សាលាក្តីខ្មែរក្រហមផ្សព្វផ្សាយគម្រោងចំណាយដើម្បីបញ្ចប់វិបត្តិថវិកា
សាលាក្តីខ្មែរក្រហមបានប្រកាសផ្សព្វផ្សាយជាសាធារណៈនៅចុងសប្តាហ៍នេះនូវគម្រោងថវិកាសម្រាប់ឆ្នាំ២០១២និង២០១៣ ដែលមានចំនួន៨៩,៦លានដុល្លារ។ គម្រោងថវិកានេះត្រូវបានអនុម័តដោយប្រទេសម្ចាស់ជំនួយរួចហើយកាលពីសប្តាហ៍មុន ប៉ុន្តែ ក្រុមម្ចាស់ជំនួយបានដាក់លក្ខខណ្ឌឲ្យសាលាក្តីទុកមួយអន្លើសិននូវគម្រោងទាក់ទងនឹងកេរដំណែលរបស់សាលាក្តី និងគម្រោងបន្តការងារសេសសល់នៅពេលសាលាក្តីនេះបិទបញ្ចប់។ មន្ត្រីអ្នកនាំពាក្យសាលាក្តីខ្មែរក្រហមបានអះអាងថា វិបត្តិថវិការបស់តុលាការនេះនឹងបញ្ចប់នៅដំណាច់ខែមីនានេះ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:១៦
មន្ត្រីនិងបុគ្គលិករបស់សាលាក្តីខ្មែរក្រហមទាំងអស់ត្រូវបានគេជូនដំណឹងរួចរាល់ហើយថាពួកគេនឹងទទួលបានប្រាក់ខែឡើងវិញទាំងអស់នាដំណាច់ខែមីនានេះ។ ដំណឹងល្អនេះបានកើតឡើងក្រោយពីប្រទេសម្ចាស់ជំនួយបានអនុម័តរួចហើយកាលពីសប្តាហ៍មុននូវគម្រោងថវិកាសម្រាប់ចំណាយក្នុងឆ្នាំ២០១២និង២០១៣។ ការចំណាយដែលមានថវិកាសរុបទាំងអស់៨៩,៦ លានដុល្លារ (គិតទាំងសម្រាប់ភាគីជាតិ និងអន្តរជាតិ)។
ប្រហែលជាមកពីដំណឹងល្អនេះហើយបានជាសាលាក្តីខ្មែរក្រហមបានសម្រេចផ្សព្វផ្សាយជាសាធារណៈនូវគម្រោងថវិការបស់ខ្លួន។ បើយោងតាមសេចក្តីប្រកាសជូនកាលពីល្ងាចថ្ងៃសុក្រ ប្រទេសម្ចាស់ជំនួយបានយល់ព្រមអនុម័តគម្រោងថវិកាសម្រាប់បន្តដំណើរការរបស់សាលាក្តីរយៈពេល២ឆ្នាំខាងមុខរួចហើយ ប៉ុន្តែ ម្ចាស់ជំនួយបានភ្ជាប់លក្ខខណ្ឌឲ្យសាលាក្តីត្រូវទុកមួយអន្លើសិននូវគម្រោងចំណាយទៅលើកេរដំណែលរបស់សាលាក្តី និងគម្រោងចំណាយទៅលើការងារសេសសល់របស់សាលាក្តីនៅពេលដែលដំណើរការសវនាការបិទបញ្ចប់។
លោក នេត្រ ភក្ត្រា អ្នកនាំពាក្យសាលាក្តីខ្មែរក្រហមបានពន្យល់បន្ថែមថា នៅក្នុងគម្រោងថវិកាឆ្នាំ២០១២និង២០១៣ សាលាក្តីក៏មានខ្ទង់ចំណាយទៅលើការរៀបចំតុលាការខ្មែរក្រហមឲ្យទៅជាកេរដំណែលទុកធ្វើជាគំរូសម្រាប់តុលាការជាតិ និង ខ្ទង់ចំណាយទៅលើកិច្ចការមួយចំនួនដែលនៅសេសសល់ក្រោយពីបិទបញ្ចប់សំណុំរឿងផងដែរ។ ប៉ុន្តែ ខ្ទង់ទាំងពីរនេះត្រូវបានប្រទេសម្ចាស់ជំនួយសុំផ្អាកទុកមួយអន្លើសិនដោយពួកគេចង់ឲ្យសាលាក្តីផ្តោតតែទៅលើដំណើរការដែលកំពុងតែប្រតិបត្តិការសព្វថ្ងៃតែប៉ុណ្ណោះ។
មន្ត្រីអ្នកនាំពាក្យសាលាក្តីខ្មែរក្រហមបានប្រកាសថា វិបត្តិថវិកានៅក្នុងសាលាក្តីនេះបានបញ្ចប់ហើយ ពោលគឺមន្ត្រី និងបុគ្គលិកសាលាក្តីទាំងអស់នឹងទទួលបានប្រាក់ខែឡើងវិញជាធម្មតាចាប់ពីដំណាច់ខែមីនានេះតទៅ។ សូមបញ្ជាក់ថា ចៅក្រម និងសហព្រះរាជអាជ្ញា ព្រមទាំងមន្ត្រីអ្នកច្បាប់នៃភាគីជាតិទាំងអស់មិនបានបើកប្រាក់ខែតាំងពីខែតុលាឆ្នាំ២០១១មក រីឯបុគ្គលិករដ្ឋាភិបាល និងបុគ្គលិកផ្សេងទៀតក៏មិនបានបើកប្រាក់ខែចាប់ពីខែមករាឆ្នាំ២០១២មកដែរ។ ប៉ុន្តែ ប្រាក់ខែទាំងនោះនឹងត្រូវគេសងវិញនៅដំណាច់ខែមីនានេះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ