សាឡាងលិច៖ ប្រធានាធិបតីកូរ៉េខាងត្បូងថាទង្វើរបស់ក្រុមនាវិកប្រៀបបាននឹង "អំពើឃាតកម្ម"
នៅថ្ងៃចន្ទនេះ លោកស្រីប៉ាក់ គុនហេ ប្រធានាធិបតីកូរ៉េខាងត្បូង បានថ្កោលទោសយ៉ាងខ្លាំងៗ ចំពោះទង្វើរបស់អ្នកបើកបរ និងអ្នកបម្រើការលើសាឡាងដែលលិច កាលពីសប្តាហ៍មុន ដោយប្រៀបប្រដូចទង្វើអស់ទាំងនោះថាជា “អំពើឃាតកម្ម”។ នៅថ្ងៃចន្ទនេះដែរ បុគ្គលិកបម្រើការលើសាឡាង ចំនួន ៤រូបផ្សេងទៀត ត្រូវបានអាជ្ញាធរចាប់ខ្លួន ហើយកិច្ចសន្ទនារវាងនាវិក និងអ្នកត្រួតពិនិត្យចរាចរណ៍ផ្លូវសមុទ្រ ត្រូវបានគេចេញផ្សាយជាសាធារណៈ។
ចុះផ្សាយនៅថ្ងៃ៖
ស្តាប់ - ០១:២៩
នៅក្នុងកិច្ចប្រជុំជាមួយមន្រ្តីជំនិតៗ នៅថ្ងៃចន្ទនេះ លោកស្រីប៉ាក់ គុនហេ បានលើកឡើងថា ព័ត៌មានដែលគេទទួលបានបង្ហាញឲ្យឃើញកាន់តែច្បាស់ថា ប្រធានក្រុមនាវិកសាឡាងមានការយឺតយ៉ាវក្នុងការជម្លៀសអ្នកដំណើរចេញ នៅពេលសាឡាងចាប់ផ្តើមលិច ហើយនៅពេលដែលស្ថានភាពកាន់តែដុនដាប ប្រធានក្រុមនាវិក និងសហការីមួយចំនួនបែរជាបាននាំគ្នារត់ចោលអ្នកដំណើរ យករួចជីវិតតែខ្លួនឯង។
ការឆ្លើយឆ្លងគ្នា តាមវិទ្យុទាក់ទង រវាងក្រុមនាវិកសាឡាង និងអ្នកត្រួតពិនិត្យចរាចរណ៍ផ្លូវសមុទ្រ ដែលត្រូវបានគេចេញផ្សាយជាសាធារណៈ បង្ហាញថា ក្រុមនាវិកសាឡាងបានពន្យារពេលរហូតដល់ទៅ ៤០នាទី ទើបចេញបញ្ជាឲ្យអ្នកដំណើរភៀសខ្លួនចេញពីសាឡាង ហើយនៅពេលនោះ សាឡាងបានផ្អៀងខ្លាំងស្ទើរតែក្រឡាប់ទៅហើយ ដែលជាហេតុធ្វើឲ្យអ្នកដំណើរជាច្រើនមិនអាចចេញពីសាឡាងរួច។
លោកស្រីប៉ាក់ គុនហេ បានលើកឡើងថា អ្នកដែលទទួលខុសត្រូវចំពោះសោកនាដកម្មនេះនឹងត្រូវទទួលខុសត្រូវចំពោះមុខច្បាប់។
គួរបញ្ជាក់ថា ប្រធានក្រុមនាវិក ព្រមទាំងអ្នកបើកបរសាឡាងមួយរូបទៀត ត្រូវបានអាជ្ញាធរចាប់ខ្លួន កាលពីថ្ងៃសៅរ៍ ហើយនាវិកចំនួន ៤រូបផ្សេងទៀត ត្រូវបានចាប់ខ្លួន នៅថ្ងៃចន្ទនេះ។
ក៏ប៉ុន្តែ មន្រ្តីរដ្ឋាភិបាលកូរ៉េខាងត្បូងក៏ត្រូវទទួលរងនូវការរិះគន់យ៉ាងខ្លាំងដែរ ពីសំណាក់ក្រុមគ្រួសាររបស់ជនរងគ្រោះ ដោយពួកគេទទួលរងការចោទប្រកាន់ថាមានភាពយឺតយ៉ាវ ក្នុងការចូលទៅជួយសង្រ្គោះអ្នកដំណើរ ដែលជាប់ក្នុងសាឡាង។
គួរបញ្ជាក់ផងដែរថា ការលិចសាឡាង កាលពីថ្ងៃពុធសប្តាហ៍មុននេះ បានបណ្តាលឲ្យមនុស្សស្លាប់ចំនួន ៦៤នាក់ ក៏ប៉ុន្តែ ចំនួននេះអាចនឹងកើនឡើងយ៉ាងច្រើនទៀត ដោយសារតែរហូតមកទល់នឹងពេលនេះ នៅមានអ្នកដំណើរចំនួន ២៣៨នាក់ផ្សេងទៀតកំពុងបាត់ខ្លួននៅឡើយ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ