តុលាការខេត្តស្វាយរៀងបើកសវនាការកាត់ទោសលោក ឈូក បណ្ឌិតក្នុងខែវិច្ឆិកា
នៅខណៈដែលអង្គការសង្គមស៊ីវិលក៍ដូចជាមជ្ឈដ្ឋានទូទៅបានកំពុងរង់ចាំមើលអំពីចំណាត់ការរបស់តុលាការខេត្តស្វាយរៀងទាក់ទិនទៅនឹងករណីអតីតអភិបាលក្រុងបាវិតលោក ឈូក បណ្ឌិតដែលជាជនល្មើសបានបាញ់ប្រហារទៅលើហ្វូងកម្មករបណ្តាលឲ្យកម្មការិនីបីនាក់រងរបួសបានពន្យារពេលម្តងហើយម្តងទៀតនោះ នៅទីបំផុត សាលាដំបូងខេត្តស្វាយរៀងបានកំណត់ពេលនៅក្នុងខែវិច្ឆិកានេះ ដើម្បីបើកសវនាការសំណុំរឿងដ៏ចម្រូងចម្រាស់ដែលបង្ករបួសស្នាមដោយអចេតនា។
ចុះផ្សាយនៅថ្ងៃ៖
ស្តាប់ - ០២:៣៩
នៅទីបំផុត សាលាដំបូងខេត្តស្វាយរៀងនឹងកំណត់ពេលបើកសវនាការសំណុំរឿងអតីតអភិបាលក្រុងបាវិតលោក ឈូក បណ្ឌិតដែលបានបាញ់ប្រហារទៅលើហ្វូងកម្មករបណ្តាល ឲ្យកម្មការិនីបីនាក់រងរបួស នៅក្នុងតំបន់សេដ្ឋកិច្ចពិសេស Manhattan ក្រុងបាវិតនៅក្នុងខែវិច្ឆិកានេះ បន្ទាប់ពីសង្គមស៊ីវិល ក៍ដូចជាមជ្ឈដ្ឋានទូទៅបានកំពុងរង់ចាំយ៉ាងអន្ទះសារ។
ព្រះរាជអាជ្ញាអមសាលាដំបូងខេត្តស្វាយរៀង លោកហ៊ីង ប៊ុនជាបានថ្លែងឲ្យដឹងថា ដោយសារតែមានការមមាញឹក និងមានបុណ្យច្រើនពេក ទើបធ្វើឲ្យសំណុំរឿងនេះដំណើរការយឺតជាងនិតិវិធីកំណត់។ លោកថា ករណីជនល្មើសនៅក្រៅឃុំតាមនិតិវិធី គឺតុលាការចំណាត់ការមិនឲ្យហួសពី១ខែទេ។ លោកបានឲ្យដឹងថា តុលាការនឹងកំណត់ថ្ងៃបើកសវនាការនៅពាក់កណ្តាលខែវិច្ឆិកា ឬចុងខែវិច្ឆិការនេះ។
សូមរំលឹកថា នៅថ្ងៃទី ១៨ ខែមេសា ឆ្នាំ២០១២ លោក អតីតអភិបាលក្រុងបាវិតរូបនោះត្រូវបានតុលាការខេត្តស្វាយរៀងសម្រេចចោទប្រកាន់ពីបទបង្ករបួសស្នាមដោយអចេតនា ទាក់ទិននៅនឹងព្រឹត្តិការណ៍ថ្ងៃទី២០ ខែកុម្ភៈ ដែលមានកម្មករជាង ៦០០០ នាក់មកពីរោងចក្រ ៤ ក្នុងតំបន់សេដ្ឋកិច្ចពិសេស Manhattan ក្នុងក្រុងបាវិត បានធ្វើការតវ៉ាទាមទារប្រាក់ឈ្នួល និងលក្ខខណ្ឌការងារប្រសើរជាងមុន ហើយលោកឈូក បណ្ឌិតអតីតអភិបាលក្រុងបាវិតបានបាញ់កម្មករ៣នាក់ឲ្យរងរបួស។ នៅក្នុងសំណុំរឿងដែលបានអូសបន្លាយអស់រយៈពេលជាច្រើនខែមកនោះ កម្មការិនី ៣ នាក់ដែលបានរងរបួសដោយសារការបាញ់ប្រហារពីសំណាក់អតីតអភិបាលក្រុងបាវិត បានដាក់ពាក្យបណ្តឹងប្រឆាំងទៅនឹងលោកឈូក បណ្ឌិត ដោយទាមទារសំណងម្នាក់ៗ ៤៥ ០០០ដុល្លារ។
កញ្ញាប៊ុន ចិន្តា អាយុ ២១ ឆ្នាំ ដែលរងរបួសដោយការបាញ់ប្រហារពីសំណាក់អតីតអភិបាលក្រុងបាវិតបានថ្លែងឲ្យដឹងថា នាងកំពុងរស់នៅក្នុងស្ថានភាពភ័យខ្លាចដោយសារតែជនល្មើសនៅក្រៅឃុំនៅឡើយ។ ហើយបណ្តឹងរបស់ពួកនាងពុំទាន់ឃើញមានចំណាត់ការពីសំណាក់មន្ត្រីតុលាការនៅឡើយទេ។ នាងថា ប្រហែលជាអាជ្ញាធរមិនចង់ចាត់ការលើសុំណុំរឿងរបស់ពួកនាងទេ ដោយសារតែជនល្មើសជាអ្នកមានអំណាច ហើយពួកនាងជាអ្នកកម្មកររោងចក្រក្រីក្រគ្មានឥទ្ធិពលអ្វីនឹងធ្វើឲ្យតុលាការព្រួយបារម្ភនោះទេ។
ទាក់ទិនទៅនឹងការពន្យារពេលម្តងហើយ ម្តងទៀតនោះបានធ្វើឲ្យមន្ត្រីសង្គមស៊ីវិលមានការព្រួយបារម្ភយ៉ាងខ្លាំងចំពោះនិទណ្ឌភាពនៅក្នុងប្រទេសកម្ពុជា។
លោកអំ សំអាត មន្ត្រីស៊ើបអង្កេតជាន់ខ្ពស់របស់អង្គការការពារសិទ្ធិមនុស្សលីកាដូបានលើកឡើងថា សំណុំរឿងនេះ មានភាពមិនប្រក្រតីតាំងពីដើមមក គឺតុលាការបានចោទប្រកាន់ដល់ជនល្មើសស្រាលបំផុតគឺត្រឹមតែបង្ករបួសស្នាមដោយអចេតនាតែប៉ុណ្ណោះ។ ដូច្នេះបង្ហាញថា តុលាការពុំមានចេតនាចាត់ការរឿងលោកឈូក បណ្ឌិតនេះទេ ដោយសារតែជនល្មើស ជាអ្នកមានអំណាច៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ