សហភាពអឺរ៉ុបបើកទីផ្សារការងារដល់ពលរដ្ឋរូមានី និងប៊ុលហ្ការី
ចុះផ្សាយនៅថ្ងៃ៖
ស្តាប់ - ០៤:០៨
ចាប់ពីថ្ងៃ១មករា ឆ្នាំថ្មី ២០១៤នេះ ប្រជាពលរដ្ឋរូម៉ានី និងប៊ុលហ្ការីមានសិទ្ធិបំពេញការងារ នៅក្នុងគ្រប់ប្រទេសទាំងអស់នៃសហភាពអឺរ៉ុប។ ប្រទេសទាំងពីរចូលជាសមាជិកសហភាពអឺរ៉ុប តាំងពីឆ្នាំ២០០៧ម្ល៉េះ។ វិធានការថ្មីអនុញ្ញាតអោយពលរដ្ឋរូម៉ានី និងប៊ុលហ្ការី បានចូលធ្វើការគ្រប់ទីកន្លែងក្នុងសហភាពអឺរ៉ុប ធ្វើអោយប្រទេសមួយចំនួន បែបយ៉ាងអង់គ្លេស និងអាល្លឺម៉ង់ មានការព្រួយបារម្ភ ពីលំហូចូលលើសលុបនៃជនអន្តោប្រវេសន៍ប្រទេសទាំងពីរក្នុងទឹកដីខ្លួន និងការឈ្លានពានរបស់ពួកគេ ក្នុងទីផ្សារការងារជាតិខ្លួន។
នៅថ្ងៃ១មករា ឆ្នាំ២០១៤នេះ សហភាពអឺរ៉ុបបានបើកទ្វារទីផ្សារការងារអោយដល់ប្រជាពលរដ្ឋប្រទេសរូម៉ានី និងប៊ុលហ្ការី។ រូម៉ានី និងប៊ុលហ្ការី ជាសមាជិកសហភាពអឺរ៉ុប តាំងពីឆ្នាំ២០០៧ម្ល៉េះ។
ប៉ុន្តែ ចាប់ពីឆ្នាំ២០០៧មក យោងតាមមាត្រា៤៨នៃសន្ធិសញ្ញាអឺរ៉ុប សហភាពអឺរ៉ុបមិនទាន់បើកទីផ្សារការងារចំហរដល់ប្រទេសទាំងពីរនោះទេ។ រូម៉ានី និងប៊ុលហ្ការី ត្រូវរង់ចាំរយៈពេលបណ្តោះអាសន្នមួយ ដើម្បីអាចអោយពលរដ្ឋខ្លួនបានចូលទៅធ្វើការ ក្នុងគ្រប់បណ្តាប្រទេសសមាជិកសហភាពអឺរ៉ុប។ បណ្តាប្រទេសសមាជិកចាស់ៗនៃសហភាពអឺរ៉ុប បារម្ភខ្លាចលំហូចូលនៃពលរដ្ឋរូម៉ានី និងប៊ុលហ្ការី ក្នុងទឹកដីខ្លួន អាចបង្កជាភាពតានតឹងក្នុងទីផ្សារការងារ។ ប្រទេសចំនួន៩បានដាក់កំហិតអោយពលរដ្ឋរូម៉ានី និងប៊ុលហ្ការី រង់ចាំ៧ឆ្នាំ មុននឹងមានសិទ្ធិចូលមកធ្វើការក្នុងទឹកដីខ្លួន។ ប្រទេសទាំង៩នោះ មានបារាំង អង់គ្លេស អាល្លឺម៉ង់ អូទ្រីស បែលហ្ស៊ិក អេស្ប៉ាញ លុចសំបួរ ម៉ាល់ត៍ និងហូឡង់។
ដោយឡែក ប្រទេសសមាជិកសហភាពអឺរ៉ុប១៧ផ្សេងទៀត ដូចជា អ៊ីតាលី រឺក៏ស៊ុយអែត មិនបានរង់ចាំដល់ថ្ងៃ១មករា ឆ្នាំ២០១៤ទេ។ ប្រទេសទាំងនោះដាក់កំហិតអោយរូម៉ានីនិងប៊ុលហ្ការី រង់ចាំតែ២ឆ្នាំ រឺក៏៥ឆ្នាំប៉ុណ្ណោះ។ ច្រើនឆ្នាំមកនេះ ពលរដ្ឋរូម៉ានី និងប៊ុលហ្ការី បានចូលធ្វើការក្នុងទឹកដីប្រទេសភាគច្រើននៅអឺរ៉ុបរួចមកហើយ។
ថ្វីបើនៅថ្ងៃ១មករា ឆ្នាំ២០១៤នេះ គ្រប់ប្រទេសជាសមាជិកសហភាពអឺរ៉ុប បានបើកទ្វារទីផ្សារការងារចំហ១០០ភាគរយដល់ពលរដ្ឋប្រទេសទាំងពីរនេះក្តី ក្នុងប្រទេសមួយចំនួន ដូចជាអាល្លឺម៉ង់ រឺក៏អង់គ្លេស ភាពចម្រូងចម្រាសជុំវិញបញ្ហានេះ នៅតែបន្តកើតមាន ព្រោះអ្នកនយោបាយជាច្រើនរូប នៅបារម្ភខ្លាចពលរដ្ឋរ៉ូម៉ានី និងប៊ុលហ្ការី ចូលមកឈ្លានពានទីផ្សារការងារប្រទេសខ្លួន។
កន្លងមក នៅអង់គ្លេស សមាជិកគណបក្សអភិរក្សនិយមធ្លាប់បានជំរុញអោយនាយករដ្ឋមន្ត្រីដាវីដ ខាំម៉ឺរូន លើកពេលការបើកទ្វារទីផ្សារការងារអោយដល់ប្រទេសទាំងពីរនេះ។ នៅអាល្លឺម៉ង់ឯណោះវិញ គណបក្សអភិរក្សនិយមជាដៃគូរបស់ប្រមុខដឹកនាំ អាន់ហ្កឺឡា មែរគេល បានធ្វើព្យុះភ្លៀងប្រឆាំងនឹងការដែលអាល្លឺម៉ង់បានបើកទីផ្សារការងារអោយដល់ពលរដ្ឋរូម៉ានី និងប៊ុលហ្ការីនេះ។ គួរបញ្ជាក់ថា ពលរដ្ឋប្រទេសទាំងពីរ ក៏ដូចជាពលរដ្ឋប្រទេសសហភាពអឺរ៉ុប២៦ផ្សេងទៀតដែរ អាចស្នាក់នៅក្នុងប្រទេសសហភាពអឺរ៉ុបបាន មិនអោយហួសពី៣ខែនោះទេ។ បើចង់នៅហួសរយៈពេលនេះ ត្រូវតែរកការងារធ្វើ ដើម្បីចៀសវាងបង្កបន្ទុកដល់ប្រទេសដែលខ្លួនស្នាក់នៅនោះ។ ដូច្នេះ ក្នុងក្រសែភ្នែកអ្នកនយោបាយនានា នេះជាការគំរាមកំហែងទីផ្សារការងារជាតិខ្លួន។
ដោយឡែក អេស្ប៉ាញដែលរងគ្រោះដោយវិបត្តិសេដ្ឋកិច្ចកន្លងមក មិនមានអ្វីជំទាស់នឹងបញ្ហាបែបនេះឡើយ។ អេស្ប៉ាញបានទទួលពលរដ្ឋរូម៉ានីប្រមាណ១លាននាក់ ក្នុងទឹកដីខ្លួនរួចមកហើយ ហើយពលរដ្ឋប៊ុលហ្ការីក៏មានច្រើននៅអេស្ប៉ាញដែរ។ យោងតាមរដ្ឋាភិបាលក្រុងម៉ាឌ្រីដ ប្រជាជនរូម៉ានីភាគច្រើន បានរស់នៅចូលចុះក្នុងសង្គមអេស្ប៉ាញ។
ចាប់ពីរបបកុម្មុយនិស្តបានដួលរលំនៅអឺរ៉ុប ក្នុងកំឡុងឆ្នាំ១៩៨៩-១៩៩០ មក ពលរដ្ឋរ៉ូម៉ានី៣លាននាក់ និងពលរដ្ឋប៊ុលហ្ការី១លាននាក់ បានធ្វើចំណាកស្រុក ទៅកាន់អឺរ៉ុបខាងលិច ភាគច្រើនទៅអេស្ប៉ាញ និងអ៊ីតាលី។ មូលហេតុគឺដោយសារតែក្នុងប្រទេសកំណើតខ្លួន ប្រជាជនទាំងនេះមានប្រាក់ខែទាបពេក។
ដោយសារតែពលរដ្ឋប្រទេសទាំងពីរធ្លាប់ធ្វើអន្តោប្រវេសន៍រួចមកហើយនោះ លោកអាន់ដរ ឡាសស្លូ ជាបេសកជនផ្នែកការងារអឺរ៉ុបមួយរូប មិនបានគិតថា ការបើកចំហរទ្វារទីផ្សារអោយដល់ពលរដ្ឋរូម៉ានី និងប៊ុលហ្ការី អាចបង្កអោយមានបញ្ហាអន្តោប្រវេសន៍កើនឡើងនោះទេ។ លើសពីនេះ ការសិក្សាផ្សេងៗ កន្លងមក ធ្លាប់បានបង្ហាញថា បំលាស់ទីនៃជនបំរើការងារ អាចផ្តល់ប្រយោជន៍សេដ្ឋកិច្ចដល់ប្រទេសដែលទទួលយកជននោះអោយមកធ្វើការក្នុងទឹកដីខ្លួន។
ដោយឡែក ការដែលប្រទសមួយចំនួននៅសហភាពអឺរ៉ុបរងវិបត្តិសេដ្ឋកិច្ច រឺក៏មានបញ្ហាសេដ្ឋកិច្ចនោះ មិនបានជំរុញទឹកចិត្តពលរដ្ឋរូម៉ានី និងប៊ុលហ្ការី អោយចាកចេញពីស្រុកទេសខ្លួននោះឡើយ។ ពលរដ្ឋរូម៉ានីមួយចំនួនដែលបានចាកចេញពីស្រុកកំណើត បានចាប់ផ្តើមវិលត្រលប់មករូម៉ានីវិញហើយ ហើយពលរដ្ឋរូម៉ានីច្រើនទៀតនឹងវិលមកស្រុកកំណើតវិញ ប្រសិនបើរ៉ូម៉ានីបន្តស្តារសេដ្ឋកិច្ចខ្លួនបានជឿនលឿនទៅមុខ។ ក្នុងឆ្នាំ២០១៣ ប្រទេសរូម៉ានីជួបកំណើន៣ភាគរយ ជាកំណើនខ្ពស់ជាងគេ ក្នុងចំណោមបណ្តាប្រទេសសហភាពអឺរ៉ុប ធ្វើអោយប្រជាជនមានមោទនភាព។
ដូច្នេះ បញ្ហាលំហូចូលលើសលុបនៃជនអន្តោប្រវេសន៍ប្រទេសទាំងពីរ ដើម្បីឈ្លានពានទីផ្សារការងារសហភាពអឺរ៉ុប ដូចដែលអ្នកនយោបាយអឺរ៉ុបមួយចំនួនបានគិតនោះ គ្មានអ្វីគួរអោយបារម្ភធ្ងន់ធ្ងរនោះឡើយ។ ម្យ៉ាងទៀត រូម៉ានីនិងប៊ុលហ្ការី នៅមិនទាន់ក្លាយជាសមាជិកប្រទេសតំបន់ Shengen នៅឡើយដែរ។ គួររំលឹកថា ពលរដ្ឋប្រទេសទាំង២៦ ជាសមាជិកក្នុងតំបន់ Shengen មិនរងការត្រួតពិនិត្យឆែកឆេរនៅតាមព្រំដែនឡើយ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ