របបសឹក៖ ថៃនឹងអាចមានរដ្ឋាភិបាលអន្តរកាលនៅមុនខែកញ្ញា
របបសឹកថៃបានប្រកាស នៅថ្ងៃសុក្រនេះថា ចាប់ពីពេលនេះ រហូតដល់ខែកញ្ញា រដ្ឋាភិបាលបណ្តោះអាសន្ននឹងអាចលេចចេញរូបរាង។ នៅក្នុងកិច្ចប្រជុំស្តីពីថវិកាសម្រាប់ឆ្នាំ ២០១៥ លោកមេទ័ពប្រាយុទ្ធ ចាន់អូចា ដែលបានធ្វើរដ្ឋប្រហារដណ្តើមអំណាច កាលពីថ្ងៃទី ២២ឧសភាកន្លងទៅ បានអំពាវនាវដល់ប្រជាជនថៃឲ្យមានការអត់ធ្មត់ ព្រោះថា ប្រទេសថៃក្នុងសម័យអន្តរកាលនឹងអាចមានរយៈពេលយូរបន្តិច នៅលើកនេះ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:០១
តាមប្រមុខយោធាថៃ ប្រាយុទ្ធ ចាន់អូចា ប្រទេសថៃ កំពុងស្ថិតនៅក្នុងដំណាក់កាល ក្រេប ទឹកឃ្មុំ ដែលនឹងមានរយៈពេលវែងបន្តិច។ ក្នុងអំឡុងពេលនេះ របបសឹកថៃគ្រោងនឹងបង្កើតរដ្ឋាភិបាលបណ្តោះអាសន្នមួយ ដើម្បីគ្រាន់ចាត់ចែង សរសេររដ្ឋធម្មនុញ្ញថ្មី។ លោកប្រាយុទ្ធ ចាន់អូចាមិនបានបញ្ជាក់ទេថា តើរដ្ឋាភិបាលបណ្តោះអាសន្ននោះជារដ្ឋាភិបាលស៊ីវិល ឬយោធាទេ។ ប៉ុន្តែ លោកប្រាយុទ្ធ ចាន់អូចាមិនបានទាត់ចោលទេ គំនិតដែលថា លោកនឹងអាចជាបេក្ខជនមួយសម្រាប់តំណែងនាយករដ្ឋមន្រ្តី នៅក្នុងរដ្ឋាភិបាលបណ្តោះអាសន្នថ្មី។
មេទ័ពថៃរូបនេះ ដែលបានធ្វើរដ្ឋប្រហារដណ្តើមអំណាចពីរដ្ឋាភិបាលបក្សភឿថៃ (ក្រុមអាវ ក្រហម) បានបញ្ជាក់យ៉ាងច្បាស់ថា នឹងគ្មានការបោះឆ្នោតទេ កើតឡើង នៅក្នុងរយៈពេលមួយឆ្នាំទៅមុខ។ របបសឹកថៃចង់យកពេលវេលានេះ ដើម្បីធ្វើកំណែទម្រង់នយោបាយថៃដ៏ស៊ីជម្រៅ ពោលគឺធ្វើយ៉ាងណាដើម្បីបិទបញ្ចប់វិបត្តិនយោបាយ រ៉ាំរ៉ៃ ដែលថៃបានជួបប្រទះ ក្នុងរយៈពេល១០ឆ្នាំចុងក្រោយនេះ។
អ្នកប្រឆាំងនឹងរដ្ឋប្រហារថៃ ជាច្រើនបានវាយតម្លៃថា របបសឹកថៃ កំពុងព្យាយាមសរសេរច្បាប់បោះឆ្នោតថ្មី រដ្ឋធម្មនុញ្ញថ្មី ដែលនឹងអាចរារាំងកុំឲ្យបក្សពួក ក្រុមគ្រួសារស៊ីណាវ៉ាត របស់លោកថាក់ស៊ីន អាចត្រលប់ចូលមកកាន់អំណាចបាន នៅក្នុងប្រទេសថៃ។
ចាប់តាំងពីធ្វើរដ្ឋប្រហារចូលដឹកនាំប្រទេស របបសឹកថៃ បានបើកប្រតិបត្តិការ ប្រមាញ់ក្រុមអ្នកប្រឆាំងនឹងរដ្ឋប្រហារ និងចាប់ឃុំខ្លួន អ្នកនយោបាយដែលជាគ្នីគ្នារបស់ក្រុមបក្សភឿថៃ ឬអ្នកកាសែត និងគ្រូសកលវិទ្យាល័យ ដែលបានបញ្ចេញមតិរិះគន់ថា សកម្មភាពធ្វើរដ្ឋប្រហាររបស់ពួកយោធា កំពុងបំផ្លាញលទ្ធិប្រជាធិបតេយ្យនៅក្នុងប្រទេសថៃ។
នៅថ្ងៃសុក្រ នៅចំពោះមុខមន្រ្តីរាជការថៃ លោកមេទ័ពចាន់អូចាបាននិយាយការពារ ជាថ្មីពីសារៈសំខាន់នៃអន្តរាគមន៍យោធាថៃ ដើម្បីស្រោចស្រង់ប្រទេសចេញពីវិបត្តិនយោបាយត្រាំត្រែង។ លើសពីនោះ លោកបានបញ្ជាក់ពីភាពចាំបាច់ដែលកងទ័ពថៃត្រូវតែខ្លាំង មានអំណាច។ “ប្រសិនបើយើងគ្មានទាហានទេ យើងមិនអាចចរចា តថ្លៃជាមួយនរណាបាន ឡើយ។ បើសិនជាទាហានរបស់យើងមិនខ្លាំង នោះ គ្មាននរណាស្តាប់យើងទេ។” នេះជាការអះអាងរបស់លោកមេទ័ពប្រាយុទ្ធ ចាន់អូចា៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ