អ្នកជំនាញ៖ ជនណាដែលដុតគល់ជញ្ជ្រាំងចោលដោយចេតនា គួរត្រូវផាកពិន័យ
អ្នកជំនាញកសិកម្ម នៅក្នុងប្រទេសកម្ពុជាអំពាវនាវដល់កសិករខ្មែរអោយរក្សាការពារគល់ ជញ្ជ្រាំងស្រូវ និងចៀសវាងការដុតបំផ្លាញគល់ជញ្ជ្រាំងស្រូវចោល។ ការដុតគល់ជញ្ជ្រាំងស្រូវចោលបង្កអោយខូចបរិស្ថាន និងខូចគុណភាពដី។ ជនណាដែលដុតគល់ជញ្ជ្រាំង និងចំបើងចោលដោយចេតនាគួរទទួលការផាកពិន័យ។
ចុះផ្សាយនៅថ្ងៃ៖ កែប្រែថ្ងៃទី៖
សេចក្តីរាយការណ៍របស់គី សុខលីមពីទីក្រុងភ្នំពេញ
ស្របពេលដែលប្រជាកសិករខ្មែរមួយចំនួនធំកំពុងច្រូតកាត់នោះ អ្នកជំនាញកសិកម្មនៃអង្គការកសិកម្មសេដាកបានធ្វើការអំពាវនាវ ជាសាធារណៈ តាមសេចក្តីប្រកាសព័ត៌មានដល់ប្រជាកសិករទាំងអស់អោយធ្វើការរក្សាការពារគល់ជញ្ជ្រាំងស្រូវ និងចៀសវាង ជាដាច់ខាតរាល់អំពើដុតបំផ្លាញគល់ជញ្ជ្រាំងស្រូវចោល។
គល់ជញ្ជ្រាំងស្រូវ គឺជាជីធម្មជាតិដ៏ល្អដែលជួយដីអោយផុស និងផ្តល់ជីជាតិបន្ថែមទៀតដល់ស្រូវ។ ការអំពាវនាវរបស់អង្គការសេដាកបានធ្វើឡើង ចំពេលដែលកសិករខ្មែរជាច្រើនគ្រួសារបាន និងកំពុងចំណាយថវិកាជាច្រើនទិញជីគីមីដើម្បីបង្កើនទិន្នផលរបស់ខ្លួន។
លោក យ៉ង់ សាំងកុមារ ប្រធានអង្គការសេដាកបាននិយាយថា ការរក្សាការពារគល់ជញ្ជ្រាំងស្រូវដោយភ្ជួរលុបចូលក្នុងដីសម្រាប់រដូវក្រោយទៀត វាមិនត្រឹមតែជួយបង្កើនផលស្រូវប៉ុណ្ណោះទេ ប៉ុន្តែវាជួយកាត់បន្ថយការចំណាយលើការទិញជីបន្ថែមទៀត។ លើសពីនេះទៅទៀត គល់ជញ្ជ្រាំងស្រូវធ្វើអោយដីមានជីជាតិជានិរន្តរ៍ទៀតផង។
ផ្ទុយទៅវិញ ប្រសិនបើប្រជាកសិករនាំគ្នាដុតគល់ជញ្ជ្រាំងចោលវិញនោះ គុណវិបត្តិជាច្រើននឹងកើតមានឡើងភ្លាមៗ។ គុណវិបត្តិទាំងនោះជារួមមាន៖ ការបាត់បង់នូវសារធាតុសរីរាង្គសម្រាប់ប្រើជាជីជំនួយដី និងការបាត់បង់នូវគម្របការពារដីពីកម្តៅថ្ងៃជាដើម។ មិនត្រឹមតែប៉ុណ្ណោះចំហេះគល់ជញ្ជ្រាំងនឹងបង្កកម្តៅបន្ថែម និងឧស្ម័នការបូនិកដែលអាចបង្កអោយមានការបំពុលបរិយាកាស និងបង្កើតអោយមានអាកាសធាតុក្តៅ។
កសិករ ឡាច ឃី រស់នៅក្នុងខេត្តតាកែវបាននិយាយបញ្ជាក់បន្ថែមពីសារៈប្រយោជន៍នៃគល់ជញ្ជ្រាំងស្រូវថា គល់ជញ្ជ្រាំងផ្តល់ជីជាតិបន្ថែមដល់ស្រូវ និងជួយការពារដីពីកម្តៅ។
ដោយសារគល់ជញ្ជ្រាំងស្រូវជាប្រភពធនធានរបស់កសិករនិងផ្តល់ប្រយោជន៍ច្រើនដល់វិស័យកសិកម្មខ្មែរនោះ អង្គការសេដាក អំពាវនាវដល់កសិករ គ្រូបង្រៀន និងអាជ្ញាធរមូលដ្ឋានអោយចាត់វិធានការបីចំណុចដូចតទៅ។
ទីមួយ៖ជំរុញអោយកសិករភ្ជួរគល់ជញ្ជ្រាំងលុបទៅតាមលទ្ធភាពដែលអាចធ្វើបាន។ ទីពីរ៖អប់រំប្រជាកសិករជាពិសេសកុមារនិងយុវជនអោយយល់ដឹងពីសារៈប្រយោជន៍នៃគល់ជញ្ជ្រាំងស្រូវ និងទីបី៖ អាជ្ញាធរមូលដ្ឋានគួរមានវិធានការផាកពិន័យចំពោះជនណាដែលដុតគល់ជញ្ជ្រាំង និងចំបើងចោលដោយចេតនា៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ