ជប៉ុន-ឥណ្ឌា បើកជំនួបកំពូលពង្រឹងមិត្តភាពដើម្បីប្រឈមនឹងចិន
លោក នរិន្ទ្រ ម៉ូឌី នាយករដ្ឋមន្ត្រីឥណ្ឌា បានផ្តើមទស្សនកិច្ចក្រៅប្រទេសលើកទីមួយ រយៈពេល៥ថ្ងៃ នៅប្រទេសជប៉ុន តាំងពីថ្ងៃសៅរ៍ទី ៣០សីហាមក។ ក្រោយពីបានសម្តែងភាពល្អូកល្អើន ចាក់ទឹកមិនលិចដាក់គ្នាមក និងការទទួលស្វាគមន៍យ៉ាងពិសេសពីសំណាក់ម្ចាស់ផ្ទះមក នៅថ្ងៃនេះនាយករដ្ឋមន្ត្រីឥណ្ឌា និងសមភាគីជប៉ុន លោកស៊ីនហ្សូអាបេ បានពិភាក្សាគ្នាយ៉ាងស៊ីជម្រៅ នៅក្នុងជំនួប ជប៉ុន-ឥណ្ឌា នៅទីក្រុងតូក្យូ ដើម្បីពង្រឹងការផ្តោះប្តូរពាណិជ្ជកម្មផង និងរឹតចំណងសម្ព័ន្ធភាពតំបន់ សម្រាប់ប្រឈមនឹងចិន។
ចុះផ្សាយនៅថ្ងៃ៖
ជំនួបកំពូលផ្លូវការឥណ្ឌា-ជប៉ុន បានចាប់ផ្តើម នៅថ្ងៃចន្ទទី ១ កញ្ញានេះ ! ប្រមុខរដ្ឋាភិបាលទាំងពីរសង្ឃឹមនិងស្រុះស្រួលគ្នាថានឹងប្រែក្លាយចំណងមិត្តភាពល្អិតល្មួតនេះទៅជាលទ្ធផលជាក់ស្តែង។
លើផ្នែកការទូត ចិនគឺជាតំណាងការគំរាមកំហែងរួម និងជាភាគីជម្លោះរួម ក្នុងបញ្ហាដែនដី។ ក្នុងន័យនេះ បើតាមសារព័ត៌មានជប៉ុន តូក្យូ និងញូវដែលី គ្រោងនឹងដាក់ឱ្យដំណើរការរចនាសម្ព័ន្ធ “ពីរបូកពីរ” សម្រាប់ពិគ្រោះគ្នា ដោយឱ្យរដ្ឋមន្ត្រីក្រសួងការបរទេសនិងការពារជាតិធ្វើការរួមគ្នា តាមគំរូដែលជប៉ុនធ្លាប់ធ្វើជាមួយសហរដ្ឋអាមេរិក អូស្ត្រាលី រុស្ស៊ីនិងបារាំង។ គំនិតផ្តួចផ្តើមនេះ បានទទួលការគាំទ្រយ៉ាងខ្លាំងពីសំណាក់សហរដ្ឋអាមេរិក សម្ព័ន្ធមិត្តជាប្រវត្តិសាស្ត្ររបស់ជប៉ុន ដែលតែងព្រួយបារម្ភរហូតមកចំពោះការស្ទុះឡើងខ្លាំងផ្នែកអំណាចយោធាចិន។
“ជប៉ុននិងឥណ្ឌា ត្រូវជ្រើសរើសផ្លូវអភិវឌ្ឍន៍តាមបែបសន្តិនិយម មិនមែនបែបឈ្លានពានដូចសម័យសតវត្សរ៍ទី ១៨ ដណ្តើមយកទឹក យកដីជាតិផ្សេងឡើយ”! នេះជាសេចក្តីប្រកាសរបស់លោកមូឌី ដែលសំដៅវាយប្រហារចិនបែបបញ្ឆិតបញ្ឆៀង និងដែលបន្ថែមទៀតថា “ប្រសិនបើអាស៊ីត្រូវធ្វើជាមេនៅសតវត្សរ៍ទី២១ គឺជប៉ុននិងឥណ្ឌាជាអ្នកចង្អុលផ្លូវ!
លើផ្នែកសេដ្ឋកិច្ចពាណិជ្ជកម្មវិញ ដែលជាកម្មវត្ថុចម្បងនៃទស្សនកិច្ចនៅជប៉ុនលើកនេះ នាយករដ្ឋមន្ត្រីឥណ្ឌាអាចត្រឡប់ចូលស្រុកវិញជាមួយនឹងកញ្ចប់ប្រាក់កម្ចីការប្រាក់ថោក ប្រមាណ៣៦៤លានអឺរ៉ូ សម្រាប់ស្ថាបនា ផ្លូវដែក ផ្លូវថ្នល់និងមជ្ឈមណ្ឌលឧស្សាហកម្ម។ កិច្ចសន្យាជាច្រើនទៀតអាចនឹងត្រូវព្រមព្រៀងគ្នា ព្រោះជប៉ុនមហាអំណាចសេដ្ឋកិច្ចទីពីរលើពិភពលោកចង់បង្កើនវិនិយោគនៅឥណ្ឌាឱ្យបានទ្វេដង ក្នុងរយៈពេល៥ឆ្នាំខាងមុខ។ ក្នុងនោះក្រុមហ៊ុនឯកទេសអេឡិចត្រូនិចជប៉ុន គ្រោងនឹងធ្វើវិនិយោគនៅឥណ្ឌាក្នុងទឹកប្រាក់ប្រមាណ១០០ពាន់លានយ៉េន។ នេះមិននិយាយអំពីការផ្តល់សន្ទុះឡើងវិញដល់ការចរចានុយក្លេអ៊ែរស៊ីវិលដែលជាប់គាំងតាំងពីមហន្តរាយនៅហ្វូគូស្ហ៊ីម៉ា និងកិច្ចសហប្រតិបត្តិការផ្នែកលោហៈកម្រ ដែលឥណ្ឌាអាចជួយជប៉ុនកុំឱ្យរំពឹងតែលើចិនខ្លាំងពេកផង៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ