ស៊ុយអែតប្រកាសទទួលស្គាល់ដែនដីប៉ាឡេស្ទីនជារដ្ឋស្របច្បាប់
ប្រមុខការទូតស៊ុយអែត លោកស្រី ម៉ាហ្កូ វលស្រ្តូម (Margot Wallström)បានជូនដំណឹងនៅថ្ងៃព្រហស្បតិ៍៣០តុលា « ថា ស៊ុយអែតទទួលស្គាល់តាមរយៈក្រិត្យរដ្ឋាភិបាល“ ប៉ាឡេស្ទីនជារដ្ឋស្របច្បាប់មួយ”។ ដូច្នេះ ស៊ុយអ៊ែត បានក្លាយជាប្រទេសលោកខាងលិចមុនគេបង្អស់នៅសហភាពអ៊ឺរ៉ុបដែលបានធ្វើសេចក្តីសម្រេចចិត្តបែបនេះ ។ នៅឯដែនដីប៉ាឡេស្ទីនវិញ លោក Mahmoud Abbas ប្រធានរដ្ឋអំណាចប៉ាឡេស្ទីន បានសម្តែងការអបអរសាទរនិងអំពាវនាវដល់ប្រទេសដ៏ទៃទៀតឲ្យយកគំរូតាមស៊ុយអ៊ែត។
ចុះផ្សាយនៅថ្ងៃ៖
ស្តាប់ - ០២:២០
“រដ្ឋាភិបាលស៊ុយអែតនៅថ្ងៃនេះ បានប្រកាសទទួលស្គាល់ “ថាប៉ាឡេស្ទីនជារដ្ឋស្របច្បាប់មួយ។ “គឺជាជំហានដ៏សំខាន់មួយដែលបញ្ជាក់សិទ្ធិរបស់ប្រជាជនប៉ាឡេស្ទីននៅក្នុងការប្តេជ្ញាចិត្តដោយខ្លួនឯង”-នេះជាការគូសបញ្ជាក់របស់រដ្ឋមន្ត្រីក្រសួងការបរទេសស៊ុយអែតនៅក្នុងវេទិកាមួយដែលចុះផ្សាយដោយកាសែតស៊ុយអែត Dagens Nyheter។
នៅចំពោះមុខរដ្ឋាភិបាលស៊ុយអ៊ែត “ប៉ាឡេស្ទីន មានលក្ខណវិនិច្ឆ័យគ្រប់គ្រាន់ស្របទៅតាមច្បាប់អន្តរជាតិ ក្នុងការទទួលស្គាល់ ប៉ាឡេស្ទីន ជារដ្ឋស្របច្បាប់”។ ស្របច្បាប់ពីព្រោះ ប៉ាឡេស្ទីន ជាដែនដីមួយ បើទោះបីជានៅមិនទាន់មានការកំណត់ព្រំដែនជាក់លាក់ក្តីនិងមានប្រជាជនខ្លួនក៏ព្រមទាំងរដ្ឋាភិបាលមួយដែរ-នេះជាការថ្លែងបន្ថែមរបស់លោកស្រីរដ្ឋមន្ត្រីក្រសួងការបរទេសស៊ុយអ៊ែត។
យោងតាមទីភ្នាក់ងារព័ត៌មានបារាំងAFP « ប្រទេសយ៉ាងតិចក៏ចំនួន ១១២ ដែរ ដែលបានទទួលស្គាល់ ប៉ាឡេស្ទីនថាជារដ្ឋស្របច្បាប់ “។ ក៏ប៉ុន្តែ យោងតាមអាជ្ញាធរប៉ាឡេស្ទីនវិញ “ ប្រទេសដែលបានទទួលស្គាល់រដ្ឋប៉ាឡេស្ទីន-មានទាំងអស់ ១៣៤ប្រទេស ក្នុងនោះ ៧ប្រទេសជាសមាជិករបស់សហភាពអ៊ឺរ៉ុប ដូចជាសាធារណរដ្ឋឆែក ហុងគ្រី ប៉ូឡូញ ប៊ុលហ្ការី រ៉ូមានី ម៉ាល់ និងស្ស៊ីព្រ។ ប្រទេសទាំងអស់នេះ បានទទួលស្គាល់ប៉ាឡេស្ទីនជារដ្ឋស្របច្បាប់ ចាប់តាំងពីប្រទេសខ្លួននៅមិនទាន់បានចូលជាសមាជិករបស់សហភាពអ៊ឺរ៉ុបនៅឡើយ។ នាយករដ្ឋមន្ត្រីស៊ុយអ៊ែត លោក Stefan Löfven កាលពីខែតុលាមុន ក៏ធ្លាប់បានជូនដំណឹងម្តងរួចមកហើយ ថាស៊ុយអ៊ែតនឹងធ្វើការទទួលស្គាល់ប៉ាឡេស្ទីនជារដ្ឋស្របច្បាប់ដែល ជាហតុបណ្តាលឲ្យ អ៊ីស្រាអែលនិងអាមេរិក ទិតៀនរិះគន់យ៉ាងខ្លាំង។
នៅឯក្រុងរ៉ាម៉ាឡាដែនដីប៉ាឡេស្ទីនវិញ លោក ម៉ាម៊ូត អាបាស់ ប្រធានរដ្ឋអំណាចប៉ាឡេស្ទីន បានសម្តែងក្តីសាទរឥតឧបមាចំពោះការទទួលស្គាល់ប៉ាឡេស្ទីនជារដ្ឋស្របច្បាប់ពីសំណាក់ស៊ុយអ៊ែត។ លោកប្រធានរដ្ឋអំណាចប៉ាឡេស្ទីនថែមទាំងអំពាវនាវសុំឲ្យប្រទេសដទៃទៀតយកគំរូបតាមស៊ុយអែតដែរ។
ទន្ទឹមគ្នានេះដែរ អំពើហិង្សាកើតឡើងជាថ្មីនៅជែរូសាឡឹម បន្ទាប់ពីជនប៉ាឡេស្ទីនម្នាក់បានប៉ុនប៉ងសម្លាប់សកម្មជន នយោបាយអ៊ីស្រាអែលម្នាក់ ហើយភ្លាមៗនោះដែរ ជនប៉ាឡេស្ទីននោះ ត្រូវបានក្រុមប៉ូលីសបាញ់សម្លាប់នៅព្រឹកមិញ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ