រុស្ស៊ី -

អត្ថបទចុះផ្សាយនៅថ្ងៃ ពុធ 01 កុម្ភៈ 2012 - ព័ត៌មានទើបកែប្រើលើកចុងក្រោយ ថ្ងៃ ពុធ 01 កុម្ភៈ 2012

តើការបោះឆ្នោតប្រធានាធិបតីថ្ងៃមុខនឹងសុចរិតយុត្តិធម៌ឬទេ?

គណបក្សប្រឆាំងរុស្ស៊ីលើកជាបាវចនា"ដើម្បីការបោះឆ្នោតសុចរិត"

RFI/Keo Chhaya

ដោយ កែវ ឆាយា

តបនឹងសំណួរនេះ មានតែប្រជាពលរដ្ឋរុស្ស៊ី ប្រមាណពាក់កណ្តាលប៉ុណ្ណោះ ដែលជឿថា វានឹងសុចរិតមែន។ នេះជាលទ្ធផលនៃការស្ទង់មតិ ទើបចេញផ្សាយដោយអង្គការសង្គមសាស្ត្រឈ្មោះ Levada-Center ធ្វើពីថ្ងៃ២០ដល់២៣មករាទៅលើពលរដ្ឋ ១.៦០០ នាក់ នៅតាមទីប្រជុំជនចំនួន១៣០ នៃខេត្ត ៤៥ ពីក្នុងចំណោមខេត្តទាំង៨៣ ចំណុះសហព័ន្ធរុស្ស៊ី។

សេចក្តីរាយការណ៍របស់ កែវ ឆាយាពីទីក្រុង ម៉ូស្គូ

ស្តាប់ (02:30)

01/02/2012 by កែវ ឆាយា

មូលហេតុនៃការស្ទង់មតិនេះ មកពីការបោះឆ្នោតសភាកាលពីខែធ្នូកន្លងទៅ បានញ៉ាំងឲ្យមានរលកបាតុកម្មនិងមិទ្ទិញប្រឆាំងយ៉ាងគគ្រឹកគគ្រេង ទល់នឹងការក្លែងបន្លំសន្លឹកឆ្នោតដែលប្រជាពលរដ្ឋផ្ទាល់នាំគ្នាកត់ត្រាឃើញ នៅតាមការិយាល័យបោះឆ្នោតហើយក្លែងបន្លំនេះ គឺសម្រាប់ជា ប្រយោជន៍នៃបក្សកាន់អំណាចតែម្តង។

ម៉្លោះហើយ បានជាទាក់ទងនឹងការបោះឆ្នោតប្រធានាធិបតី ដែលនឹងប្រព្រឹត្តទៅនៅថ្ងៃ៤មីនា ខាងមុខ ដោយនឹងមានទាំងបេក្ខជននៃបក្សកាន់អំណាច គឺលោកនាយករដ្ឋមន្ត្រីពូទីនចូលខ្លួនប្រជែង ជាមួយបេក្ខជននៃបក្សប្រឆាំង៤នាក់ផ្សេង ការស្ទង់មតិដែលមានធ្វើនោះ គឺមានន័យសំខាន់ សម្រាប់សង្គមផ្ទាល់។

ស្របនឹងលទ្ធផល ដែលចេញផ្សាយព្រឹកមិញនៅម៉ូស្គូ៖
-មានមិនដល់ទាំងពាក់កណ្តាលផង ពោលគឺតែ៤៩%ប៉ុណ្ណោះ ដែលព្យាករថា ការបោះឆ្នោត នៅដើមខែក្រោយ នឹងមានលក្ខណៈសុចរិតត្រឹមត្រូវ។ ចំណែកមតិដែលមិនជឿសោះឡើយលើ លក្ខណៈយុត្តិធម៌នោះ គឺ២៨%រីឯ២៣%ទៀត គ្មានយោបល់ជាក់លាក់ឡើយ។

- ព្រមជាមួយនេះ ប្រជាពលរដ្ឋ៣០% រំពឹងថា ក្នុងការបោះឆ្នោតប្រធានាធិបតីនឹងមានការក្លែងបន្លំសន្លឹកឆ្នោត តិចជាង ក្នុងការបោះឆ្នោតសភា។ ហើយមានតែ១០%ប៉ុណ្ណោះ ដែលប្រាកដ ក្នុងចិត្តថា ក្នុងការបោះឆ្នោតថ្ងៃមុខ នឹងពុំមានការរំលោភបំពានឬ ការក្លែងបន្លំសន្លឹកឆ្នោត អ្វីណាទេ។ ចំណែកមតិភាគច្រើនដល់ទៅ ៣៧% ប្រមាណថា ភាពមិនប្រក្រតីក្នុងការបោះឆ្នោតប្រធានាធិបតីនឹងមានចំនួនដូចក្នុងការបោះឆ្នោតសភាអ៊ីចឹង។

គួរនិយាយថា ដោយជ្រោងលើកឡើងនូវបាវចនា “ដើម្បីការបោះឆ្នោតសុចរិត” នៅរុស្ស៊ីមានបង្កើតឡើងជាចលនាក្រោមឈ្មោះថា “សម្ព័ន្ធអ្នកស្រុកម្ចាស់ឆ្នោត” , ជាសមាគមស៊ីវិលឈ្មោះ Golos ( សំឡេង ) , ជា”សហភាពអ្នកច្បាប់” ដែលសុទ្ធតែនឹងបញ្ជូនតំណាងរបស់ខ្លួនឲ្យទៅ តាមដានការបោះឆ្នោត នៅនឹងការិយាល័យបោះឆ្នោតផ្ទាល់។

ចំណែករដ្ឋអំណាចវិញ ដោយគន់គិត អំពីរលកតវ៉ាពីខាងប្រជាពលរដ្ឋ និងដើម្បីធានាឲ្យមាន តម្លាភាព ទាំងដកយកមេរៀនពីការចោទប្រកាន់ក្នុងរឿងក្លែងបន្លំសន្លឹកឆ្នោត លោកនាយករដ្ឋមន្ត្រី ពូទីន បានបញ្ជាឲ្យដំឡើង Webcamera ជាភ្នែកឃ្លាំមើល ទាំងយប់ទាំងថ្ងៃ ប្រចាំនៅតាមគ្រប់តែ ការិយាល័យបោះឆ្នោត ចំនួនជាង ៩ម៉ឺនកន្លែងនៅទូទាំងប្រទេសរុស្ស៊ី៕