អ.ស.ប.និងអង្គការសិទ្ធិមនុស្សបរិហារនយោបាយប្រមាញ់ការប្រមាថរាជានិយមនៅថៃ
Human Right Watch បានបរិហារនៅថ្ងៃពុធនេះ សកម្មភាពរបស់រដ្ឋាភិបាលសឹកថៃ ដែលតាំងពីធ្វើរដ្ឋប្រហារទម្លាក់រដ្ឋាភិបាលចាស់មក បានអនុវត្តនិងតាមប្រមាញ់ប្រឆាំងនឹងបទប្រមាថរបបរាជានិយម មិនរើសមុខ។ ចំណែកឯអង្គការសហប្រជាជាតិវិញ បានទាមទារឱ្យថៃធ្វើវិសោធនកម្មច្បាប់ប្រមាថព្រះមហាក្សត្រនេះ ដែលជាច្បាប់ដ៏តឹងតែងជាងគេបំផុតមួយនៅលើលោក។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:០៥
របបសឹកបានតាំងខ្លួនជាអ្នកការពាររាជានិយម ដោយបានធ្វើរដ្ឋប្រហារទម្លាក់រដ្ឋាភិបាលចាស់ ដើម្បី បិទបញ្ចប់ការបះបោររាប់ខែនៅទីក្រុងកក។ រាល់ការរិះគន់ព្រះមហាក្សត្រ ភូមិបុល ដែលបណ្តាជនថៃទូទៅគោរពដូចព្រះ រាល់សុន្ទរកថាមិនពិរោះពិសារ សម្រាប់ត្រចៀករបបសឹក នឹងត្រូវផ្តន្ទាទោស បញ្ជូនទៅតុលាការភ្លាម។ គិតចាប់ពីថ្ងៃទី ២២ខែឧសភាមក មានករណីជាប់អង្កេត ពីបទប្រមាថព្រះមហាក្សត្រថ្មីទៀត ចំនួនមិនតិចជាង ១៣ ករណីទេ។ នេះបើតាមរបាយការណ៍អង្គការការពារសិទ្ធិមនុស្ស ដែលបានសម្តែងការព្រួយបារម្ភយ៉ាងខ្លាំងនឹងស្ថានភាពសិទ្ធិមនុស្សនៅប្រទេសថៃ។
និស្សិតពីនាក់ ត្រូវបានតុលាការកាត់ទោសឱ្យជាប់ពន្ធនាគារ នៅខែសីហានេះ ពីបទបានសម្តែងលោ្ខន មានលក្ខណៈប្រមាថព្រះមហាក្សត្រ។ របបសឹកមិនព្រមទទួលយកការធានាណាមួយ ជាថ្នូរនឹងការផ្តល់សេរីភាពឱ្យនិស្សិតទាំងពីរអាចនៅក្រៅឃុំបានឡើយ។ ការណ៍នេះគឺផ្ទុយស្រឡះនឹងអនុសាសន៍នៃកត្តិការសញ្ញាអន្តរជាតិស្តីពីសិទ្ធិជនស៊ីវិលនិងនយោបាយ ដែលថៃបានផ្តល់សច្ចាប័ន។
កាលពីចុងខែកក្កដា តន្ត្រីករម្នាក់អាយុ ២៨ឆ្នាំ ត្រូវជាប់ទោសឃុំឃាំង១៥ឆ្នាំ ដោយហេតុតែបានប្រើពាក្យសម្តី ដែលមានលក្ខណៈជេរប្រមាថរបបរាជានិយម។ ហើយកាលពីពាក់កណ្តាលខែកក្កដាដដែល តុលាការសាលាឧទ្ធរណ៍បានដាក់ទោស៥ឆ្នាំ ប្រឆាំងនឹងអ្នកជំនួញម្នាក់ ពីបទប្រមាថរាជានិយមដូចគ្នា។
ជាមួយនឹងការចេញផ្សាយរបាយការណ៍ព្រួយបារម្ភ ពីទីក្រុងហ្សឺណែវ អង្គការការពារសិទ្ធិមនុស្ស Human Right Watch និងអង្គការសហប្រជាជាតិ បានអំពាវនាវរួមគ្នា ឱ្យថៃធ្វើវិសោធនកម្មច្បាប់ ព្រោះជាច្បាប់ដែលមានលក្ខណៈទូលំទូលាយពេក និងទោសដែលធ្ងន់បំផុត មានរយៈពេលយូរជ្រុល។ បើតាមអង្គការHRW ថៃចាំបាច់ត្រូវពិគ្រោះពិភាក្សាគ្នា ជាទូទៅ ដើម្បីអាចធ្វើវិសោធនកម្មច្បាប់រដ្ឋធម្មនុញ្ញបានលឿន។
មុនពេលមានរដ្ឋប្រហារ មានការអំពាវនាវច្រើននិងស្ទើរពីគ្រប់ទិសទី ឱ្យថៃធ្វើកំណែទម្រង់រដ្ឋធម្មនុញ្ញ ប៉ុន្តែក្រុមបញ្ញាវន្ត សកលវិទ្យាល័យ ដែលបានទាមទារ ឱ្យមានការតស៊ូមតិត្រង់ៗ លើច្បាប់ប្រមាថព្រះមហាក្សត្រ ត្រូវបានរបបសឹកកោះហៅនិងចាប់យកទៅឃុំឃាំងអស់ជាច្រើនថ្ងៃ ក្នុងកន្លែងអាថ៌កំបាំង មុននឹងដោះលែងមកវិញ បន្ទាប់ពីចុះហត្ថលេខាឈប់ធ្វើសកម្មភាពចាស់៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ