ចាប់ខ្លួនដោយសារធ្វើគំនាប់តាមកុន រឿង Hunger Games
ប៉ូលិសថៃ កាលពីថ្ងៃពុធបានចាប់បញ្ជូននិស្សិត៥នាក់ទៅឲ្យកងទ័ព បន្ទាប់ពីនិស្សិតច្បាប់ទាំងនោះបានធ្វើគំនាប់ តាមរឿងកុន Hunger Games ដែលប្រើម្រាមដៃបី នៅចំពោះមុខនាយករដ្ឋមន្រ្តីថៃ លោកប្រាយុទ្ធ ចាន់អូចា។ នៅថ្ងៃពុធ លោកប្រាយុទ្ធ ចាន់អូចារបានអញ្ជើញទៅធ្វើទស្សនកិច្ចនៅខេត្តខនកេន ដែលជាសម្បុក ទីតាំងរបស់ក្រុមអតីតនាយករដ្ឋមន្រ្តីថៃ យីងឡាក់ ស៊ីណាវ៉ាត។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:១៣
នៅមុខវេទិកា ជាទីដែល លោកនាយករដ្ឋមន្រ្តីប្រាយុទ្ធ ចាន់អូចា កំពុងថ្លែងសុន្ទរកថា យុវនិស្សិតច្បាប់ថៃ ៥នាក់ បានងើបឈរឡើង និងធ្វើគំនាប់ ប្រើម្រាមដៃបី ដាក់ ប្រមុខរដ្ឋាភិបាលថៃ។ គំនាប់ម្រាមដៃបីដែលយកលំនាំតាមកុនអាមេរិកាំង រឿង Hunger Games ត្រូវបានគេចាត់ទុកជានិមិត្តរូបនៃចលនាតស៊ូ ប្រឆាំងនឹងរដ្ឋាភិបាលសឹកថៃបច្ចុប្បន្ន។
តាមលោកចិតចារ៉ូន ស្រីវ៉ានីត ប្រធានប៉ូលិសខេត្តខនកេន ភ្លាមៗ ប៉ូលិសបានចាប់ខ្លួនយុវនិស្សិតទាំងប្រាំនាក់ និងបញ្ជូនចូលទៅក្នុងបន្ទាយទាហាន កាលពីថ្ងៃពុធ។ ក្រៅតែពីធ្វើគំនាប់ផ្គើនដាក់ប្រមុខរដ្ឋាភិបាល និស្សិតថៃទាំងប្រាំពាក់អាវពណ៌ខ្មៅ ដែលមានអក្សរសរសេរពីលើថា “យើងមិនចង់បានរដ្ឋប្រហារ”។ ក្រុមនិស្សិតទាំងនោះថែមទាំងបានស្រែកទាមទារឲ្យលោកឧត្តមសេនីយ៍ចាន់អូចាដកវិញ ច្បាប់អាជ្ញាសឹក ដែលរបបសឹកថៃបានដាក់ តាំងពីថ្ងៃធ្វើរដ្ឋប្រហារ បណ្តេញរដ្ឋាភិបាលស៊ីវិលរបស់លោកស្រីយីងឡាក់ ស៊ីណាវ៉ាតចេញពីអំណាច។ តាមការស្រែកទាមទាររបស់និស្សិត ច្បាប់អាជ្ញាសឹកបានបិទ មាត់ បិទសិទ្ធិសេរីភាពបញ្ចេញមតិរបស់ប្រជាជននៅក្នុងទូទាំងប្រទេស។
តាំងពីយោធាធ្វើរដ្ឋប្រហារ ដណ្តើមអំណាចពីរដ្ឋាភិបាលស៊ីវិល នៅខែឧសភា ឆ្នាំនេះ ក្រុមប្រជាជនជាច្រើន ជាពិសេសនិស្សិតបានព្យាយាមធ្វើបាតុកម្មប្រឆាំងនឹងការដឹកនាំរបស់ទាហាន ប៉ុន្តែ មិនបានសម្រេច ដោយសារការដាក់គំនាប នៃច្បាប់អាជ្ញាសឹក។ កាលពីខែមិថុនា ប៉ូលិសបានចាប់និស្សិតម្នាក់ដែលអានសៀវភៅប្រលោមលោកមួយស្តីពីការងើបប្រឆាំងនឹងអំណាចផ្តាច់ការ របស់អ្នកនិពន្ធGeorge Orwell’s ចំណែកនិស្សិតផ្សេងទៀត ក៏ត្រូវបានចាប់ខ្លួនបន្តបន្ទាប់ ដោយសារតែការធ្វើគំនាប់ម្រាមដៃ តាមរឿងកុន Hunger Games។
យោងតាមមេធាវីក្រុមការពារសិទ្ធិមនុស្ស ក្រុមនិស្សិតនឹងអាចត្រូវគេដោះលែង ប៉ុន្តែ ពួកគេត្រូវគោរពតាមលក្ខខណ្ឌ ដាក់ដោយយោធា។ ពួកគេត្រូវសន្យាមិនចូលរួមក្នុងសកម្មភាពនយោបាយ។ បើមិនដូច្នោះទេ ពួកគេនឹងត្រូវប្រឈមនឹងការដេញចេញពីមហាវិទ្យាល័យច្បាប់ ដែលពួកគេកំពុងសិក្សា ក្នុងខេត្តខនកេន។ តាមអ្នកនាំពាក្យរបស់រដ្ឋាភិបាល លោកប្រាយុទ្ធ ចាន់អូចារ ដែលបានចូលនិវត្តន៍ពីតួនាទីប្រមុខយោធា ដើម្បីចូលកាន់តំណែងជានាយករដ្ឋមន្រ្តីថៃ មិនបានប្រកាន់ខឹង ដោយយល់ថា ពួកនិស្សិតនៅក្មេង។ ប៉ុន្តែ រហូតមកដល់យប់ថ្ងៃពុធ ក្រុមនិស្សិតនៅតែមិនទាន់ត្រូវពួកយោធាដោះលែងនៅឡើយទេ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ