អ៊ុយក្រែនអះអាងថាចាប់បានរថក្រោះរុស្ស៊ីពីរគ្រឿង
អ៊ុយក្រែនបានអះអាងថាទាហានខ្លួនបានចាប់បានរថក្រោះរបស់រុស្ស៊ីពីរគ្រឿង ដែលនៅក្នុងនោះមានផ្ទុកឯកសារជាច្រើន ដែលបញ្ជាក់យ៉ាងច្បាស់ ថារថក្រោះទាំងនោះ ជារបស់ទាហានរុស្ស៊ី។ ភាគីរុស្ស៊ីបានទាត់ចោលការចោទប្រកាន់នេះ ដោយបញ្ជាក់ម្តងហើយម្តងទៀតថា គ្មានទាហានរុស្ស៊ីនៅក្នុងដីអ៊ុយក្រែនទេ ហើយថាអ៊ុយក្រែនបានប្រឌិតរឿងនេះទាំងស្រុង ដើម្បីទម្លាក់កំហុសលើរុស្ស៊ី។
ចុះផ្សាយនៅថ្ងៃ៖
ស្តាប់ - ០១:៤៣
យោងតាមការរាយការណ៍របស់អ្នកនាំពាក្យយោធាអ៊ុយក្រែន ទាហានអ៊ុយក្រែនបានចាប់បានរថក្រោះពីរគ្រឿងរបស់រុស្ស៊ី ដែលទាហានរុស្ស៊ីបានបោះបង់ចោល ហើយរត់គេចខ្លួនយ៉ាងតក់ក្រហល់ ក្នុងពេលមានការបាញ់តបតគ្នា នៅតំបន់មួយក្បែរក្រុងលូហ្គង់ស្គ៍។ អ៊ុយក្រែនបានអះអាងថា រថក្រោះទាំងនោះជារបស់កងទ័ពឆ័ត្រយោងរុស្ស៊ី។ នៅក្នុងរថក្រោះនោះមាន ឯកសារជាច្រើនដែលបញ្ជាក់ថារថក្រោះនោះជារបស់រុស្ស៊ី ដូចជា សម្ពាយរបស់ពួកទាហាន ដែលក្នុងនោះមានលិខិតឆ្លងដែនរុស្ស៊ី បណ្ណធនាគារ និងបទបញ្ជាទូទៅរបស់កងវរសេនាតូចឆ័ត្រយោងរុស្ស៊ី។
ទោះជាយ៉ាងណា រុស្ស៊ីបានច្រានចោលពត៌មាននេះទាំងស្រុង។ លោករដ្ឋមន្ត្រីក្រសួងការពារជាតិរុស្ស៊ី ថែមទាំងបានចំអកឲ្យអ៊ុយក្រែនទៀតថា វាមិនដែលទាហានឯណាទុកឯកសារសំខាន់ៗ ដ៏សន្ធឹកសន្ធាប់យ៉ាងនេះចោលនោះទេ។ លោកបន្តថា ឯកសារដែលអ៊ុយក្រែនអះអាង ថាបានរកឃើញនោះ សុទ្ធសឹងជាឯកសារចាស់ៗ ដែលគេលែងប្រើប្រាស់ជាង៥ឆ្នាំទៅហើយ។ លោកបានចោទអ៊ុយក្រែនថាបានប្រឌឹតពត៌មានទាំងនេះឡើង ដោយចង់ដាក់បន្ទុកទៅលើរុស្ស៊ី ថាបានជួយគាំទ្រពួកឧទ្ទាមបះបោរ។
បើសិនពត៌មាននេះជាការពិតមែន នេះជាលើកទីមួយហើយ ដែលមានភស្តុតាងច្បាស់លាស់ បញ្ញាក់អំពីវត្តមានរបស់ទាហានរុស្ស៊ីក្នុងទឹកដីអ៊ុយក្រែន ដែលមកជួយប្រយុទ្ធពួកក្រុមឧទ្ទាមបះបោរផ្តាច់ទឹកដីនៅភាគខាងកើតអ៊ុយក្រែន។ ប្រទេសលោកខាងលិចស្ទើរតែទាំងអស់សង្ស័យយ៉ាងខ្លាំងថា រុស្ស៊ីអាចពិតជាបានបញ្ជូនសញ្វាវុធ និងកម្លាំងយោធាចូលមកក្នុងទឹកដីអ៊ុយក្រែនពិតប្រាកដមែន។
កាលពីសប្តាហ៍មុន មេដឹកនាំក្រុមឧទ្ទាមបះបោរម្នាក់បានបង្ហោះវីដេអូមួយ បង្ហាញថាខ្លួនបានទទួលនូវកម្លាំងទ័ពចំនួន១២០០នាក់ ដែលទើបវិលត្រឡប់ពីវគ្គបណ្តុះបណ្តាលនៅរុស្ស៊ី ព្រមទាំងរថក្រោះចំនួនជាង១០គ្រឿងទៀតផង។ ពត៌មាននេះត្រូវបានអ្នកនាំពាក្យរដ្ឋាភិបាលអ៊ុយក្រែនអះអាងថាជាការពិតមែន។ ដោយឡែក យោងតាមពត៌មានរាយការណ៍ចុងក្រោយ បានឲ្យដឹងថា ក្រុមទាហានការពារព្រំដែន និងអ្នកតំណាងអង្គការកាកបាទក្រហមបានចាប់ផ្តើមធ្វើការត្រួតពិនិត្យរថយន្តដឹកជំនួយមនុស្សធម៌រុស្ស៊ីទាំង៣០០គ្រឿងនោះហើយ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ