កាលពីល្ងាច​ថ្ងៃ​អង្គារ ម្សិលមិញ ផ្ទះ និង​ការិយាល័យ​របស់​លោក​អតីត​ប្រធានាធិបតី​បារាំង នីកូឡា សាកូហ្ស៊ី ត្រូវ​បាន​ប៉ូលិស​ធ្វើការ​ឆែកឆេរ នៅ​ក្នុងការ​ស៊ើបអង្កេត​ អំពី​បទសង្ស័យថា​មាន​ការទទួល​​លុយ​ដោយ​ខុសច្បាប់ នៅ​ក្នុង​យុទ្ធនាការ​ឃោសនា​បោះឆ្នោត​ប្រធានាធិបតី កាល​ពី​ឆ្នាំ​២០០៧។

លោក​ Didier Migaud ​ប្រធាន​តុលាការ​គណនី​ La Cour des comptes ​ដែលជា​ស្ថាប័ន​ត្រួត​ពិនិត្យ​គណនី​រដ្ឋ​បាន​ប្រគល់​របាយការណ៍​ នៅ​ថ្ងៃចន្ទ​ទី២​កក្កដា​ឆ្នាំ២០១២​ម្សិលមិញ​ ជូន​លោកនាយក​រដ្ឋមន្ត្រី​បារាំង​ Jean-Marc Ayrault ។​ របាយការណ៍​ដែល​ស្នើសុំ​ដោយ​លោក​ប្រធានាធិបតី​ ហ្វ្រង់ស័រ​ ហូឡង់​ ​បានបង្ហាញ​ឲ្យដឹង​ថា​ ​ ឆ្នាំនេះ​រដ្ឋាភិបាល​បារាំង​ត្រូវ​រក​ប្រាក់​ចំណូល​បន្ថែម​ឲ្យបាន​ពី​៦ទៅ១០​ពាន់លាន​អឺរ៉ូ​បន្ថែម​ទៀត​ ​ បើ​ប្រទេស​បារាំង​ចង់គោរព​ពាក្យសន្យា​របស់ខ្លួន​ថា​ ​ នឹង​ធ្វើឲ្យ​អត្រា​ឧនភាព​សាធារណៈ​ធ្លាក់មកនៅ​៤,៥%​នៅឆ្នាំ២០១២​

នាឱកាស​ជំនួប​កំពូល​អឺរ៉ុប​នៅ​ទីក្រុង​ព្រុចសែល​នៅ​យប់​ថ្ងៃព្រហស្បតិ៍​ទី២៨​មិថុនា​ឆ្នាំ២០១២​ ​ ប្រមុខ​ដឹកនាំ​អឺរ៉ុប​សម្រេច​បាន​នូវ​កិច្ចព្រមព្រៀង​មួយ​ ​ ដើម្បី​ឈានទៅ​ធ្វើការ​កែទម្រង់​រចនា​សម្ព័ន្ធ​នៅក្នុង​តំបន់អឺរ៉ូ​ ​ ហើយនឹង​ភ្ជាប់​មក​ជាមួយ​សហភាព​អឺរ៉ុប​២៧ប្រទេស​នូវ​ កិច្ចព្រមព្រៀង​ជំរុញ​ឲ្យមាន​សន្ទុះ​កំណើន​សេដ្ឋកិច្ច​ ​ ដែលនឹង​អនុញ្ញាត​ឲ្យ​កេណ្ឌ​ប្រមូល​បាន​១២០​ពាន់លាន​អឺរ៉ូ​សម្រាប់​បម្រើ​នយោបាយ​កំណើន​សេដ្ឋកិច្ច។​

ប្រទេស​ក្នុង​តំបន់​ចាយ​ប្រាក់អឺរ៉ូ​កំពុង​ឋិត​នៅ​ក្រោម​សម្ពាធ​មួយ​ដ៏​ខ្លាំងក្លា​ ​ ដោយហេតុតែ​គេ​នៅ​រង់ចាំ​ចម្លើយ​និង​ដំណោះស្រាយ​ដ៏​មហិច្ឆតា​របស់ខ្លួន​ នាឱកាស​ជំនួប​កំពូល​អឺរ៉ុប​នៅ​ទីក្រុង​ព្រុចសែល​ដែល​នឹង​ត្រូវ​ប្រព្រឹត្ត​ទៅ​នៅថ្ងៃ​ទី២៨​មិថុនា​និង​ថ្ងៃទី​២៩មិថុនា​ខាងមុខនេះ។​