អង្គការតម្លាភាពអន្តរជាតិ៖អំពើពុករលួយកើតមានច្រើននៅក្នុងវិស័យយោធា
ក៏ដូចជារៀងរាល់ឆ្នំា អង្គការតម្លាភាពអន្តរជាតិ Transparency international តែងចេញផ្សាយរបាយការណ៍ប្រចំាឆ្នំារបស់ខ្លួនស្តីពីស្ថានភាពអំពើពុករលួយនៅក្នុងពិភពលោក។ របាយការណ៍ឆ្នំា ២០១២ ចេញផ្សាយនាថ្ងៃអង្គារ ទី២៩ មករានេះបានឲ្យដឹងថា មានប្រទេសជាង ២ភាគ៣ក្នុងលោកមិនបានចាត់វិធានការចំាបាច់ក្នុងការទប់ស្កាត់អំពើពុករលួយនៅក្នុងវិស័យយោធាទេ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:០៤
តាមអង្គភាពប្រឆំាងអំពើពុករលួយបានឲ្យដឹងថា ក្នុងចំណោម ៨២ប្រទេសដែលខ្លួនបានធ្វើការពិនិត្យ ស្រាវជ្រាវ មានតែប្រទេសអាល្លឺម៉ង់ និងអូស្រ្តាលីទេដែលមានយន្តការប្រឆំាងអំពើពុករលួយនៅក្នុងវិស័យយោធាប្រកបដោយប្រសិទ្ធិភាព។ ចំណែកប្រទេសដ៏ទៃផ្សេងទៀត បានយកចិត្តទុកដាក់តិច ឬច្រើនពីរឿងកំចាត់អំពើពុករលួយនៅក្នុងវិស័យយោធារបស់ខ្លួន។ វិស័យយោធាដែលការចំណាយរបស់ប្រទេសទំាង ៨២ បានស្រូបយកអស់ ៩៤% នៃការចំណាយសរុបក្នុងវិស័យយោធានៅទូទំាងពិភពលោក។ ជាក់ស្តែងគ្រាន់តែនៅក្នុងឆ្នំា ២០១១ ការចំណាយសរុបរបស់ប្រទេសទំាង ៨២ នៅក្នុងវិស័យយោធាមានទឹកប្រាក់រហូតដល់ទៅ ១ ៦០០ ០០០លានដុល្លារ។
យោងតាម Transparency international អំពើពុករលួយនៅក្នុងវិស័យយោធាមានទឹកប្រាក់រហូតដល់ទៅ ២០ ០០០លានដុល្លារក្នុងមួយឆ្នំាៗ។ ម្យ៉ាងទៀត ក្នុងចំណោម ៨២ប្រទេសដែលបានធ្វើការពិនិត្យ ស្រាវជ្រាវ មានប្រទេសរហូតដល់ទៅជាងពាក់កណ្តាលឯណោះដែលវិធានការប្រយុទ្ធប្រឆំាងនឹងអំពើពុករលួយនៅមានកម្រិតទាប និងទន់ខ្សោយ។ ប្រទេសដែលមានហានិភ័យពុករលួយខ្ពស់ផុតលេខនៅក្នុងវិស័យយោធាមាន អ៊ីរ៉ង់ អាហ្វហ្កានីស្ថាន និងប្រទេសអារ៉ាប៊ីសាអូឌីត។ ចំណែកសហរដ្ឋអាមេរិក អង់គ្លេស ស៊ុយអែត និងកូរ៉េខាងត្បូងត្រូវបានចាត់ទុកជាប្រទេសដែលហានិភ័យទាប។ រីឯបារំាង អេស្បាញ អ៊ីតាលី ប៉ូឡូញស្ថិតក្នុងក្រុមប្រទេសដែលមានហានិភ័យស្រាល។
ទន្ទឹមគ្នានេះ ចិន រុស្ស៊ី និងអ៊ីស្រាអែលដែលជាប្រទេសនំាចេញគ្រឿងសព្វាវុធសំខាន់ជាងគេនោះត្រូវបានចាត់ក្នុងចំណាត់ថ្នាក់មានហានិភ័យខ្ពស់ខាងពុករលួយ។ ចំណាត់ថ្នាក់ហានិភ័យខ្ពស់ខាងពុករលួយនេះក៏ត្រូវបានដាក់ទៅលើប្រទេសអ្នកនំាចូលគ្រឿងសព្វាវុធមួយចំនួនដែរ រួមមាន ឥណ្ឌា អេមីរ៉ាតអារ៉ាប់រួម សិង្ហបុរី ថៃ និងប្រទេសតួកគី។
ម្យ៉ាងទៀត របាយការណ៍របស់ Transparency international ក៏បានបញ្ជាក់ផងដែរ ពីការដែលមានប្រទេសភាគច្រើនបន្តលាក់លៀម មិនបានបង្ហាញការពិត និងប្រកបដោយតម្លាភាពនូវថវិកាសម្រាប់ចំណាយនៅក្នុងវិស័យការពារជាតិរបស់ខ្លួន៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ