក្រភព គ្រប់គ្រងនិងកាច់ចង្កូតអ្នកនយោបាយអ៊ុយក្រែន។ មេដឹកនាំនយោបាយក៏បានឆ្លៀតយកគម្លាតនយោបាយនេះ មកបែងចែកកាន់តែច្បាស់រវាងលិចនិងកើត។
ចំពោះវិស័យសេដ្ឋកិច្ចវិញ នៅគ្រីមេ មានប្រជាជនសរុបរស់នៅជិតពីរលាននាក់ រស់ពឹងលើវិស័យទេសចរណ៍ និងសកម្មភាពសមុទ្ទនៅកំពង់ផែសេបាស្តូប៉ូល។ ឯតំបន់ភាគខាងកើតនិយាយភាសារុស្ស៊ីវិញ មានមនុស្សរស់នៅជិត៥លាននាក់ (ស្មើនឹងមួយភាគ១០នៃបណ្តាជនអ៊ុយក្រែនសរុប) ជាមួយនឹងដង់ស៊ីតេប្រជាជនយ៉ាងខ្ពស់ ជាតំបន់ឧស្សាហកម្មសំបូរបែប សម្បូរដោយធនធានធម្មជាតិ ធ្យូងថ្ម រ៉ែដែក ដែកថែប ធ្វើឱ្យជីវភាពប្រជាជនតំបន់នេះខ្ពស់ជាងគេបង្អស់ បើប្រៀបទៅប្រជាជនអ៊ុយក្រែនទាំងមូល។ មានឯកទេសផ្នែក ឧស្សាហកម្ម តាំងពីសតវត្សរ៍ទី ១៨មក ផលិតផលឧស្សាហកម្មនៅភាគខាងកើតអ៊ុយក្រែន តំណាងឱ្យ២០%នៃនាំចេញរបស់ប្រទេស ដែលអាចបំពេញប៉ះប៉ូវគ្នាបានទាំងស្រុងជាមួយនឹងអ៊ុយក្រែនភាគខាងលិច និងកណ្តាលជាតំបន់កសិកម្ម។
►សូមអាន ៖ នាយករដ្ឋមន្រ្តីអ៊ុយក្រែនទៅភាគខាងកើត ដើម្បីបញ្ចុះកម្តៅ
ប៉ុន្តែតាំងពីអតីតប្រធានាធិបតីស្និទ្ធនឹងរុស្ស៊ី វិចទ័រ យ៉ាណូកូវិច បានធ្លាក់ចេញពីតំណែង (ថ្ងៃទី ២២កុម្ភៈ២០១៤) ភាគខាងកើតបានក្លាយជាឆាកល្ខោននៃការបះបោរប្រឆាំងនឹងរដ្ឋាភិបាលក្រុងគៀវថ្មី ជារៀងរាល់សប្តាហ៍។ មូលហេតុនៃបាតុកម្មគឺ មកពីការព្រួយបារម្ភច្រើន ម្យ៉ាងដោយសារការឃោសនារបស់រុស្ស៊ី តាមប្រព័ន្ធឃោសនាព័ត៌មានដែលមានឥទ្ធិពលខ្លាំងក្នុងតំបន់នេះ ម្យ៉ាងមកពីមិនទុកចិត្តនឹងអំណាចកណ្តាលក្រុងគៀវ ព្រមទាំងខ្វល់ខ្វាយអំពីផលវិបាកសេដ្ឋកិច្ច ប្រសិនបើអ៊ុយក្រែនចូលស្និទ្ធនឹងសហភាពអឺរ៉ុប។ តាមការពិតបណ្តាជនភាគខាងកើតក៏បានចូលរួមធ្វើបាតុកម្មនៅទីលានម៉ៃដាន ដើម្បីប្រឆាំងនឹងអំពើពុករលួយរបស់រដ្ឋាភិបាលលោក យ៉ាណូកូវិចដែរ។ អ្នកវិភាគខ្លះយល់ថា មកពីអាជ្ញាធរថ្មីអ៊ុយក្រែន ធ្វេសប្រហែសទុកតំបន់ខាងកើតដ៏ផុយស្រួយចោលយូរពេក ទើបធ្វើឱ្យការប្រេះឆាកាន់តែរីកខ្លាំងដូច្នេះ។ ព្រោះសូមជម្រាបថា គេត្រូវរង់ចាំដល់ថ្ងៃទី ១១មេសា ទើបឃើញតំណាងរដ្ឋាភិបាលថ្មីអ៊ុយក្រែនទៅបំពេញទស្សនកិច្ចនៅក្រុងដូណេស។ រដ្ឋាភិបាលបណ្តោះអាសន្នហាក់បានទទួលស្គាល់ថាភាគខាងកើតមិនមែនជាដែនអំណាចសម្រាប់ប្រមូលសំឡេងឆ្នោត។ ឥឡូវស្ថានភាពកាន់តែធ្ងន់ធ្ងរ គឺការបោះឆ្នោតនេះតែម្តងដែលកំពុងអាចរងគ្រោះថ្នាក់៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ