កម្ពុជា -

អត្ថបទចុះផ្សាយនៅថ្ងៃ ចន្ទ 30 កក្កដា 2012 - ព័ត៌មានទើបកែប្រើលើកចុងក្រោយ ថ្ងៃ ចន្ទ 30 កក្កដា 2012

ដាក់ញត្តិទៅស្ថានទូតស្វែងរកអន្តរាគមន៍ដោះលែងលោកម៉មសូណង់ដូ

ក្រុមអ្នកគាំទ្រនាំគ្នាទាមទារឲ្យដោះលែងលោកម៉ម សូណង់ដូ

RFI/Channa Siv

ដោយ លី ម៉េងហួរ

នៅព្រឹកថ្ងៃចន្ទនេះ ក្រុមអ្នកគាំទ្រលោកម៉ម សូណង់ដូ ក្នុងនាមសមាគមអ្នកប្រជាធិបតេយ្យ បានដាក់ញត្តិដាច់ដោយឡែកពីគ្នា ទៅកាន់ស្ថានទូត ចំនួន ៩ នៅកម្ពុជា។ ញត្តិទាំងនោះ ធ្វើឡើង ដើម្បីស្វែងរកអន្តរាគមន៍ពីស្ថានទូត ដែលរួមទាំងប្រទេសមហាអំណាច ឲ្យមានការដោះលែងលោកម៉ម សូណង់ដូ ពីពន្ធនាគារព្រៃស។ លោកម៉មសូណង់ដូ អាយុ ៧២ ឆ្នាំ ដែលត្រូវបានប៉ូលិសចាប់ខ្លួន កាលពីថ្ងៃទី១៥កក្កដា ពាក់ព័ន្ធនឹងជម្លោះដីធ្លី នៅខេត្តក្រចេះ មកដល់ពេលនេះ បានធូរស្បើយបន្តិចពីជំងឺផ្តាសាយ ប៉ុន្តែលោកសម្រាន្តមិនសូវបានឡើយ។

សេចក្តីរាយការណ៍របស់ លី ម៉េងហួរ ពីភ្នំពេញ

ស្តាប់ (02:26)

30/07/2012

សកម្មជនអ្នកគាំទ្រលោកម៉ម សូណង់ដូ បានហែញត្តិដាក់ទៅកាន់ស្ថានទូតចំនួន ៩ នាព្រឹកថ្ងៃចន្ទនេះ។ ញត្តិទាំងនោះ ធ្វើឡើងដោយប្រធានសាខាសមាគមអ្នកប្រជាធិបតេយ្យ ដែលស្ថិតនៅ ១២ ខេត្ត។ កម្មវត្ថុនៃញត្តិ ដែលមានអត្ថន័យដូចៗគ្នាទាំងនោះ គឺស្នើសុំអន្តរាគមន៍ពីស្ថានទូតបរទេស ឲ្យជួយដោះលែងលោក ម៉ម សូណង់ដូ ប្រធានសមាគមអ្នកប្រជាធិបតេយ្យ និងជានាយកវិទ្យុសំបុកឃ្មុំ។

ញត្តិទាំងនោះ ត្រូវបានដាក់ទៅកាន់ស្ថានទូត ចំនួន ៩ នៅភ្នំពេញ រួមមាន៖ ស្ថានទូតអាមេរិក អូស្ត្រាលី កាណាដា បារាំង អង់គ្លេស អាល្លឺម៉ង់ ជប៉ុន ថៃ និងស្ថានទូតសិង្ហបុរី។

លោកស្រី ហួត ផាន់ណារី អគ្គលេខាធិការរង សមាគមអ្នកប្រជាធិបតេយ្យ ដែលមានលោក ម៉ម សូណង់ដូ ជាប្រធាន បានឲ្យដឹងថា សមាគមក៏បានប្រមូលស្នាមមេដៃរបស់មហាជន ដែលបានចាប់ផ្តើមកាលពីថ្ងៃទី២៣កក្កដា ឆ្នាំ២០១២ មកដល់ពេលនេះ សមាគមប្រមូលបានជាង ៤ម៉ឺននាក់។ ស្នាមមេដៃមហាជនទាំងនោះ ធ្វើឡើងក្នុងញត្តិ ដើម្បីស្នើសុំការដោះលែងលោកម៉ម សូណង់ដូ ហើយសមាគមនឹងដាក់ទៅកាន់រដ្ឋាភិបាល និងស្ថានទូតនានា នាពេលខាងមុខ។

លោក ម៉ម សូណង់ដូ ត្រូវបានប៉ូលិសចាប់ខ្លួន កាលពីថ្ងៃទី១៥ ខែកក្កដា ឆ្នាំ២០១២ បន្ទាប់ពីលោកបានវិលត្រឡប់មកពីសហរដ្ឋអាមេរិក បានតែបីថ្ងៃប៉ុណ្ណោះ។ តុលាការបានសម្រេចឃុំខ្លួនលោកម៉ម សូណង់ដូ នៅពន្ធនាគារព្រៃស ក្រោមការចោទប្រកាន់ពីបទផ្តួចផ្តើមគំនិតប្រឆាំងអ្នករាជការសាធារណៈ ធ្វើកុបកម្ម ជ្រៀតជ្រែកខុសច្បាប់ នៅក្នុងការបំពេញមុខងារសាធារណៈ ញុះញង់ឲ្យប្រជាពលរដ្ឋកាន់កាប់អាវុធខុសច្បាប់ និងប្រឆាំងនឹងអាជ្ញាធរស្របច្បាប់ ដែលមានចែងក្នុងមាត្រាមួយចំនួន នៃក្រមព្រហ្មទណ្ឌ។

ការចោទប្រកាន់លើលោកម៉ម សូណង់ដូ គឺតុលាការបានភ្ជាប់នឹងករណីជម្លោះដី ដែលបង្កឡើងដោយប្រជាពលរដ្ឋមួយក្រុម ដែលជាសាខាសមាគមអ្នកប្រជាធិបតេយ្យ នៅក្នុងភូមិប្រម៉ា ឃុំកំពង់ដំរី ស្រុកឆ្លូង ខេត្តក្រចេះ។ ករណីជម្លោះដី ដែលអាជ្ញាធររដ្ឋាភិបាល ចោទប្រកាន់ថា អ្នកទាំងនោះចាប់ដីរដ្ឋ បង្កើតតំបន់អបគមន៍ ហើយត្រូវបានរដ្ឋាភិបាល បង្ក្រាប និងបណ្តេញចេញ កាលពីថ្ងៃទី១៦ឧសភា ឆ្នាំ២០១២ បណ្តាលឲ្យក្មេងស្រីម្នាក់ស្លាប់ និងមនុស្សជាច្រើនបានរត់គេចខ្លួន ពីការតាមចាប់របស់តុលាការខេត្តក្រចេះ។

លោកស្រី ហួត ផាន់ណារី អគ្គលេខាធិការរងសមាគមអ្នកប្រជាធិបតេយ្យ ដែលទើបនឹងចេញពីសួរសុខទុក្ខលោកម៉ម សូណង់ដូ បានឲ្យដឹងថា មកដល់ថ្ងៃចន្ទនេះ លោកម៉ម សូណង់ដូ បានធូរស្បើយពីជំងឺផ្តាសាយធំបន្តិចហើយ ប៉ុន្តែលោកម៉ម សូណង់ដូ ដែលមានអាយុ ៧២ឆ្នាំហើយនោះ សម្រាន្តមិនសូវបានទេ ដោយក្នុងមួយយប់ៗ គាត់សម្រាន្តបានតែ ២ ទៅ ៣ម៉ោងប៉ុណ្ណោះ៕