កម្ពុជា -

អត្ថបទចុះផ្សាយនៅថ្ងៃ ចន្ទ 01 តុលា 2012 - ព័ត៌មានទើបកែប្រើលើកចុងក្រោយ ថ្ងៃ ពុធ 03 តុលា 2012

តុលាការផ្តន្ទាទោសដាក់គុក លោក ម៉ម សូណង់ដូ ចំនួន ២០ ឆ្នាំ

ដោយ លី ម៉េងហួរ

នៅព្រឹកថ្ងៃចន្ទ ទី១ ខែតុលានេះ បានប្រកាសសាលក្រម សម្រេចផ្តន្ទាទោសលោក ម៉ម សូណង់ដូ ដាក់ពន្ធនាគារចំនួន ២០ ឆ្នាំ ក្នុងរឿងជម្លោះដីធ្លី បង្កើតតំបន់អបគមន៍ ប្រឆាំងរដ្ឋាភិបាល នៅខេត្តក្រចេះ។ បន្ទាប់ពីតុលាការប្រកាសសេចក្តីសម្រេចដូច្នេះភ្លាម ក្រុមពលរដ្ឋជាង ១០០ នាក់ ដែលគាំទ្រលោកម៉មសូណង់ដូ បានស្រែកតវ៉ា លើកបដា និងដើរបាតុកម្មតាមផ្លូវ។ ពលរដ្ឋដាក់ញត្តិស្នាមមេដៃ ទៅកាន់ស្ថានទូតអាមេរិក និងលុតជង្គង់ ស្នើសុំព្រះមហាក្សត្រ ឲ្យជួយដោះលែងលោកម៉ម សូណង់ដូ។

សេចក្តីរាយការណ៍របស់ លី ម៉េងហួរ ពីទីក្រុងភ្នំពេញ

ស្តាប់ (03:48)

01/10/2012 by លី ម៉េងហួរ

ក្រុមពលរដ្ឋអ្នកគាំទ្រលោកម៉មសូណង់ដូ ជាង ១០០ នាក់ បានស្រែកតវ៉ា និងព្យាយាមចូលទៅកាន់តុលាការ ខណៈដែលតុលាការប្រកាសសាលក្រម ផ្តន្ទាទោសលោកម៉មសូណង់ដូ ដាក់ពន្ធនាគារ ២០ ឆ្នាំ នៅថ្ងៃចន្ទ ទី១តុលានេះ។ តែត្រូវប៉ូលិសរារាំង។ ក្រុមពលរដ្ឋ ក៏បានលើកបដាស្រែក ដើរតាមផ្លូវនានានៅភ្នំពេញ។ ក្រុមអ្នកគាំទ្រលោកម៉មសូណង់ដូ បានដាក់ស្នាមមេដៃ ដែលបិទលើបដាក្រមា នៅស្ថានទូតអាមេរិក និងលុតជង្គង់ស្រែកយំ នៅមុខវាំង ដើម្បីស្វែងរកអន្តរាគមន៍ពីព្រះមហាក្សត្រ ដោះលែងលោក ម៉ម សូណង់ដូ។ អ្នកស្រី អ៊ួន ផាណារី អគ្គលេខាធិការសមាគមអ្នកប្រជាធិបតេយ្យ ដែលបានចូលរួមក្នុងក្បួនតវ៉ានៅរសៀលនេះ បានលើកឡើងថា ពលរដ្ឋទាំងចាស់ទាំងក្មេង ដែលបានស្កាត់មកពីតាមបណ្តាខេត្តនានា និងបានយំស្រែកលុតជង្គង់ ស្វែងរកអន្តរាគមន៍ពីព្រះមហាក្សត្រពេលនេះ ព្រោះថា ការកាត់ក្តីរបស់តុលាការឲ្យលោកម៉មសូណង់ដូ ជាប់ពន្ធនាគារ ២០ ឆ្នាំ គឺមិនអាចទទួលយកបានទេ។

តាមក្រុមអ្នកតវ៉ា លោកម៉ម សូណង់ដូ មិនមានកំហុសក្នុងរឿងចោទប្រកាន់ ពាក់ព័ន្ធដីធ្លី នៅខេត្តក្រចេះឡើយ។ នៅព្រឹកថ្ងៃចន្ទនេះ លោកស្រី ចាំង ស៊ីណាត ចៅក្រមតុលាការក្រុងភ្នំពេញបានប្រកាសសាលក្រម ផ្តន្ទាទោសលោកម៉មសូណង់ដូ ដាក់ពន្ធនាគារ ២០ ឆ្នាំ ក្នុងរឿងជម្លោះដីនៅខេត្តក្រចេះ តាមរយៈការបង្កើតតំបន់អបគមន៍ប្រឆាំងរដ្ឋាភិបាល។ ក្នុងរឿងក្តីនោះ អ្នកភូមិសរុបចំនួន ១២ នាក់ផ្សេងទៀត ក៏ត្រូវបានតុលាការសម្រេចផ្តន្ទាទោស ដាក់ពន្ធនាគារពី ១០ ខែ រហូតដល់ ៥ ឆ្នាំ តែត្រូវព្យួរទោស។ ពោលគឺពលរដ្ឋពាក់ព័ន្ធរឿងដីធ្លីនៅខេត្តក្រចេះ ដែលបានជាប់ឃុំឃាំង ជាមួយលោកម៉មសូណង់ដូ ត្រូវបានតុលាការសម្រេចដោះលែងវិញហើយ។

ក្នុងសេចក្តីសម្រេចនៅព្រឹកមិញ ចៅក្រមក៏បានផ្តន្ទាទោសកំបាំងមុខ លើអ្នកភូមិ ៣ នាក់ ដែលគេអះអាងថា ជាមេក្លោងនៅតំបន់ជម្លោះដីធ្លី នៅភូមិប្រម៉ា ឃុំកំពង់ដំរី ស្រុកឆ្លូង ខេត្តក្រចេះ ដែលកំពុងគេចខ្លួន រួមមាន ឈ្មោះ ប៊ុនរដ្ឋា ត្រូវផ្តន្ទាទោសកំបាំងមុខ ដាក់ពន្ធនាគារ ៣០ ឆ្នាំ។ រីឯឈ្មោះសុខ តុង និងប៊ុន ឆន តុលាការផ្តន្ទាទោសកំបាំងមុខ ដាក់ពន្ធនាគារ ១៥ ឆ្នាំ។ ចៅក្រមចំណាយពេលជាង ២ ម៉ោង ដើម្បីប្រកាសសាលក្រម ក្នុងរឿងក្តីប្រឆាំងលោកម៉មសូណង់ដូ នៅព្រឹកមិញ។ លោកម៉មសូណង់ដូ បានចាត់ទុកថា ការសម្រេចរបស់តុលាការ គឺជារឿងអយុត្តិធម៌ ខណៈដែលឆ្មាំគុក បានព្យាយាមចាប់រុញលោកបញ្ចូលឡាន មិនឲ្យផ្តល់សម្ភាសន៍ដល់អ្នកកាសែតឡើយ។

ដោយឡែកអង្គការសិទ្ធិមនុស្ស គណបក្សនយោបាយ និងសហភាពអ៊ឺរ៉ុប ជាដើម បានថ្លែងការណ៍ផ្ទាល់មាត់ និងថ្លែងការណ៍ជាលាយលក្ខណ៍អក្សរ ថ្កោលទោស នឹងការផ្តន្ទាទោស លោក ម៉ម សូណង់ដូ។ តាមសេចក្តីថ្លែងការណ៍ ករណីកាត់ទោសលោកម៉មសូណង់ដូ ប៉ះពាល់ដល់សិទ្ធិសេរីភាពបញ្ចេញមតិ និងប៉ះពាល់លទ្ធិប្រជាធិតេយ្យ នៅកម្ពុជា៕