ចូលឆ្នាំថ្មីឆ្នាំនេះ ភ្ញៀវទេសចរសម្រុកខ្លាំងទៅខេត្តសៀមរាបនិងចេញក្រៅប្រទេស
ក្នុងថ្ងៃដំបូងនៃពិធីបុណ្យចូលឆ្នាំថ្មីនេះ ភ្ញៀវទេសចរបានសម្រុកខ្លាំងទៅកាន់ខេត្តសៀមរាប។ បន្ទប់សណ្ឋាគារផ្ទះសំណាក់បានឡើងថ្លៃខ្ពស់និងមានអ្នកខ្លះខ្វះបន្ទប់ស្នាក់នៅទៀតផង។ ចំនួនភ្ញៀវទេសចរក្នុងពិធីបុណ្យចូលឆ្នាំថ្មីរយៈពេល៣ថ្ងៃនេះ ត្រូវបានមន្ទីរទេសចរណ៍ខេត្តសៀមរាបវាយតម្លៃថា មានដល់ទៅជាង២៥ ម៉ឺននាក់គឺកើនលើសឆ្នាំមុនជាង ៤៤ ភាគរយ។ ចំនួនអ្នកចេញទៅក្រៅប្រទេសក៏កើនឡើងស្ទើរ ១០០ ភាគរយបើធៀបនឹងឆ្នាំមុន។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:៣០
ភ្ញៀវទេសចរមកពីគ្រប់ទិសទីទាំងភ្ញៀវជាតិនិងអន្តរជាតិដែលបានមកទស្សនាខេត្តសៀមរាបក្នុងអំឡុងបុណ្យចូលឆ្នាំថ្មីនេះមានចំនួនជាង ២៥ម៉ឺននាក់ពោលគឺកើនលើសឆ្នាំមុនប្រមាណជា ៤៤ភាគរយ។ នេះបើតាម លោក ង៉ូវ សេងកាក់ ប្រធានមន្ទីរទេសចរណ៍ខេត្តសៀមរាបដែលបានបានប្រាប់វិទ្យុបារាំងអន្តរជាតិនៅថ្ងៃអង្គារនេះ។
បើតាមលោក ង៉ូវ សេងកាក់ ការកើនឡើងនៃភ្ញៀវទេសចរក្នុងខេត្តសៀមរាបគឺដោយសារតែខេត្តនេះមានរៀបចំព្រឹត្តិការណ៍អង្គរសង្ក្រាន្ត។ ប្រធានមន្ទីរទេសចរណ៍ខេត្តសៀមរាបឲ្យដឹងទៀតថា បន្ទប់សណ្ឋាគារ ផ្ទះសំណាក់ទូទាំងខេត្តត្រូវបានភ្ញៀវជួលស្នាក់នៅគ្មានសល់គឺនៅសល់តែបន្ទប់សណ្ឋាគារថ្នាក់ផ្កាយ៥ខ្លះតែប៉ុណ្ណោះ។ ក្រៅពីនោះក៏មានភ្ញៀវជាច្រើនទៀតស្នាក់នៅផ្ទះបងប្អូនផងដែរ។ ភ្ញៀវខ្លះទៀតត្រូវចំណាយពេលដល់រំលងអាធ្រាត្រទើបអាចរកបន្ទប់ស្នាក់នៅបាន។
លោក ហូ វណ្ឌី សហប្រធានក្រុមការងារវិស័យទេសចរណ៍ផ្នែកឯកជនក៏បានប្រាប់វិទ្យុបារាំងអន្តរជាតិដែរថា មានភ្ញៀវទេសចរខ្លះជាពិសេសដូនជីនិងមនុស្សវ័យចំណាស់មួយចំនួនបានទៅស្នាក់នៅតាមទីវត្តអារាម។ បើតាមលោក ហូ វណ្ឌី ខេត្តផ្សេងៗទៀតមិនសូវជាមានបញ្ហាចោទប៉ុន្មានទេ ដូចជាបាត់ដំបងឬប៉ៃលិនជាដើមភ្ញៀវអាចរកបន្ទប់ស្នាក់នៅបានជាធម្មតា។
ពិធីបុណ្យចូលឆ្នាំថ្មីឆ្នាំនេះក៏មានទេសចរជនជាតិខ្មែរសម្រុកចេញទៅក្រៅប្រទេសច្រើនដែរ។ លោក ហូ វណ្ឌី បញ្ជាក់ថា ក្រុមហ៊ុនទេសចរណ៍ជាច្រើនមមាញឹកយ៉ាងខ្លាំងដោយសារភ្ញៀវចេញទៅក្រៅប្រទេស។ ប្រធានសមាគមទីភ្នាក់ងារទេសចរណ៍កម្ពុជា លោក អាង គឹមអ៊ាង ក៏បានឲ្យដឹងដូចគ្នានេះដែរ។ លោកបញ្ជាក់ថា ភ្ញៀវជនជាតិខ្មែរដែលចេញទៅក្រៅប្រទេសក្នុងអំឡុងពេលបុណ្យចូលឆ្នាំខ្មែរឆ្នាំនេះបានកើនឡើងស្ទើរតែ ១០០ ភាគរយធៀបនឹងឆ្នាំមុន។
បើតាមលោក អាង គឹមអ៊ាង ភ្ញៀវខ្លះមិនអាចរកយន្តហោះជិះបានផង។ គោលដៅទេសចរណ៍សំខាន់ៗមានដូចជា ម៉ាឡេស៊ី សាំងហ្គាពួរ ចិន ហើយឆ្នាំនេះមានទេសចរជនជាតិខ្មែរខ្លះចេញទៅរហូតដល់កូរ៉េខាងត្បូង ជប៉ុន សហរដ្ឋអាមេរិក និងអូស្ត្រាលីទៀតផង។ ទាំងលោក ហូ វណ្ឌី ទាំងលោក អាង គឹមអ៊ាង សុទ្ធតែកត់សម្គាល់ថា ការធូរស្រាលខាងនយោបាយជាអំណោយផលល្អមួយសម្រាប់ភ្ញៀវទេសចរ។
យ៉ាងណាក៏ដោយ អ្នកជំនាញទេសចរណ៍បានសំណូមពរថា កម្ពុជាគួររៀបចំហេដ្ឋារចនាសម្ព័ន្ធឲ្យមានគុណភាពជាពិសេសផ្លូវថ្នល់។ ភ្ញៀវទេសចរជាច្រើនបានត្អូញត្អែរអំពីការលំបាកក្នុងការធ្វើដំណើរទៅកាន់ខេត្តសៀមរាបនិងខេត្តមួយចំនួនទៀតដោយសារតែបញ្ហាផ្លូវថ្នល់ និងកង្វះហេដ្ឋារចនាសម្ពន្ធ័ទេសចរណ៍ផ្សេងទៀត៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ