តៃវ៉ាន់-ចិន-ជប៉ុន -

អត្ថបទចុះផ្សាយនៅថ្ងៃ អង្គារ 25 កញ្ញា 2012 - ព័ត៌មានទើបកែប្រើលើកចុងក្រោយ ថ្ងៃ ពុធ 26 កញ្ញា 2012

តៃវ៉ាន់ជ្រៀតជ្រែកចូលក្នុងវិបត្តិរវាងចិន និងជប៉ុនក្នុងជម្លោះដណ្តើមទីប្រជុំកោះសេនកាគូ ឬ ទាវយូ

REUTERS/Kyodo

ដោយ គួច គន្ធារ៉ា

វិបត្តិរវាងចិន និងជប៉ុននៅក្នុងជម្លោះដណ្តើមទីប្រជុំកោះសេនកាគូ ឬ ទាវយូបានកើនមួយកម្រិតថែមទៀត។ បន្ទាប់ពីនាវាចិនបានបើកចូលក្នុងដែនសមុទ្រជប៉ុនកាលពីថ្ងៃច័ន្ទ ទី២៤ កញ្ញាមក ឥឡូវនេះដល់វេនតៃវ៉ាន់ម្តងដែលបានបញ្ជូននាវានេសាទ អមដំណើរដោយនាវាឆ្មំាសមុទ្ររបស់ខ្លួនទៅកាន់ដែនសមុទ្រជប៉ុននោះ។

សេចក្តីរាយការណ៍របស់ គួច គន្ធារ៉ា

ស្តាប់ (02:09)

25/09/2012 by គួច គន្ធារ៉ា

បើយោងតាមលោក Osamu Fujimura អ្នកនំាពាក្យរដ្ឋាភិបាលជប៉ុន មាននាវាឆ្មំាសមុទ្រតៃវ៉ាន់ចំនួន ៨គ្រឿង និងនាវានេសាទតៃវ៉ាន់ប្រមាណជា ៤០គ្រឿង ជាមួយនឹងអ្នកនេសាទតៃវ៉ាន់ ៣០០នាក់បានបើកចូលក្នុងដែនសមុទ្រជប៉ុននៅវេលាម៉ោង ៩ព្រឹក ម៉ោងក្នុងប្រទេសជប៉ុន។ នៅលើនាវានីមួយៗ គេសង្កេតឃើញមានដោតទង់ជាតិតៃវ៉ាន់ ជាមួយនឹងពាក្យស្លោកថា « យើងសច្ចាការពារទីប្រជុំកោះទាវយូ »។ នៅពេលដែលនាវាតៃវ៉ាន់កំពុងរំកិលខ្លួនចូលកាន់តែជិតក្នុងដែនសមុទ្រជប៉ុន កងឆ្មំាសមុទ្រជប៉ុនក៏បានស្រែកព្រមានកុំឲ្យពួកគេចូលជ្រៅថែមទៀត ដោយបានប្រើកាណុងបាញ់ទឹកបណ្តេញពួកគេចេញវិញ។ កងឆ្មំាសមុទ្រតៃវ៉ាន់ក៏បានប្រើកាណុងបាញ់ទឹកតបវិញ និងស្រែកវិញថា « នេះជាដែនសមុទ្ររបស់តៃវ៉ាន់ ហើយពួកយើងមានសិទ្ធិមកកាន់ទីនេះ »។

ក្នុងពេលជាមួយគ្នានេះ លោក Fujimura ក៏បានទាក់ទងទីក្រុងតៃប៉ិកដើម្បីបញ្ជាក់ជាថ្មីម្តងទៀត អំពីអធិបតេយ្យរបស់ប្រទេសជប៉ុនលើទីប្រជុំកោះសេនកាគូ។ ម្យ៉ាងទៀត លោក Fujimura ក៏បានរំលឹកឡើងវិញអំពីទំនាក់ទំនងល្អរវាងជប៉ុន និងតៃវ៉ាន់ដើម្បីស្វែងរកដំណោះស្រាយដោយសន្តិវិធីនៅក្នុងជម្លោះដែនដី។ ជម្លោះដែនដីដែលផ្តោតសំខាន់លើទីប្រជុំកោះសេនកាគូ ជាភាសាជប៉ុន ឬ ទាវយូ ជាភាសាចិន។ អ្វីជាការកត់សម្គាល់ នេះជាលើកទីមួយហើយដែលមាននាវាតៃវ៉ាន់ជាច្រើនគ្រឿងហ៊ានបានបើកចូលកៀកទីប្រជុំកោះកំពុងមានជម្លោះនោះ។ គួរជម្រាបជូនថា កាលពីឆ្នំា ១៩៩៦ គេធ្លាប់ឃើញមានព្រឹត្តិការណ៍របៀបនេះម្តងហើយដែលកាលណោះ មាននាវាប្រមាណជា ៤០គ្រឿងរួមគ្នាមកពីតៃវ៉ាន់ និងហុងកុង។

យ៉ាងណាក៏ដោយ ការជ្រៀតជ្រែកពីសំណាក់តៃវ៉ាន់នៅក្នុងជម្លោះដណ្តើមទីប្រជុំកោះសេនកាគូ ឬ ទាវយូពេលនេះបានកើតមានឡើង ចំពេលដែលចិន និងជប៉ុនកំពុងដំឡើងសរសៃ ក ដាក់គ្នាយ៉ាងខ្លំាងក្នុងរយៈពេលប៉ុន្មានសប្តាហ៍ចុងក្រោយនេះ ពិសេស បន្ទាប់ពីទីក្រុងតូក្យូមានគម្រោងទិញកោះមួយចំនួននៃទីប្រជុំកោះសេនកាគូ ឬ ទាវយូពីម្ចាស់ជាជនជាតិជប៉ុនមកធ្វើជាសម្បត្តិរបស់រដ្ឋ។ តែក្រុមអ្នកវិភាគបានមើលឃើញថា ទីក្រុងតៃប៉ិក និងប៉េកំាងហាក់ដូចជាបាននិងកំពុងពួតដៃគ្នាដាក់គំនាបលើទីក្រុងតូក្យូ៕