ស៊ីរី៖កងទ័ពអាកាសបានបាញ់បំផ្លាញយន្តហោះចំបាំងពីរគ្រឿងដែលរិបអូសដោយក្រុមជីហាត
កងទ័ពជើងអាកាសស៊ីរី ទើបបានបាញ់បំផ្លាញយន្តហោះចំបាំងពីរគ្រឿងក្នុងចំណោមយន្តហោះ៣ដែលបានធ្លាក់នៅក្នុងកណ្តាប់ដៃរបស់អង្គការរដ្ឋអ៊ីស្លាម-នេះជាសេចក្តីជូនដំណឹងរបស់រដ្ឋមន្ត្រីក្រសួងព័ត៌មានស៊ីរី លោក Omran al-Zohbi។
ចុះផ្សាយនៅថ្ងៃ៖
ស្តាប់ - ០២:១៩
ចាប់តាំងពីប៉ុន្មានថ្ងៃកន្លងមកហើយ គេនិយាយច្រើនតែពីរឿងយន្តហោះចម្បាំងធុនមិច(MIGS)៣គ្រឿងដែលអង្គការរដ្ឋអ៊ីស្លាម រិបអូសបាននៅអាកាសយានដ្ឋានកងទ័ពជើងអាកាសស៊ីរី។ អាកាសយានដ្ឋានដែលឥឡូវស្ថិតនៅក្រោមការកាន់កាប់របស់អង្គការរដ្ឋអ៊ីស្លាម នៅភាគខាងជើងនៃខេត្ត AlepនិងRaqa ។ គឺជាយន្តហោះចំបាំងធុន MIGS ដែលក្រុមអ៊ីស្លាមជីហាត បានដាក់ឲ្យដំណើរការហោះហើរដូចបំណង។
ម្យ៉ាងទៀត អង្គការសង្កេតការណ៍សិទ្ធមនុស្សនៅស៊ីរី(OSDH) កាលពីថ្ងៃសុក្រទី១៧តុលាមុន បានអះអាងថាខ្លួន បានទទួលសក្ខីភាពជាច្រើនបញ្ជាក់ប្រាប់ពីវត្តមានយន្តហោះចំបាំងមួយចំនួនដែលគេមិនស្គាល់ បានហោះហើរក្នុងកំពស់ដ៏ទាបបំផុតចេញពីមូលដ្ឋាន អាកាសចរណ៍នៅ Al Djarrah ជិតក្រុង Alep។
ក៏ប៉ុន្តែរហូតមកទល់ពេលនេះ គេនៅពុំទាន់ឃើញមានរូបភាពណាមួយពីយន្តហោះទាំងនោះផ្សព្វផ្សាយនៅលើគេហទំព័ររបស់ពួកអ៊ីស្លាមជីហាតឡើយ។ ក៏ប៉ុន្តែកាលពីថ្ងៃពុធម្សិលមិញ គឺរដ្ឋាភិបាលក្រុងដាម៉ាសខ្លួនឯងតែម្តងដែលចេញមុខអះអាងថា » អង្គការក្រុមភេរវជន ពិតជាមានយន្តហោះនោះមែននិងបានដាក់ឲ្យមានដំណើរការផង »។ ស្របគ្នានេះ ក្រុងដាម៉ាសបានបញ្ជាក់បន្ថែមទៀតថា កងទ័ពស៊ីរី ទើបបានបំផ្លាញយន្តហោះចំនួនពីរគ្រឿងក្នុងចំណោម៣គ្រឿងដែលខ្លួនតាមស្វែងរក។
យន្តហោះធុន(MIGS)ទាំងនោះ ត្រូវបានគេបាញ់បំផ្លាញចោលនៅខណៈដែលវាចុះចតនៅលើផ្លូវយន្តហោះ-នេះបើយោងតាមប្រភពផ្លូវការស៊ីរី ។គឺជាព័ត៌មានមួយដែលគេពុំអាចបញ្ជាក់ថាជាព័ត៌មានពិតឬក៏អត់នោះទេនៅក្នុងដំណាក់ការនេះ។ កងទ័ពស៊ីរីរបស់លោកអាសាត ទោះបីជាកម្លំាងទឹកចិត្ត បានធ្លាក់ចុះទន់ខ្សោយក្តី ក៏នៅតែមានជំហរសមត្ថភាពដឹកនាំការវាយប្រហារតាមជើងអាកាសយ៉ាងសម្បើមអស្ចារ្យដែរ។
ទន្ទឹមនេះ អង្គការសង្កេតការណ៍សិទ្ធមនុស្សនៅស៊ីរី បានរំលឹកប្រាប់កាលពីថ្ងៃអង្គារ៍មុនថា- គ្រាន់តែរយៈពេល៣៦ម៉ោងប៉ុណ្ណោះ កងទ័ពអាកាសស៊ីរី បានធ្វើប្រតិបត្តិការវាយប្រហារយ៉ាងចាស់ដៃប្រឆាំងទល់នឹងអង្គការរដ្ឋអ៊ីស្លាមជាង២០០លើក ជាពិសេស នៅខេត្តជាច្រើនដូចជា នៅ Hama, Deraa, D’Idleb, Alep និង Jybeutran ក៏ព្រមទាំងនៅខេត្ត Deir Ezzorទៀតផង៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ