កិច្ចព្រមព្រៀងការទូត ៖ រុស្ស៊ីតួឯកខាងធ្វើព្យុះធ្វើភ្លៀងក្នុងវិបត្តិអ៊ុយក្រែន
ចុះផ្សាយនៅថ្ងៃ៖
ស្តាប់ - ០៥:៤៦
ខុសពីការគិតទុក ជំនួបប្រជុំចតុភាគីស្តីពីវិបត្តិអ៊ុយក្រែន នៅ ទីក្រុងហ្សឺណែវ ម្សិលមិញ បានបិទបញ្ចប់ទៅជាមួយ នឹងកិច្ចព្រមព្រៀងការទូតមួយ ដើម្បីសាកល្បងទម្លាយវិបត្តិនៅភាគខាងកើតអ៊ុយក្រែន។ សហរដ្ឋអាមេរិក សហភាពអឺរ៉ុប រុស្ស៊ី និងអ៊ុយក្រែនផ្ទាល់ បានចុះហត្ថលេខាលើកឯកសារ ដែលមានចែងអំពីផែនការដោះស្រាយវិបត្តិឱ្យភាគខាងកើតអ៊ុយក្រែនជាដំណាក់ៗ។ បើទោះបីមានចំណុចស្រពិចស្រពិលច្រើនក្តី ក៏នេះជាការវិវឌ្ឍន៍ដ៏សំខាន់មួយ និងដែលគ្មាននរណានឹងស្មានដល់សោះ។
កិច្ចព្រមព្រៀងការទូតនេះ គ្រោងនឹង ៖
- ទម្លាក់ និងដកហូតអាវុធ ចេញពីក្រុមប្រដាប់អាវុធខុសច្បាប់ដែលកំពុងមានសកម្មភាពនៅអ៊ុយក្រែន។ ក្រុមនេះត្រូវចាកចេញពីតំបន់កាប់កាប់ស្ថាប័នសាធារណៈ។ បើតាមក្រុងគៀវ ជនប្រដាប់អាវុធគ្មានឯកសណ្ឋាន គ្មានអាំងស៊ីង ឬសញ្ញាអត្តសញ្ញាណក្រុមនេះ ជាកងទ័ពពិសេសរុស្ស៊ី តែលោកប្រធានាធិបតីពូទីន បានបដិសេធជាថ្មី ក្នុងពេលឆ្លើយឆ្លងជាមួយប្រជាជនម្សិលមិញ។
- បញ្ចប់សកម្មភាពហិង្សា សកម្មភាពបង្ក្រាប ឬទង្វើបង្ករឿង ពីគ្រប់ភាគី។
- មិនយកទោសពៃរ៍បាតុករអ្នកគាំត្ររុស្ស៊ី ដែលបានចូលរួមធ្វើការបះបោរ លើកលែងតែអ្នកដែលមានទោសឧក្រិដ្ឋ។
- បេសកកម្មត្រួតពិនិត្យ ការគោរពកិច្ចព្រមព្រៀង ត្រូវប្រគល់ទៅឱ្យអង្គការសន្តិសុខ និងសហរប្រតិបត្តិការអឺរ៉ុប (អូសេដេអឺ)
ក្នុងដំណាក់កាលទីពីរ នឹងមានការពិគ្រោះនយោបាយ ទាក់ទងនឹងការបោះឆ្នោតប្រធានាធិបតីអ៊ុយក្រែនថ្ងៃទី ២៥ឧសភា និងការធ្វើកំណែទម្រង់រដ្ឋធម្មនុញ្ញ ត្រង់ទំនាក់ទំនងក្រុងគៀវ និងតំបន់ផ្សេងៗទៀតរបស់អ៊ុយក្រែន។ ប៉ុន្តែលោកប្រមុខការទូតរុស្ស៊ី បានលម្អិតចំណុចនេះទេ ព្រោះជាផ្លូវការម៉ូស្គូមិនទទួលរដ្ឋាភិបាលក្រុងគៀវបច្ចុប្បន្នឡើយ។
ប៉ុន្តែករណីទាហានរុស្ស៊ីដែលកំពុងប្រមូលផ្តុំគ្នានៅតាមព្រំដែន មិនត្រូវបានលោក ឡាវ្រូស លើកមកបំភ្លឺទេ។ ឯកាលបរិច្ឆេទ និងការកំណត់ពេលវេលាគោរពកិច្ចព្រមព្រៀង ក៏គ្មានសរសេរក្នុងអត្ថបទព្រមព្រៀងការទូតម្សិលមិញដែរ។
សហរដ្ឋអាមេរិក សហភាពអឺរ៉ុប គំរាម រៀបចំទណ្ឌកម្ម សម្រាប់ដាក់ប្រឆាំងនឹងរុស្ស៊ី ក្នុងករណីកិច្ចព្រមព្រៀងបរាជ័យ
ម្សិលមិញ លោកប្រមុខការទូតអាមេរិក បានប្រកាសថាចង់ឃើញលទ្ធផលឆាប់ៗ ពីពេលនេះដល់ដើមសប្តាហ៍ក្រោយ បើពុំនោះទេសហរដ្ឋអាមេរិកនឹងចាត់វិធានការថ្មី ពោលគឺដាក់ទណ្ឌកម្មបន្ថែមលើរុស្ស៊ី។
ទាំងសហភាពអឺរ៉ុប ទាំងសហរដ្ឋអាមេរិក សុទ្ធតែអបអរនឹងការរកឃើញកិច្ចព្រមព្រៀង។ ប៉ុន្តែ ក៏គ្មាននរណាម្នាក់ច្បាស់លាស់ក្នុងចិត្តថាកិច្ចព្រមព្រៀងចុះ ហត្ថលេខាហើយនោះ នឹងត្រូវអនុវត្តបាន។
ក្រោយការប្រកាសថាមានកិច្ចព្រមព្រៀងភ្លាម ក្រុមបះបោរចង់ផ្តាច់ទឹកដីស្និទ្ធនឹងរុស្ស៊ី នៅភាគខាងកើតអ៊ុយក្រែន បានស្រែកភ្លាមថាមិនចាកចេញពីស្ថាប័នសាធារណៈដែលពួកគេបានចូលកាន់កាប់ក្នុងក្រុងជាង១០នៅភាគខាងកើតទេ ដរាបណាក្រុមបាតករប្រដាប់អាវុធ នៅទីលានម៉ៃដាន ក្រុងគៀវ មិនរំសាយជំរំ ពីទីលានឯករាជ្យកណ្តាលរដ្ឋធានីទេនោះ។ មន្ទីរសាធារណៈ ស្ថាប័នរដ្ឋ នៅតែបន្តកាន់កាប់ដោយក្រុមអ្នកបះបោរគាំទ្ររុស្ស៊ីជានិច្ចនៅព្រឹកនេះ។ ចំណែកខាងគៀវ ក៏មិនព្រមបញ្ឈប់យុទ្ធនាការប្រឆាំងនឹងភេរវជនដែរ។
ហេតុដូច្នេះហើយបានជា លោកអូបាម៉ា និងលោកហ្វ្រង់ស័រ ហូឡង់ រក្សាភាពប្រយ័ត្នប្រយែងខ្លាំង ! ត្រូវតែរក្សាគំនាប ប្រកាសថានឹងអាចមានទណ្ឌកម្មថ្មី ពីអាមេរិក និងពីសហភាពអឺរ៉ុប ប្រឆាំងរុស្ស៊ីប្រសិនបើកិច្ចព្រមព្រៀងត្រូវជួបបរាជ័យ។
រុស្ស៊ីកំពុងចង់ដើរតួជាអ្នកដោះស្រាយវិបត្តិអ៊ុយក្រែន
រុស្ស៊ីមានពាក់ព័ន្ធនឹងអ៊ុយក្រែនខ្លាំងណាស់ ! ដូចយើងបានដឹងស្រាប់តាំងពីដំបូងមកហើយ អ៊ុយក្រែនធ្លាប់ស្ថិតក្រោមឥទ្ធិពលរុស្ស៊ី និងអតីតសហភាពសូវៀត អស់រាប់សតវត្សរ៍។ បណ្តាជនអ៊ុយក្រែនមួយភាគក៏និយាយភាសារុស្ស៊ី។ រុស្ស៊ី មិនដែលគិតបោះបង់ដែនអំណាចនៅអ៊ុយក្រែនម្តងណាឡើយ គឺអ៊ុយក្រែនទេ ដែលខំត្រដរដកខ្លួន ខិតមករកអឺរ៉ុប។ ការរេចិត្តមករកអឺរ៉ុប ដែលនាំដល់ការផ្ទុះវិបត្តិអ៊ុយក្រែនឡើង។
►សូមអាន ៖ ភាគខាងកើតខុសពី គ្រីមេ យ៉ាងណា ?
បន្ទាប់ពីគ្រីមេ ឥឡូវដល់ខាងកើតម្តង មហិច្ឆតារបស់ម៉ូស្គូ ពិតជាពិបាកបញ្ឈប់ណាស់ ប៉ុន្តែភាគខាងកើតមិនដូចភាគខាងត្បូងគ្រីមេទេ មិនអាចបញ្ជូនទ័ពចូលទឹកដីអ៊ុយក្រែនជារដ្ឋឯករាជ្យបានឡើយ ព្រោះអាចត្រូវគេចោទថាឈ្លានពានចំៗ ! ហើយបើកាត់យកមករណបទាំងពីរ ប្រាកដធ្ងន់កខ្លាំងផ្នែកថវិកា។ អ៊ីចឹងហើយបានជារុស្ស៊ីចង់ឃើញអ៊ុយក្រែនមានរដ្ឋសហព័ន្ធ ទើបងាយជះឥទ្ធិពល ងាយគ្រប់គ្រង។ ដើម្បីសម្រេចកម្មវត្ថុនេះបាន រុស្ស៊ី មិនបាច់ប្រើកម្លាំងបាយទេ កិច្ចព្រមព្រៀងក្រុងហ្សឺណែវ អាចជាធ្នាក់ដ៏ប្រសើរ សម្រាប់ធ្វើព្យុះធ្វើភ្លៀងលើក្រុងគៀវ និងដាក់សម្ពាធលើដៃគូបស្ចឹមលោក ធ្វើយ៉ាងណាឱ្យអ៊ុយក្រែនស្គាល់អស្ថិរភាព រដ្ឋាភិបាលក្រុងគៀវមានចំណុចខ្សោយ គ្មានសមត្ថភាពគ្រប់គ្រងប្រទេស ដែលទីបញ្ចប់ត្រូវគ្មានជម្រើសអ្វីត្រូវគោរពតាមផែនការរុស្ស៊ី។
អឺរ៉ុប នៅតែអះអាងដដែលថាមិនបោះបង់អ៊ុយក្រែនទេ ព្រមទាំងជួយគាំទ្រទាំងផ្នែកសេដ្ឋកិច្ចហិរញ្ញវត្ថុ និងនយោបាយ។ ប៉ុន្តែសហភាពអឺរ៉ុបខ្សោយ នៅចំពោះមុខការប្រើកម្លាំង និងយុទ្ធសាស្ត្របង្កអស្ថិរភាពរបស់រុស្ស៊ី។ រុស្ស៊ីរបស់លោកពូទីន ដែលមានគោលការណ៍នយោបាយការបរទេសថ្មី តាំងខ្លួនបានសម្រេច ជាអ្នកការពារ ប្រជាជនរុស្ស៊ី អ្នកនិយាយភាសារុស្ស៊ី ទោះនៅទីណាក៏ដោយ។ ពូទីនកំពុងលុបលាង ប្រវត្តិសាស្ត្រនៃការរលំរលាយសហភាពសូវៀតដ៏អាម៉ាសកាលពី២០ឆ្នាំមុន ដោយធ្វើឱ្យរុស្ស៊ី មានមោទនភាពឡើងវិញ។ ដំណាក់កាលទីមួយដែលនាំរុស្ស៊ីឡើងឆាកអន្តរជាតិគឺស៊ីរី ទីពីរគឺអ៊ុយក្រែន។ ចុះតើនរណាជាទីបី និងជាទីបន្តបន្ទាប់ ?!
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ