មេដឹកនាំកំពូលអាមេរិក៣នាក់នឹងមកដល់កម្ពុជាក្នុងសប្តាហ៍ខាងមុខនេះ
ប្រធានាធិបតីអាមេរិក បារ៉ាក់ អូបាម៉ា, រដ្ឋមន្ត្រីការបរទេស លោកស្រី ហ៊ីលឡារី គ្លីនតុននិងរដ្ឋមន្ត្រីការពារជាតិអាមេរិក លោក Leon Panettaនឹងមកដល់កម្ពុជានៅសប្តាហ៍ខាងមុខនេះដើម្បីចូលរួមកិច្ចប្រជុំកំពូលអាស៊ាននិងកិច្ចប្រជុំអាស៊ីបូព៌ានៅក្នុងប្រទេសកម្ពុជា។ ព័ត៌មាននេះត្រូវបានប្រកាសឲ្យដឹងជាផ្លូវការដោយស្ថានទូតអាមេរិកប្រចាំទីក្រុងភ្នំពញនៅចុងសប្តាហ៍នេះ។ ប្រទេសកម្ពុជាក្នុងនាមប្រធានអាស៊ានកំពុងត្រៀមលក្ខណៈដើម្បីទទួលមេដឹកនាំកំពូលជាច្រើនរបស់ពិភពលោក។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:៣៧
ស្ថានទូតសហរដ្ឋអាមេរិកប្រចាំទីក្រុងភ្នំពេញ បានជូនដំណឹងអំពីការមកដល់របស់មន្ត្រីជាន់ខ្ពស់អាមេរិក៣នាក់ក្នុងទឹកដីកម្ពុជានៅក្នុងសប្តាហ៍ខាងមុខនេះ។ លោកប្រធានាធិបតី បារ៉ាក់ អូបាម៉ា អមដំណើរដោយរដ្ឋមន្ត្រីការបរទេស លោកស្រី ហ៊ីឡារីគ្លិនតុន នឹងមកដល់កម្ពុជានៅថ្ងៃទី១៩ វិច្ឆិកាដើម្បីចូលរួមកិច្ចប្រជុំកំពូលរវាងអាស៊ាន និងសហរដ្ឋអាមេរិក និងកិច្ចប្រជុំអាស៊ីបូព៌ាដែលនឹងប្រព្រឹត្តទៅនៅថ្ងៃទី១៩ និងទី២០ វិច្ឆិកា នៅទីក្រុងភ្នំពេញ។ មុននឹងមកដល់កម្ពុជា លោកអូបាម៉ា និងលោកស្រីគ្លីនតុន ក៏បានទៅបំពេញទស្សនកិច្ចនៅប្រទេសថៃ និងប្រទេសមីយ៉ាន់ម៉ា ផងដែរ។
ដោយឡែក រដ្ឋមន្ត្រីការពារជាតិអាមេរិក លោកLeon Panettaក៏នឹងមកដល់កម្ពុជាដែរ។ លោកគ្រោងនឹងជួបពិភាក្សាជាមួយរដ្ឋមន្ត្រីការពារជាតិអាស៊ានទាំង១០ នៅក្នុងក្របខ័ណ្ឌកិច្ចប្រជុំចង្អៀតមួយនៅក្នុងខេត្តសៀមរាបនៅថ្ងៃទី១៦វិច្ឆិកា។ លោក Leon Panettaគ្រោងនឹងថ្លែងអំពីសារៈសំខាន់នៃការឯកភាពអាស៊ាន សម្រាប់ជាប្រយោជន៍ដល់ស្ថិរភាពតំបន់ ក៏ដូចជាបង្ហាញពីការគាំទ្ររបស់សហរដ្ឋអាមេរិកចំពោះកិច្ចសហប្រតិបត្តិការវិស័យការពារជាតិជាមួយបណ្តាប្រទេសសមាជិកអាស៊ាន។
វត្តមានរបស់មេដឹកនាំសំខាន់ៗទាំង៣របស់អាមេរិកនៅកម្ពុជាបានកើតឡើងខណៈដែលប្រទេសកម្ពុជាកំពុងធ្វើជាម្ចាស់ផ្ទះកិច្ចប្រជុំកំពូលអាស៊ានលើកទី ២១និងកិច្ចប្រជុំកំពូលពាក់ព័ន្ធផ្សេងទៀត ដែលចាប់ផ្តើមពីថ្ងៃទី១៥ដល់២០ វិច្ឆិកានេះ។ មេដឹកនាំកំពូលៗមកពីបណ្តាប្រទេសជាច្រើននៃពិភពលោកដូចជាចិន ជប៉ុន កូរ៉េ រុស្ស៊ី និងសហរដ្ឋអាមេរិក ជាដើមនឹងមកចូលរួមកិច្ចប្រជុំទាំងនោះ។
នៅក្នុងសារលិខិតអបអរសាទរចំពោះការជាប់ឆ្នោតជាថ្មីរបស់លោកអូបាម៉ាកាលពីថ្ងៃទី៧វិច្ឆិកា លោកនាយករដ្ឋមន្ត្រី ហ៊ុន សែន បានអះអាងថា លោករង់ចាំស្វាគមន៍ការមកដល់របស់លោកអូបាម៉ា។ ប្រមុខរដ្ឋាភិបាលកម្ពុជាសង្ឃឹមថា ចំណងទាក់ទងរវាងកម្ពុជានិងសហរដ្ឋអាមេរិក ក្រោមការដឹកនាំរបស់លោក អូបាម៉ា នឹងកាន់តែរីកចម្រើនថែមទៀត។
វត្តមានរបស់មេដឹកនាំកំពូលៗអាមេរិកនៅកម្ពុជា ក៏ជាឱកាសដែលគណបក្សប្រឆាំងសង្ឃឹមថានឹងនាំមកនូវការប្រែប្រួលនយោបាយនៅក្នុងប្រទេសផងដែរ។ លោកសម រង្ស៊ី មេដឹកនាំបក្សប្រឆាំងបានអំពាវនាវឲ្យប្រធានាធិបតីអាមេរិកប្រើឥទ្ធិពលរបស់ខ្លួនក្នុងការជួយសម្រួលដល់ការវិលត្រឡប់របស់លោក ដើម្បីអាចចូលរួមបោះឆ្នោតឆ្នាំ ២០១៣ ។ ប៉ុន្តែ នៅមិនទាន់មានសញ្ញាណាមួយដែលបញ្ជាក់ថា បញ្ហានេះនឹងត្រូវលើកយកមកពិភាក្សានោះទេ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ