ស៊ីរី-ONU -

អត្ថបទចុះផ្សាយនៅថ្ងៃ អង្គារ 02 តុលា 2012 - ព័ត៌មានទើបកែប្រើលើកចុងក្រោយ ថ្ងៃ អង្គារ 02 តុលា 2012

ប្រមុខការទូតស៊ីរីបានចោទបារំាង និងអាមេរិកពីបទបានគំាទ្រក្រុមភេរវជន

លោករដ្ឋមន្រ្តីក្រសួងការបរទេសស៊ីរី Walid Mouallem (រូបឆ្វេង) និងលោកអគ្គលេខាធិការអង្គការសហប្រជាជាតិ បាន គីមូន

REUTERS/Lucas Jackson

ដោយ គួច គន្ធារ៉ា

នៅថ្ងៃបិទមហាសន្និបាតអង្គការសហប្រជាជាតិទី ១ តុលាម្សិលមិញ លោករដ្ឋមន្រ្តីក្រសួងការបរទេសស៊ីរី Walid Mouallem បានចោទប្រទេសមួយចំនួនរួមមាន៖បារំាង សហដ្ឋអាមេរិក តួកគី និងប្រទេសអារ៉ាប៊ីសាអូឌីត ពីបទបានជួយគំាទ្រក្រុមភេរវជននៅក្នុងប្រទេសស៊ីរី។ យោងតាមលោក Walid Mouallem ទីក្រុងប៉ារីស និងទីក្រុងវ៉ាស៊ីនតោនបានជួយឧបត្ថម្ភជាប្រាក់ និងបំពាក់អាវុធឲ្យក្រុមឧទ្ទាម។

សេចក្តីរាយការណ៍របស់ គួច គន្ធារ៉ា

ស្តាប់ (01:25)

02/10/2012 by គួច គន្ធារ៉ា

គឺនៅក្នុងវេទិកានៃមហាសន្និបាតអង្គការសហប្រជាជាតិលើកទី ៦៧ក្នុងទីក្រុងញូយ៉កដែលលោកប្រមុខការទូតស៊ីរី Walid Mouallem បានថ្លែងការពាររបបស៊ីរីរបស់លោកប្រធានាធិបតី Bachar al-Assad។ នៅក្នុងសុន្ទរកថារបស់លោក Mouallem មានពាក្យ « ភេរវជន » និង« ភេរវនិយម » មិនតិចជាង ២៤ដងទេ ដែលលោកបាននិយាយហើយ និយាយទៀត ដោយបានចោទក្រុមប្រទេសក្នុងតំបន់ឈូងសមុទ្រពែក និងប្រទេសតួកគី ពិសេសបារំាង និងសហរដ្ឋអាមេរិកថាបានជួយផ្តល់លុយកាក់ និងបំពាក់អាវុធឲ្យក្រុមយុទ្ធជនបរទេសដើម្បីប្រឆំាងនឹងរដ្ឋាភិបាលស៊ីរី។

« អ្វីដែលអាក្រក់បំផុតនោះ គឺនៅពេលដែលគេឃើញមានសមាជិកអចិន្ត្រៃយ៍នៃក្រុមប្រឹក្សាសន្តិសុខបានធ្វើសង្រ្គាមវាយប្រហារប្រទេសផ្សេង ក្រោមលេសថា ជាយុទ្ធនាការប្រយុទ្ធប្រឆំាងនឹងភេរវនិយម និងដែលឥឡូវនេះ បែរជាបានចេញមុខជួយគំាទ្រក្រុមភេរវជននៅក្នុងប្រទេសស៊ីរីទៅវិញ » នេះជាការថ្លែងរបស់លោក Walid Mouallem។

ពាក់ព័ន្ធនឹងនយោបាយផ្ទៃក្នុងស៊ីរីវិញ លោក Walid Mouallem បានបញ្ជាក់ថា រដ្ឋាភិបាលបានដាក់សំណើសុំបើកការចរចាជាមួយក្រុមប្រឆំាង តែក្រុមប្រឆំាងមិនបានឆ្លើយតបនឹងសំណើនោះទេ។ យ៉ាងណាក៏ដោយ លោក Walid Mouallem មិនបាននិយាយដល់ការបាត់បង់ជនស៊ីវិលស្លូតត្រង់ ក្រោមការទម្លាក់គ្រាប់បែករបស់ទាហានរដ្ឋាភិបាលស៊ីរីទេ។ ត្រង់ចំណុចនេះ លោកអគ្គលេខាធិការអង្គការសហប្រជាជាតិ បាន គីមូនដែលបានជួបលោក Walid Mouallem បានស្នើលោក Mouallem ឲ្យមានការអត់ធ្មត់ និងចេះអាណិតអាសូរប្រជាជនខ្លួនឯង៕