តើនាវាមុជទឹករុស្ស៊ីអាចចូលក្នុងដែនទឹកស៊ុយអែតដែរឬទេ?
ចុះផ្សាយនៅថ្ងៃ៖
នៅប៉ុន្មានថ្ងៃនេះ ស៊ុយអែតបានធ្វើការយ៉ាងសកម្មដើម្បីស្វែងរកវត្ថុចម្លែកក្នុងដែនទឹករបស់ខ្លួន នៅក្នុងសមុទ្របាល់ទិក។ សារព័ត៌មានក្នុងស្រុកបានចុះផ្សាយពីវត្តមាននាវាមុជទឹករុស្ស៊ី នៅក្នុងដែនទឹកស៊ុយអែត ប៉ុន្តែ ទីក្រុងម៉ូស្គូ បានបដិសេធរួចជាស្រេចថា គ្មាននាវាមុជទឹករបស់ខ្លួនរបស់ខ្លួន នៅក្នុងសមុទ្របាល់ទិករបស់ស៊ុយអ៊ែតទេ។ ការសង្ស័យមាននាវាមុជទឹកបរទេសនៅក្នុងដែនទឹករបស់ស៊ុយអែតបានធ្វើឲ្យគេនឹកទៅដល់សម័យសង្រ្គាមត្រជាក់ ក្នុងទសវត្សរ៍ឆ្នាំ ១៩៨០ ដែលកាលណោះ អតីតសហភាពសូវៀតឧស្សាហ៍បញ្ជូននាវាមុជទឹករបស់ខ្លួន ចូលទៅក្នុងដែនទឹករបស់ស៊ុយអែត។ យើងស្តាប់បទអត្ថាធិប្បាយរបស់ឈាង បុប្ផា
នៅមិនទាន់មានដំណឹងផ្លូវការណាមួយដែលបង្ហាញថា នាវាមុជទឹករបស់រុស្ស៊ីបានចូលទៅក្នុងដែនទឹករបស់ស៊ុយអែត ក្នុងសមុទ្របាល់ទិកនៅឡើយទេ។ ប៉ុន្តែ ចាប់តាំងពីថ្ងៃសុក្រសប្តាហ៍មុន អាជ្ញាធរស៊ុយអែតបានបើកប្រតិបត្តិការប្រើនាវាចម្បាំងរបស់ខ្លួន ដើម្បីរុករកវត្ថុចម្លែក ដែលគេសង្ស័យថា អាចជានាវាមុជទឹក ឬឧបករណ៍យោធា ដែលរុស្ស៊ីអាចបញ្ជូនទៅក្នុងដែនទឹកស៊ុយអែត។ នេះបើតាមការចុះផ្សាយរបស់កាសែតក្នុងស្រុកស៊ុយអែត។ តាមកាសែតដដែល កងទ័ពស៊ុយអែតបានអះអាង ថា គេចាប់បានសំឡេងទាក់ទងមួយ ជាភាសារុស្ស៊ី។ ហើយចំជួន នៅប៉ុន្មានថ្ងៃនេះ កប៉ាល់ទេសចរណ៍រុស្ស៊ីបានចូលទៅក្នុងដែនទឹកស៊ុយអែត។ ដូច្នេះ គេសង្ស័យថា កប៉ាល់ទេសចរណ៍រុស្ស៊ីអាចបន្លំ ចូលទៅទម្លាក់កូននាវាមុជទឹក នៅក្នុងដែនទឹកស៊ុយអែត។
រដ្ឋាភិបាល ស៊ុយអែតបានសន្យាពន្យារពេលរុករកក្នុងសប្តាហ៍នេះ មុននឹងធ្វើការប្រកាសព័ត៌មានជាផ្លូវការ។ ដំណឹងស្តីពីវត្តមាននាវាមុជទឹកបរទេស ក្នុងដែនទឹករបស់ខ្លួនបានធ្វើឲ្យ ស៊ុយអែតចាត់វិធានការពង្រឹងផ្នែកការពាររបស់ខ្លួន។ ឧប្បត្តិហេតុលើកនេះ កើតឡើងនៅតែប៉ុន្មានថ្ងៃមុនការកំណត់ថវិកាយោធារបស់រដ្ឋាភិបាល ស៊ុយអែតថ្មី។ ប៉ុន្តែ កាលពីថ្ងៃអង្គារ នាយករដ្ឋមន្រ្តីថ្មីរបស់ ស៊ុយអែត លោកStefan Lofvenបានប្រកាសរួចហើយថា រដ្ឋាភិបាលរបស់លោកនឹងប្រកាសបង្កើនថវិកាកងទ័ព នៅថ្ងៃព្រហស្បតិ៍។
រដ្ឋាភិបាល ស៊ុយអែតមិនបានមើលស្រាល ប៉ុន្តែ ចាត់ទុកវត្តមានរបស់ទ័ពបរទេស ជាពិសេសរុស្ស៊ី ក្នុងដែនទឹករបស់ខ្លួនថា ជាការគំរាមកំហែងដល់សន្តិសុខជាតិ។ ស៊ុយអែតមានហេតុផលដែលត្រូវព្រួយបារម្ភពីសន្តិសុខរបស់ខ្លួន ពីព្រោះថា មូលដ្ឋានទ័ពរុស្ស៊ី នៅទីក្រុងកាលីនីនក្រាត ដែលនៅដាច់ចេញពីទឹកដីរុស្ស៊ី ប៉ុន្តែ ស្ថិតនៅទល់មុខនឹងទឹកដីស៊ុយអែតតែម្តង។
ចាប់តាំងពីវិបត្តិអ៊ុយក្រែនរុស្ស៊ី បានផ្ទុះ ស៊ុយអែត និងប្រទេសអតីតសហភាពសូវៀតជាច្រើន នៅសមុទ្របាល់ទិកបារម្ភថា រុស្ស៊ីនឹងអាចទៅឈ្លានពាន ពង្រីកដែនឥទ្ធិពលរបស់ខ្លួន នៅសមុទ្របាល់ទិកបន្តទៀត។ តាមអ្នកវិភាគខ្លះ រុស្ស៊ីអាចបញ្ជូននាវាមុជទឹករបស់ខ្លួន ដើម្បីទៅសិក្សារៀបចំទីតាំងយុទ្ធសាស្រ្ត ក្នុងករណីដែលមានជម្លោះប្រដាប់អាវុធកើតឡើង នៅសមុទ្របាល់ទិក។
ប៉ុន្តែ តាមអ្នកវិភាគខ្លះទៀត បើសិនទីក្រុងស្តុកខូមរកឃើញថា ពិតជាមាននាវាមុជទឹករុស្ស៊ី នៅក្នុងដែនទឹករបស់ខ្លួន គេក៏នៅ តែមិនអាចចោទថា រុស្ស៊ីមានគំនិតប្រុងវាយប្រហារទៅលើស៊ុយអែតនោះទេ។ វាជាការងាយស្រួលបំផុតសម្រាប់ទីក្រុងម៉ូស្គូ បើសិនគេចង់វាយប្រហារយោធាទៅលើស៊ុយអែត ដែលមានវិស័យកងទ័ពទន់ខ្សោយនោះ។ ប៉ុន្តែ តាមជំនាញ រុស្ស៊ីអាចបញ្ជូននាវាមុជទឹករបស់ខ្លួន ទៅក្នុងដែនទឹករបស់ ស៊ុយអែត គឺគ្រាន់ដើម្បីធ្វើតេស្ត ចង់ដឹងប្រតិកម្មរបស់រដ្ឋាភិបាលស៊ុយអែត។ ម៉ូស្គូទំនងមិនពេញចិត្តនឹងស៊ុយអ៊ែតបានសម្រេចចុះកិច្ចព្រមព្រៀង មួយឲ្យអង្គការអូតង់មានសិទ្ធិបញ្ជូនយន្តហោះចម្បាំងចូលអន្តរាគមន៍ ក្នុងដែនអាកាស ស៊ុយអែត។
សូមបញ្ជាក់ថា កាលពី ខែសីហា កន្លងទៅ ស៊ុយអែត និងប្រទេសហ្វាំងឡង់ ដែលតាមពិតមិនមែនជាសមាជិកអង្គការអូតង់ បានចុះហត្ថលេខាជាមួយអង្គការសម្ព័ន្ធអាត្លង់ទិក អូតង់ ដើម្បីបើកផ្លូវឲ្យអូតង់អាចប្រតិបត្តិការអន្តរាគមន៍ក្នុងដែនសមុទ្របាល់ទិក។ ស៊ុយអែត និងហ្វាំងឡង់ បានងាកទៅរក ជំនួយពី អង្គការអូតង់ បន្ទាប់ពីប្រទេសទំាងពីរឧស្សាហ៍ចាប់បានសញ្ញាវត្តមាននាវាមុជទឹក ឬ យន្តហោះចម្បាំង រុស្ស៊ី ក្នុងដែនទឹក និងដែនអាកាសរបស់ខ្លួន។
ដោយពិតទៅ នេះមិនមែនជាលើកទីមួយទេ ដែលកងទ័ព ស៊ុយអែតចាប់បានសញ្ញានាវាមុជទឹករុស្ស៊ីក្នុងដែនទឹករបស់ខ្លួន។ ស៊ុយអែតឧស្សាហ៍ មានប្រវត្តិដេញប្រមាញ់កប៉ាល់រុស្ស៊ី ចេញពីដែនទឹករបស់ខ្លួន តាំងពីសម័យសង្រ្គាមត្រជាក់។ នៅក្រោយការដួលរលំសហភាពសូវៀត ការរំលោភបំពានទៅលើដែនទឹកស៊ុយអែតពីសំណាក់រុស្ស៊ី នៅតែបន្តមាន។ ប៉ុន្តែ ក្នុងចន្លោះឆ្នាំ ១៩៩២ និងឆ្នាំ ១៩៩៥រដ្ឋាភិបាលស៊ុយអែតធ្លាប់មានការទើសទាល់ បន្ទាប់ពីកងទ័ពជើងទឹកស៊ុយអែត ដែលមិនសូវទំនើប ទាន់សម័យ ចាប់បានសំលេងសត្វ ប៉ុន្តែ គិតថា ជាសំលេងចេញពីនាវាមុជទឹករុស្ស៊ី៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ