Delicious
Digg
Facebook
Twitter
Yahoo!
Technorati
អាមេរិក -
អត្ថបទចុះផ្សាយនៅថ្ងៃ សៅរ៍ 21 កក្កដា 2012 -
ព័ត៌មានទើបកែប្រើលើកចុងក្រោយ ថ្ងៃ សៅរ៍ 21 កក្កដា 2012
សោកនាដកម្មនៅថ្ងៃចាក់បញ្ចាំងភាពយន្តរឿងមនុស្សប្រចៀវ
ប្រជាជនអាមេរិកគោរពវិញ្ញាណក្ខន្ធជនរងគ្រោះដែលត្រូវJames Holmes បាញ់សម្លាប់នៅក្នុងរោងកុន កាលពីថ្ងៃព្រហស្បតិ៍ទី ១៩កក្កដា
© REUTERS
ចាប់តាំងពីថ្ងៃសុក្រម្សិលមិញ ប្រជាជនអាមេរិកបានចូលរួមរំលែកទុក្ខជាមួយគ្រួសារជនរងគ្រោះដែលត្រូវយុវជនអាមេរិកបាញ់សម្លាប់ នៅក្នុងរោងកុនមួយក្នុងរដ្ឋColorado។ កាលពីយប់ថ្ងៃព្រហស្បតិ៍ យុវជន James Holmes បានចូលទៅក្នុងរោងកុន និងបាញ់រះទៅលើទស្សនិកជន ដែលកំពុងជក់មើលកុនរឿង “មនុស្សប្រចៀវ” “Batman”។ ភ្លាមៗ មនុស្ស១២ស្លាប់ ចំណែក មនុស្សជាង៦០នាក់ផ្សេងទៀត រងរបួស។ James Holmes ត្រូវបានប៉ូលិសចាប់បាន នៅក្រៅរោងកុន។ សោកនាដកម្មលើកនេះបានជំរុញឲ្យលោកប្រធានាធិបតីអូបាម៉ាបង្រួញយុទ្ធនាការឃោសនាបោះឆ្នោតរបស់គាត់ និងត្រលប់ចូលមករំលែកទុក្ខជាមួយគ្រួសារសព។ លោកអូបាម៉ាបានបញ្ជាឲ្យគេទម្លាក់ទង់ជាតិពាក់កណ្តាលដងរយៈពេលមួយសប្តាហ៍ដើម្បីចូលរួមគោរពវិញ្ញាណក្ខន្ធរបស់ជនរងគ្រោះ។ បញ្ហាត្រួតពិនិត្យអាវុធ នៅអាមេរិកនឹងអាចត្រូវគេលើកយកទៅសួរដេញដោល នៅក្នុងការឃោសនាបោះឆ្នោតរបស់បេក្ខជនប្រធានាធិបតី នាពេលខាងមុខ។
|
បើមើលទៅតាមរូបថតដែលគ្រប់ប៉ុស្តិ៍ទូរទស្សន៍អាមេរិកបង្ហាញនៅលើអេក្រង់ យុវជន James Holmes អាយុ ២៤ឆ្នាំមានឫកពាជាមនុស្សស្លូតបូត។ គ្រូបង្រៀនរបស់ James Holmesបានចាត់ទុកយុវជនរូបនេះថា ជាសិស្សពូកែ ដោយធ្លាប់បានទទួលពិន្ទុខ្ពស់ផ្នែកជីវវិទ្យា នៅរដ្ឋកាលីហ្វនី។ នៅរដ្ឋកូឡូរាដូ យុវជន James Holmesបានបន្តរៀនថ្នាក់បណ្ឌិតផ្នែកវិទ្យាសាស្រ្តប្រសាទ ប៉ុន្តែ គេបានបោះបង់ចោលថ្នាក់រៀន កាលពីខែមិថុនាមុននេះ។
អ្នកដែលស្គាល់ James Holmes ភាគច្រើនវាយតម្លៃថា ជាយុវជនទុយមុយ និងរក្សាខ្លួននៅដាច់ឆ្ងាយពីគេឯង។ ផែនការសម្លាប់មនុស្សនៅរោងកុន កាលពីយប់ថ្ងៃព្រហស្បតិ៍បានបង្ហាញថា យុវជនរូបនេះឆ្លាត និងបានរៀបចំដោយល្អិតល្អន់ តាំងពីយូរណាស់មកហើយ។
មុននឹងទៅរោងកុន James Holmes បានរៀបចំដាក់អន្ទាក់ប៉ូលិសនៅក្នុងផ្ទះរបស់ខ្លួន។ គេបានដំឡើងប្រព័ន្ធបញ្ជាមួយ ពីចម្ងាយដើម្បីបញ្ជាបំពងសំឡេងចម្រៀងខ្លួនខ្លាំងដើម្បីទាក់ទាញប៉ូលិសឲ្យចូលទៅក្នុងផ្ទះ។ ទៅតាមផែនការ បើសិនប៉ូលិសចូលទៅក្នុងផ្ទះ នោះ គ្រឿងផ្ទុះស្វ័យប្រវត្តិនឹងសម្លាប់ប៉ូលិស ហើយប៉ូលិសទាំងក្រុងនឹងសម្រុកទៅកន្លែងកើតហេតុនៅផ្ទះរបស់ខ្លួន។ ដូច្នេះ James Holmesសង្ឃឹមថា នឹងពេលបាញ់សម្លាប់មនុស្សនៅរោងកុន ដោយគ្មានការរំខានពីប៉ូលិស។ គេថែមទាំងបានរៀបចំចតឡាន នៅមុខទ្វារចេញពីរោងកុនទៀតផង។ ប៉ុន្តែ អ្វីៗ មិនបានប្រព្រឹត្តទៅតាមផែនការ។ ប៉ូលិសបានស្ទាក់ចាប់បាន James Holmes នៅក្រោយគេបាញ់សម្លាប់មនុស្សនៅក្នុងរោងកុន។
នៅថ្ងៃសៅរ៍នេះ ប៉ូលិសត្រូវប្រើមនុស្សយន្តដើម្បីចូលដោះគ្រឿងផ្ទុះ ក្នុងផ្ទះរបស់ James Holmes។ ប៉ូលិសកំពុងធ្វើការយ៉ាងប្រយ័ត្នប្រយែង ព្រោះថា យុវជន James Holmesអាចមានបង្កប់គ្រឿងផ្ទុះច្រើន នៅក្នុងផ្ទះ។
រហូតមកដល់ពេលនេះ គេនៅមិនទាន់ដឹងពីមូលហេតុដែលជំរុញឲ្យ James Holmesប្រព្រឹត្តឧក្រិដ្ឋកម្មនៅឡើយទេ។ យុវជនរូបនេះមិនធ្លាប់មានឈ្មោះថ្កោលទោស នៅតុលាការ ហើយអាវុធទាំងបួនដើម និងឧស្ម័នបង្ហូរទឹកភ្នែកដែលប្រើសម្លាប់មនុស្សនៅក្នុងរោងកុន សុទ្ធសឹងជាអាវុធដែល James Holmesបានទិញយ៉ាងស្របច្បាប់ ចន្លោះខែឧសភា និងកក្កដា។ យ៉ាងណាក៏ដោយ មានហេតុផលមួយដែលគេវាយតម្លៃថា កត្តាជំរុញឲ្យយុវជន James Holmes សម្លាប់មនុស្ស។ James Holmesអាចមានចិត្តម៉ួម៉ៅក្តៅក្រហាយ ព្រោះថា បើទោះជាមានសញ្ញាប័ត្រថ្នាក់ខ្ពស់ច្រើន យុវជនរូបនេះនៅតែមិនអាចរកការងារល្អបានធ្វើ។ ការងារតែមួយដែល James Holmesរកបាន រហូតមកដល់ពេលនេះ គឺអ្នកលក់នំ នៅហាងMcDonalds៕
ស្តាប់ការផ្សាយមុនៗ
សេវា វិទ្យុបារាំងអន្តរជាតិ
អត្ថបទដែលពេញនិយមជាងគេ
អត្ថាធិប្បាយ
ប្រតិកម្មជុំវិញអត្ថបទនេះ