ចៅក្រមខេត្តកណ្តាលពីរនាក់ត្រូវបានចាប់ខ្លួនក្នុងបទពុករលួយ
នៅក្នុងក្របខ័ណ្ឌនៃការប្រយុទ្ធប្រឆាំងអំពើពុករលួយដើម្បីលាងសម្អាតប្រព័ន្ធយុត្តិធម៌កម្ពុជា អង្គភាពប្រឆាំងអំពើពុករលួយបានចាប់ខ្លួនចៅក្រមពីរនាក់ទៀតកាលពីព្រលប់ថ្ងៃសុក្រម្សិលមិញនេះក្នុងបទពុករលួយ។ ចៅក្រមតុលាការទាំងពីរក្នុងនោះមានស្ត្រីម្នាក់ផងត្រូវបានចោទប្រកាន់ថាទទួលយកលុយសំណូកពីកូនក្តីដើម្បីជាថ្នូរនឹងការរត់ការដោះលែង។ នេះជាករណីចាប់ខ្លួនមន្ត្រីតុលាការថ្មីទៀតបន្ទាប់ពីការចាប់ខ្លួនព្រះរាជអាជ្ញាតុលាការខេត្តពោធិ៍សាត់កាលពីចុងឆ្នាំ២០១១។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:១៣
អង្គភាពប្រឆាំងអំពើពុករលួយបានចាប់ខ្លួនចៅក្រមតុលាការសាលាដំបូងខេត្តកណ្តាលពីរនាក់កាលពីព្រលប់ថ្ងៃសុក្រម្សិលមិញនេះពាក់ព័ន្ធនឹងអំពើពុករលួយ។ ចៅក្រមទាំងពីរនាក់នោះ គឺលោក ហួត ហ៊ាង និងលោកស្រី ខូវ ចន្ទផូ ដែលត្រូវបានគេចោទប្រកាន់ថាបានទទួលលុយពីក្រុមគ្រួសារជនជាប់ចោទដើម្បីរត់ការដោះលែងជនជាប់ចោទ។
លោក ឱម យ៉ិនទៀង ប្រធានអង្គភាពប្រឆាំងអំពើពុករលួយមិនអាចទាក់ទងបានទេនៅថ្ងៃសៅរ៍នេះ ប៉ុន្តែ លោកបាននិយាយប្រាប់អ្នកកាសែតនៅព្រលប់ថ្ងៃសុក្រម្សិលមិញថា ការចាប់ខ្លួនចៅក្រមទាំងពីរនេះបានធ្វើឡើងកាលពីម៉ោង ៥ និង ៣០ នាទី ល្ងាច ពាក់ព័ន្ធនឹងការយកលុយពីកូនក្តី។ លោកចៅក្រម ហួត ហ៊ាង ត្រូវបានគេស្គាល់ថា ជាអតីតក្រឡាបញ្ជីតុលាការរាជធានីភ្នំពេញ តែក្រោយមកបានទៅបំពេញការងារជាចៅក្រមនៅខេត្តកណ្តាលវិញ។ ចំណែកឯលោកស្រី ខូវ ចន្ទផូ គឺជាអតីតក្រឡាបញ្ជីតុលាការខេត្តកណ្តាល តែក្រោយពេលប្រឡងជាប់ជាចៅក្រមក៏បានបំពេញមុខងារជាចៅក្រមនៅតុលាការនេះដដែល។
ក្រោយពីការឃាត់ខ្លួន នៅមិនទាន់មានព័ត៌មានទាក់ទងនឹងករណីនេះនៅឡើយទេ។ ប្រភពចុងក្រោយនៅថ្ងៃនេះបានឲ្យដឹងថា អង្គភាពប្រឆាំងអំពើពុករលួយកំពុងសាកសួរចៅក្រមទាំងពីររូប មុននឹងសម្រេចថាដោះលែង ឬក៏បញ្ជូនទៅតុលាការដើម្បីចោទប្រកាន់ក្នុងរឿងពុករលួយ។ អង្គភាពប្រឆាំងអំពើពុករលួយគ្រោងធ្វើសន្និសីទកាសែតមួយដើម្បីជូនដំណឹងដល់សាធារណជន។
នេះជាករណីចាប់ខ្លួនមន្ត្រីតុលាការពុករលួយថ្មីទៀតបន្ទាប់ពីការចាប់ខ្លួនលោក តុប ចន្ទសិរីវុឌ្ឍន៍ ព្រះរាជអាជ្ញាតុលាការខេត្តពោធិ៍សាត់កាលពីចុងឆ្នាំ២០១១។ លោក តុប ចន្ទសិរីវុឌ្ឍន៍ ត្រូវបានតុលាការផ្តន្ទាទោសឲ្យជាប់ពន្ធនាគារចំនួន១៨ឆ្នាំពីបទស៊ីសំណូក។ អង្គភាពប្រឆាំងអំពើពុករលួយក៏បានបំបែកក្រុមមន្ត្រីប៉ូលិសប្រឆាំងគ្រឿងញៀនមួយសំបុកដែរកាលពីចុងឆ្នាំមុននេះដែលមានអតីតឧត្តមសេនីយ៍មឹកដារ៉ាជាមេខ្លោង។ លោកមឹក ដារ៉ា ត្រូវបានតុលាការផ្តន្ទាទោសឲ្យជាប់ពន្ធនាគារអស់មួយជីវិតពីបទពុករលួយ និងប្រើប្រាស់តួនាទីរបស់ខ្លួនដើម្បីបង្កើតបណ្តាញជួញដូរគ្រឿងញៀនក្នុងប្រទេស។
ការចាប់ខ្លួនចៅក្រមពីរនាក់ទៀតនេះជាករណីដ៏ធំមួយទៀតសម្រាប់បើកឆាក ស្វាគមឆ្នាំ២០១២របស់អង្គភាពប្រឆាំងអំពើពុករលួយ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ