ជំនួបចរចារវាងតាលីបង់ និងអាមេរិកនៅក្នុងប្រទេសកាតារ
នៅថ្ងៃអាទិត្យ ទី២៩ មករាម្សិលមិញ ក្រុមឧទ្ទាមតាលីបង់បានប្រកាសប្រាប់ឲ្យដឹងពីការផ្តើមកិច្ចចរចាស្វែងរកសន្តិភាពជាមួយសហរដ្ឋអាមេរិកនៅក្នុងប្រទេសកាតារ។ កិច្ចចរចាដែលគ្មានវត្តមានភាគីប្រទេសអាហ្វហ្កានីស្ថាន និងប៉ាគីស្ថានទេ។ ប្រទេសប៉ាគីស្ថាន និងអាហ្វហ្កានីស្ថានដែលកំពុងព្យាយាមបើកកិច្ចចរចាជាមួយពួកតាលីបង់ដាច់ដោយឡែកនៅក្នុងប្រទេសអារ៉ាប៊ីសាអូឌីត។
ចុះផ្សាយនៅថ្ងៃ៖
ស្តាប់ - ០៥:៥២
ព័ត៌មានទាក់ទងនឹងកិច្ចចរចាដោយផ្ទាល់រវាងពួកឧទ្ទាមតាលីបង់ និងអាមេរិកនៅក្នុងប្រទេសកាតារត្រូវបានចុះផ្សាយដោយកាសែតអាមេរិកំាង New York Times នៅថ្ងៃអាទិត្យ ទី២៩ មករាម្សិលមិញ។ បន្ទាប់មក ព័ត៌មាននេះក៏ត្រូវបានបញ្ជាក់ជាផ្លូវការដោយ លោក Mawlavi Qalamuddin អតីតថ្នាក់ដឹកនំាជាន់ខ្ពស់តាលីបង់ និងបច្ចុប្បន្ន ជាសមាជិកនៃឧត្តមក្រុមប្រឹក្សាដើម្បីសន្តិភាពអាហ្វហ្កានីស្ថាន ដែលបានតែងតំាងដោយលោកប្រធានាធិបតីអាហ្វហ្កានីស្ថាន Hamid Karzaï។ យ៉ាងណាក៏ដោយ គេពិបាកនឹងទទួលបានព័ត៌មានលំអិតបន្ថែមជុំវិញជំនួបរវាងពួកតាលីបង់ និងសហរដ្ឋអាមេរិកពេលនេះ ព្រោះថា ជាជំនួបមួយដែលត្រូវបានគេរៀបចំឡើងយ៉ាងសម្ងាត់បំផុត ដោយគេមិនដឹងថា តើកិច្ចចរចានោះមានរយៈពេលប៉ុន្មានម៉ោង ប៉ុន្មាននាទី តើភាគីម្ខាងៗ មានគ្នាប៉ុន្មាននាក់ និងអ្នកដែលចូលរួមនោះ មានឋានៈកម្រិតណា។ បើតាមព័ត៌មានក្រៅផ្លូវការ ខាងតាលីបង់អាចនឹងមានគ្នាពី ៤ ទៅ៨នាក់ ហើយក្រុមគេ គឺជាក្រុមតាលីបង់ដែលមានមូលដ្ឋាននៅក្នុងប្រទេសប៉ាគីស្ថាន។ លោក Qalamuddin បានអះអាងថា គេនៅមិនទាន់អាចនិយាយជាកិច្ចចរចាសន្តិភាពបានទេ ព្រោះថា តំាងពីមុនកិច្ចចរចាចាប់ផ្តើម ភាគីទំាងពីរបានដាក់លក្ខខណ្ឌរបស់គេរៀងៗខ្លួន។ ខាងក្រុមតាលីបង់បានស្នើឲ្យអាមេរិកដោះលែងអ្នកទោសរបស់គេទំាងអស់ដែលអាមេរិកបានចាប់ឃុំនៅពន្ធនាគារ Guantanamo ស្ថិតក្នុងប្រទេសគុយបា។ នៅខាងអាមេរិកវិញ ទីក្រុងវ៉ាស៊ីនតោនបានស្នើឲ្យពួកឧទ្ទាមបញ្ឈប់រាល់អំពើហិង្សាទំាងអស់របស់ខ្លួន។ បើយោងតាមពួកតាលីបង់ ជំនួបរបស់គេជាមួយអាមេរិក ជាជំនួបដើម្បីស្វែងយល់គ្នា ក្នុងគោលដៅបង្កើតឲ្យមានបរិយាកាសនៃការទុកចិត្តគ្នាទៅវិញ ទៅមក។
អាហ្វហ្កានីស្ថាន និងប៉ាគីស្ថានចង់បើកកិច្ចចរចាជាមួយពួកតាលីបង់នៅអារ៉ាប៊ីសាអូឌីត
ប្រទេសអាហ្វហ្កានីស្ថាន និងប៉ាគីស្ថានមិនមានវត្តមាននៅក្នុងជំនួបរវាងពួកតាលីបង់ និងអាមេរិកនាពេលនេះទេ។ ហេតុផលទីមួយ មកពីអាហ្វហ្កានីស្ថាន និងប៉ាគីស្ថានចង់រៀបចំកិច្ចចរចាសន្តិភាពជាមួយពួកតាលីបង់ដាច់ដោយឡែកនៅក្នុងប្រទេសអារ៉ាប៊ីសាអូឌីត។ ហេតុផលទីពីរ មកពីក្រុមតាលីបង់ត្រូវបានចែកជាពីរក្រុម គឺក្រុមដែលបដិសេធជជែកផ្ទាល់ជាមួយអាមេរិក និងក្រុមដែលយល់ព្រមអង្គុយចរចាជាមួយគ្រប់ភាគីដែលពាក់ព័ន្ធ។ យ៉ាងណាក៏ដោយ ទោះបីជាកិច្ចចរចាត្រូវធ្វើឡើងជាមួយអ្នកណាក៏ដោយ ក៏គោលដៅមានតែមួយដូចគ្នា គឺស្វែងរកសន្តិភាពឲ្យប្រទេសអាហ្វហ្កានីស្ថាន។ អាហ្វហ្កានីស្ថានដែលកំពុងបន្តរុំារ៉ៃដោយសង្រ្គាមជាមួយពួកឧទ្ទាមតាលីបង់តំាងពី ១០ឆ្នំាកន្លងមក។
ជម្រើសចុងក្រោយ គឺចាប់ដៃជាមួយពួកតាលីបង់
តំាងពីរបបតាលីបង់ក្នុងប្រទេសអាហ្វហ្កានីស្ថានត្រូវបានកម្លំាងអន្តរជាតិ ដឹកមុខដោយអាមេរិកវាយរំលំនាដំណាច់ឆ្នំា ២០០១ មក ពួកតាលីបង់ត្រូវបានបែកខ្ញែក រត់ខ្ចាត់ខ្ចាយ។ ប៉ុន្តែរចនាសម្ព័ន្ធរបស់ក្រុមតាលីបង់នៅតែមាន។ ពួកតាលីបង់បានក្លាយខ្លួនជាទ័ពព្រៃ និងបើកការវាយឆ្មក់ទៅលើកម្លំាងអន្តរជាតិ និងកម្លំាងរដ្ឋាភិបាលអាហ្វហ្កានីស្ថានបច្ចុប្បន្ន។ តំាងពី ១០ឆ្នំាកន្លងទៅ ពិសេសតំាងពីឆ្នំា ២០០៥ មក ឥទ្ធិពលរបស់ពួកតាលីបង់បានផ្តើមមានកាន់តែខ្លំាង។ ពួកគេមានលទ្ធភាព និងសមត្ថភាពគ្រប់គ្រាន់ក្នុងការរៀបចំអំពើភេរវកម្មបង្ហូរឈាម នៅពេលណាក៏បាន និងនៅទីណាក៏បាន រហូតដល់ចំកណ្តាលបេះដូងទីក្រុងកាប៊ូលផងក៏មាន។ ឥទ្ធិពលដែលហាក់ដូចជាគ្មានកម្លំាងណាអាចទប់ទល់បានទេ ទំាងកម្លំាងអូតង់ ក៏ដូចជាកម្លំាងរបស់លោកប្រធានាធិបតីអាហ្វហ្កានីស្ថាន Hamid Karzaï។ លោក Karzaï ដែលមិនអាចគ្រប់គ្រងស្ថានការណ៍ឲ្យលើសពីព្រំដែនទីក្រុងកាប៊ូលនោះទេ។ ចំណែកប្រតិបត្តិការរបស់កម្លំាងអូតង់បែរជាបានសម្លាប់ជនស៊ីវិល ច្រើនជាងពួកឧទ្ទាមតាលីបង់ទៅវិញ។
កុំថាឡើយតែកម្លំាងបរទេសដែលពិបាកនឹងស្គាល់ថា នរណាជាទាហានអាហ្វហ្កានីស្ថាន និងនរណាជាពួកតាលីបង់ សូម្បីតែទាហានអាហ្វហ្កានីស្ថានខ្លួនឯងក៏ពិបាកនឹងបែងចែករវាងមុខមាត់ និងរាងរៅរបស់ពួកតាលីបង់ដែរ។ ម្យ៉ាងវិញទៀត ការធ្វើសង្រ្គាមប្រឆំាងនឹងទ័ពព្រៃ ក៏មិនមែនជារឿងងាយ ពិសេសកម្លំាងបរទេសដែលមិនស្គាល់ទីតំាងនៃការលាក់ខ្លួនរបស់ពួកឧទ្ទាម ដូចនៅប្រទេសអាហ្វហ្កានីស្ថានដែលសម្បូរទៅដោយព្រៃ ភ្នំ។ ដូច្នេះ ជម្រើសដែលល្អ ក្នុងការបិទបញ្ចប់សង្រ្គាមរុំារ៉ៃនៅក្នុងប្រទេសអាហ្វហ្កានីស្ថាន គឺការចរចា៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ