បារាំងសិស្សល្អប្រលងជាប់ផ្នែកវិញ្ញាសាធនាគារ Stress Test
ចុះផ្សាយនៅថ្ងៃ៖
ស្តាប់ - ០៤:៣២
តាំងពីមាន វិបត្តិធនាគារ នៅសហរដ្ឋអាមេរិកនៅឆ្នាំ២០០៩ ដែលបានជំរុញឱ្យមានវិបត្តិហិរញ្ញវត្ថុ និងសេដ្ឋកិច្ចហៀដល់អឺរ៉ុប នៅឆ្នាំ២០១១ តំបន់អឺរ៉ូជួបគ្រោះវិបត្តិប្រាក់បំណុលបន្ថែមមួយជាន់ទៀត ទំនុកចិត្តលើធនាគារអឺរ៉ុបបានចោទជាបញ្ហាកាន់តែខ្លាំងឡើងៗ។ ដើម្បីបញ្ចប់ភាពមន្ទិល និងស្តារកិត្តិយស ធនាគារកណ្តាលអឺរ៉ុបដែលនឹងក្លាយជាស្ថាប័នត្រួតត្រាប្រព័ន្ធធនាគារអឺរ៉ុបរួម ចាប់ពីថ្ងៃទី ៤ វិច្ឆិកា ២០១៤តទៅ បានរៀបចំធ្វើតេស្តមួយឈ្មោះថា Stress test ល្បងសមត្ថភាពធន់នឹងវិបត្តិសេដ្ឋកិច្ចឬហិរញ្ញវត្ថុរបស់ធនាគារទាំង១៣០នៃតំបន់ចាយប្រាក់អឺរ៉ូ ដោយទើបប្រកាសលទ្ធផលនៅថ្ងៃអាទិត្យទី ២៦ តុលា។ តើអ្វីទៅជាវិញ្ញាសាតេស្តសាកល្បងstress test ? ប្រទេសណាខ្លះជាប់ ណាខ្លះធ្លាក់ ? តើធនាគារកណ្តាលអឺរ៉ុបចាត់វិធានការបែបណា ចំពោះធនាគារដែលមិនឆ្លើយតបទៅលក្ខខណ្ឌចង់បាន ?
Stress test ជាវិញ្ញាសា ដែលធនាគារធំៗចំនួន ១៣០ របស់ប្រទេសចាយប្រាក់អឺរ៉ូទាំងអស់ត្រូវឆ្លងកាត់ ព្រោះជាដំណាក់កាលដ៏សំខាន់បំផុតនៃការបង្កើតសហភាពធនាគារ និងយន្តការត្រួតពិនិត្យរួមដែលអឺរ៉ុបចង់បាន។ មុននឹងទទួលភារៈជាអ្នកត្រួតត្រាពីលើធនាគារទាំងអស់របស់តំបន់អឺរ៉ុប ចាប់ពីថ្ងៃទី ៤ វិច្ឆិកាទៅ ធនាគារកណ្តាលអឺរ៉ុប ត្រូវតែរកឃើញទំនុកចិត្តថ្មី ទើបបានសម្រេចធ្វើតេស្តមើលធនធានដើម និងវាយតម្លៃហានិភ័យព្រមទាំងសមត្ថភាពរបស់គ្រប់ធនាគារនៃប្រទេសជាសមាជិកទាំងអស់ ថាមានភាពធន់នឹងវិបត្តិសេដ្ឋកិច្ច ឬហិរញ្ញវត្ថុជាយថាហេតុប៉ុណ្ណា តាំងពីខែតុលា ២០១៣មក។ សូម្បីតែធនាគារអង់គ្លេស ស៊ុយអែត ឬប៉ូឡូញ ក៏ត្រូវឆ្លងកាត់ការត្រួតពិនិត្យនេះដែរ។ កម្មវត្ថុនៃប្រតិបត្តិការផ្ទៀងផ្ទាត់តុល្យការធនាគារនេះ មានបី ៖ តម្លាភាព ធ្វើឱ្យមានតុល្យការស្អាតស្អំ និងស្តារទំនុកចិត្តឱ្យធនាគារនៃតំបន់អឺរ៉ូ។
នៅក្នុងចំណោមធនាគារទាំង១៣០ ដែលមានតុល្យការសរុប ជាង ៣០ពាន់លានអឺរ៉ូ ឬធនាគារធំជាងបីដំបូងរបស់ប្រទេស តំណាងឱ្យ៨៥%នៃប្រព័ន្ធធនាគារតំបន់អឺរ៉ូ មានតែ២៥ប៉ុណ្ណោះដែលមានបញ្ហា មានជាអាទិ៍ ធនាគារអ៊ីតាលី ៩ ក្រិកបី ស៊ីបបី ព័រទុយហ្កាល់ និងក៏មានដែរធនាគារមួយរបស់អាល្លឺម៉ង់។ ជាសរុប ធនាគារកណ្តាលអឺរ៉ុបវាយតម្លៃថា ធនាគារមានបញ្ហាទាំងអស់ ត្រូវការបន្ថែមដើមទុន២៥ពាន់លានអឺរ៉ូ ។
នៅប្រទេសបារាំង ធនាគារធំៗទាំង១៣ ដែលតំណាងឱ្យ៩៥%នៃធនធានធនាគារទាំងមូល មានទាំងគុណភាព និងសមត្ថភាព អាចទប់ទល់នឹងវិបត្តិសេដ្ឋកិច្ចធ្ងន់ធ្ងរខ្លាំងបាន ប្រសើរលើសដៃគូ មួយចំនួនផង។ ធនាគារកណ្តាលអឺរ៉ុប បានលើកសេណារីយោដ៏អាក្រក់បំផុតមកដាក់ឱ្យបារាំង ដោយគិតថា ក្នុងរយៈពេលពីរឆ្នាំ ២០១៤-១៥ បារាំងមានសេដ្ឋកិច្ចដើរថយក្រោយ ហើយនៅពេញមួយឆ្នាំ២០១៦ បារាំងមានបរិត្តផរណា អត្រាអ្នកអត់ការងារធ្វើឡើងដល់ ១២,២% ក្នុងឆ្នាំ២០១៦។ អត្រាការប្រាក់រយៈពេល១០ឆ្នាំបានឡើងមួយជាបី ពី ១,២%នៅឆ្នាំនេះ ទៅ ៣,៨%នៅឆ្នាំ២០១៦។ តម្លៃអចលនទ្រព្យដាំក្បាលចុះអស់៣០%។ ក្នុងសេណារីយោដ៏អាក្រក់បែបនេះ ធនាគារមួយភាគធំត្រូវបិទទ្វារ ឬដាក់បញ្ចាំ ប៉ុន្តែធនាគារបារាំងនៅអាចទប់ទល់ បានទៀត ! មានតែធនាគារមួយប៉ុណ្ណោះ ដែលធន់មិនបាន តែការបន្ថែមដើមទុនកាលពីចុងឆ្នាំ២០១៣ បានស្តារមុខរួច។ មិនតែប៉ុណ្ណោះ ប្រសិនបើមានករណីត្រូវវាយតម្លៃប្រាក់ទុនឡើងវិញដំឡើងឱ្យដល់ ៨%ដូចការចង់បានរបស់ធនាគារកណ្តាលអឺរ៉ុប ធនាគារបារាំងមានដល់ទៅ១១,៤៩% ពោលគឺស្ថិតនៅខ្ពស់ជាងកំរិតអប្បបរិមាឆ្ងាយណាស់។
បារាំងបានឆ្លងកាត់វិញ្ញាសា ដោយជោគជ័យ ចុះសួរថា បើធនាគារមួយមិនអាចឆ្លងកាត់Stress test របស់ធនាគារកណ្តាលអឺរ៉ុបបាន តើមានផលវិបាកយ៉ាងណា ? ទីមួយគឺក្រោយការប្រកាសលទ្ធផលភ្លាម ទីផ្សារភាគហ៊ុនធនាគារឬប្រទេសនោះ អាចធ្លាក់ចុះ។ ធនាគារជាប់ឈ្មោះអាក្រក់ មានពេលពីរសប្តាហ៍សម្រាប់លើកគម្រោងជូនធនាគារកណ្តាលអឺរ៉ុប អំពីផែនការចាក់បញ្ចូលបន្ថែមដើមទុន និងមានពេល៦ខែសម្រាប់បំពេញផែនការនោះ។ ហើយប្រសិនបើតម្រូវការទុនផ្ទាល់មិនអាចបង្គ្រប់ទីផ្សារបានទេ នោះនឹងមានវិបត្តិ ម្ចាស់ភាគហ៊ុនត្រូវចូលរួមចំណែកដែរ។ ហើយប្រសិនឈានដល់ថ្នាក់ត្រូវការជំនួយសាធារណៈទៀត ធនាគារនោះត្រូវស្នើសុំការព្រមព្រៀងពីសហភាពអឺរ៉ុប ដែលមានវិធានតឹងតែងណាស់ មិនចេះតែយល់ព្រមឱ្យរដ្ឋចូលជួយធនាគារដោយងាយៗឡើយ។ ប៉ុន្តែនេះជាដំណើរការវែងឆ្ងាយទៀត ពេលវេលាដែលអឺរ៉ុបត្រូវស្វែងរកមូលនិធិសម្រាប់ដំណោះស្រាយថ្នាក់អឺរ៉ុប មិនទាន់មកដល់ទេ ទាល់តែឆ្នាំ២០១៦ទើបមូលនិធិសង្គ្រោះគ្នាទៅវិញទៅមកទំហំ ៥៥ពាន់លានអឺរ៉ូ នឹងចូលជាធរមាន និងដោយបន្តិចម្តងៗ។
យ៉ាងណាក៏ដោយ ការធ្វើតេស្តសាកល្បងមើលសមត្ថភាពរបស់ធនាគារនៅពេលនេះ បានផ្តល់ទំនុកចិត្តខ្លាំងដល់ធនាគារកណ្តាលអឺរ៉ុប ដែលនឹងក្លាយទៅជាអ្នកត្រួតត្រាផ្ទាល់ធនាគារទាំង១៣០នៅក្នុងតំបន់ ព្រោះការត្រួតពិនិត្យនេះដៅមើលតុល្យការរបស់ធនាគារយ៉ាងល្អិតល្អន់។ ធនាគារកណ្តាលអឺរូបបានចំណាយទាំងធនធានមនុស្ស ទាំងហិរញ្ញវត្ថុយ៉ាងសន្ធឹកសន្ធាប់ ក្នុងបំណងតែមួយ គឺទាញឱ្យខាងតែបានព័ត៌មានលម្អិត។ លើសពីនេះទៅទៀត ធនាគារកណ្តាលអឺរ៉ុប គ្រោងនឹងធ្វើតេស្តបែបនេះជារៀងរាល់ឆ្នាំ ដើម្បីជួយធនាគារឱ្យឈរនឹងល្អ និងធ្វើយ៉ាងណាបញ្ចៀសកំហុសអតីតកាល (វិបត្តិហិរញ្ញវត្ថុ ឬវិបត្តិធនាគារក្ស័យធនដូចនៅសហរដ្ឋអាមេរិកកាលពីឆ្នាំ២០០៩) ឱ្យបាន។ មានតុល្យការច្បាស់លាស់នៅនឹងដៃ ជាគោលការណ៍គឺអាចជួយសម្រួលស្ថានការណ៍បានច្រើន មិនថាក្នុងលក្ខណៈត្រៀមរៀបចំខាត ឬការរុះរើរចនាសម្ព័ន្ធឡើងវិញ ឬការក្ស័យធនទេ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ