ជំនួបកំពូលសហភាពអឺរ៉ុប-អាហ្វ្រិក ប្រឈមនឹងវត្តមានសេដ្ឋកិច្ចដ៏សកម្មរបស់អាស៊ី នៅទ្វីបអាហ្វ្រិក
ចុះផ្សាយនៅថ្ងៃ៖
ស្តាប់ - ០៦:០២
នៅក្រុងព្រុចសែល ថ្ងៃពុធនេះរហូតដល់ថ្ងៃព្រហស្បតិ៍ស្អែក មានរៀបចំជំនួបកំពូលរវាងសហភាពអឺរ៉ុបនិងអាហ្វ្រិក ដែលមានវត្តមានចូលរួមរបស់មេដឹកនាំអឺរ៉ុបនិងអាហ្វ្រិកជិត៨០នាក់ ក្នុងនោះក៏មានប្រធានាធិបតីបារាំង លោកហូឡង់, ប្រធានាធិបតីរដ្ឋាភិបាលអន្តរកាលអាហ្វ្រិកកណ្តាល លោកស្រី សាំបា ប៉ាន់ហ្សា, ប្រធានក្រុមប្រឹក្សាអឺរ៉ុប លោកវ៉ាន់ រុំពុយ និងអគ្គលេខាធិការអង្គការសហប្រជាជាតិ បាន គីមូនផងដែរ។ ទិសដៅនៃជំនួបនេះ ជាចំបងគឺផ្តោតលើបញ្ហាអន្តោប្រវេសន៍ សន្តិសុខ និងភាពជាដៃគូសេដ្ឋកិច្ច។ ក្នុងពេលចាប់ផ្តើមជំនួប នៅថ្ងៃពុធនេះ មេដឹកនាំអឺរ៉ុបនិងអាហ្វ្រិកបាននាំគ្នាពិភាក្សារកដំណោះស្រាយវិបត្តិហិង្សាសម្រាប់អាហ្វ្រិកកណ្តាល។
បារាំងចេញមុខចូលរួមរៀបចំការបើកជំនួបពិភាក្សាស្តីពីអាហ្វ្រិកកណ្តាល ថ្ងៃពុធនេះ នៅក្រុងព្រុចសែល
អាហ្វ្រិកកណ្តាលធ្លាប់ស្ថិតក្នុងដែនអាណានិគមរបស់បារាំង។ បារាំងមិនព្រងើយបោះបង់អាហ្វ្រិកកណ្តាលដែលកំពុងមានបញ្ហានោះទេ។ ជិត៥ខែមកនេះ ក្នុងដំណោះស្រាយជួយការពារសន្តិសុខអាហ្វ្រិកកណ្តាល គេឃើញមានតែប្រទេសបារាំងប៉ុណ្ណោះ ជាប្រទេសអឺរ៉ុបតែមួយគត់ដែលហ៊ានបញ្ជូនទាហានទៅអាហ្វ្រិកកណ្តាល។ ទាហានបារាំងនៅទីនោះ មាន២០០០នាក់។ ប្រទេសសហភាពអឺរ៉ុបផ្សេងៗទៀត ធ្លាប់បានសន្យាថា បញ្ជូនទ័ពទៅដែរ ប៉ុន្តែឃើញតែសន្យាមិនដែលឃើញអ្វីជាក់ស្តែងនោះទេ ទើបតែម្សិលមិញនេះ ពោលគឺមួយថ្ងៃមុនជំនួបអឺរ៉ុប-អាហ្វ្រិក ថ្ងៃពុធនេះប៉ុណ្ណោះ ទើបគេឃើញសហភាពអឺរ៉ុបកម្រើកខ្លួន ប្រកាសធ្វើបេសកកម្មយោធាខ្លួនជាផ្លូវការ ជួយអាហ្វ្រិកកណ្តាល។ មុនការប្រកាសបេសកកម្មយោធានេះ មានតែកងទ័ពបារាំងទេដែលមានវត្តមាននៅអាហ្វ្រិកកណ្តាលជួយកងកម្លាំងចម្រុះអាហ្វ្រិក ទប់ស្កាត់អំពើហិង្សា ការឆក់ប្លន់ ក្នុងស្រុក។ កាលពីចុងខែកុម្ភៈកន្លងទៅ សភាបារាំងបានសម្រេចអោយយោធាបារាំងបន្តប្រតិបត្តិការការពារសន្តិសុខអាហ្វ្រិកកណ្តាល ទោះជាមានការរិះគន់ថា បារាំងផុងខ្លួនចាយវាយថវិកាជាតិ ជួយអាហ្វ្រិកកណ្តាល តែម្នាក់ឯងក៏ដោយចុះ។
បារាំងជាប្រទេសអឺរ៉ុបដែលស្គាល់ស្ថានការណ៍អាហ្វ្រិកកណ្តាលច្បាស់លាស់ ប្រៀបទៅនឹងប្រទេសអឺរ៉ុបផ្សេងទៀត។បារាំងមានទឹកមាត់ប្រៃក្នុងការផ្តល់យោបល់ រឺក៏ការសម្រេចផ្សេងៗ ជួយអាហ្វ្រិកកណ្តាល។ ការដែលបារាំងស្គាល់ស្ថានភាពនៅអាហ្វ្រិកកណ្តាលបែបនេះ ក៏អាចជួយអោយបារាំងមានអាទិភាពក្នុងការផ្តល់យោបល់ទាក់ទងការពិភាក្សាបញ្ហាប្រទេសអាហ្វ្រិកផ្សេងៗទៀតដែរ។
ទន្ទឹមនេះដែរ ការពិភាក្សាក្នុងជំនួបកំពូលថ្ងៃនេះ ក៏ផ្តោតលើភាពជាដៃគូសេដ្ឋកិច្ចរវាងអឺរ៉ុបនិងអាហ្វ្រិកផងដែរ ដូច្នេះ បារាំងក៏ប្រហែលជាចង់ទទួលផលចំណេញខាងសេដ្ឋកិច្ចនៅអាហ្វ្រិក ជួយដល់ជាតិខ្លួនផងដែរ។ ការដែលក្រុងប៉ារីសព្យាយាមបង្ហាញវត្តមានខ្លួននៅអាហ្វ្រិកកណ្តាល កន្លងមក ឥឡូវនេះ គឺធ្វើអោយបារាំងក្លាយជាប្រទេសមានទឹកមាត់ប្រៃក្នុងកិច្ចពិភាក្សារវាងអឺរ៉ុបជាមួយអាហ្វ្រិក នោះគឺមិនឥតប្រយោជន៍ទេ។
គួរបញ្ជាក់ដែរពីស្ថានភាពអាហ្វ្រិកកណ្តាល។ អំពើហិង្សាអាហ្វ្រិកកណ្តាលកើតឡើងមួយឆ្នាំមកហើយ គឺតាំងពីពេលក្រុមឧទ្ទាមសេឡេកាធ្វើរដ្ឋប្រហារទំលាក់ប្រធានាធិបតីFraçois Bozizé។ ការកាប់សម្លាប់ ឆក់ប្លន់ ហិង្សារវាងអ្នកកាន់គ្រិស្តសាសនា ប្រឆាំងអ្នកកាន់សាសនាអ៊ីស្លាម បានកើតមានរាល់ថ្ងៃ។ មនុស្សរាប់ពាន់នាក់បានបាត់បង់ជីវិតក្នុងអំពើហិង្សា ហើយរាប់សែននាក់បានរត់ភៀសខ្លួន។ បញ្ហាដែលត្រូវលើកយកមកជជែកក្នុងជំនួបថ្ងៃពុធនេះដែរ គឺបញ្ហាដែលទាហានប្រទេសឆាដនៃកងកម្លាំងអាហ្វ្រិកចម្រុះមីស្កា បានជាប់ពាក់ព័ន្ធនឹងអំពើហិង្សានៅក្រុងបង់ហ្គី។ កាលពីថ្ងៃសៅរ៍ ទាហានឆាដបានបាញ់លើហ្វូងមនុស្សធ្វើអោយមនុស្សស្លាប់២៤នាក់។ អញ្ចឹងសហគមន៍អន្តរជាតិកាន់តែបារម្ភខ្លាំង ដូច្នេះ ទិសដៅក្នុងជំនួបថ្ងៃពុធនេះ គឺធ្វើយ៉ាងណារកដំណោះស្រាយបញ្ឍប់ការកាប់សម្លាប់មនុស្សនៅអាហ្វ្រិកកណ្តាល។
សហភាពអឺរ៉ុបមិនព្រលែងអាហ្វ្រិកចេញពីដៃទេ
នៅចំពោះមុខភាពជាដៃគូសេដ្ឋកិច្ចរវាងសហភាពអឺរ៉ុបនិងអាហ្វ្រិក អាហ្វ្រិកក៏មានដៃគូសេដ្ឋកិច្ចជាអាស៊ីផងដែរ ពិសេសគឺចិន។ ទ្វីបអាហ្វ្រិកមិនមែនត្រូវការតែការជួយការពារសន្តិសុខប៉ុណ្ណោះទេ តែក៏ត្រូវការភាពជាដៃគូសេដ្ឋកិច្ចជាមួយគ្រប់បណ្តាប្រទេស គ្រប់ទ្វីបលើពិភពលោកផងដែរ ពោលគឺធ្វើយ៉ាងណាដើម្បីអោយសេដ្ឋកិច្ចមានលំនឹង។ កុំថាឡើយតែអាស៊ីជាដៃគូប្រជែងនិងអឺរ៉ុប នៅអាហ្វ្រិក អាហ្វ្រិកខ្លួនឯងផ្ទាល់ក៏ជាដៃគូប្រជែងរបស់អឺរ៉ុប នៅអាស៊ីផងដែរ ព្រោះថា ទឹកដីអាហ្វ្រិកក៏សំបូរវត្ថុធាតុដើមច្រើនដូចជាអឺរ៉ុបដែរ។
ដោយឡែក អាហ្វ្រិកជាព្រំដែនចុងក្រោយ ក្នុងដំណើរអភិវឌ្ឈន៍ពិភពលោក។ ក្នុងចំណោមប្រទេសចំនួន៩ ដែលជួបកំនើន ប្រទេសចំនួន៥ជាប្រទេសអាហ្វ្រិក ដូច្នេះ ប្រទេសមហាអំណាចដូចជាចិន ឥណ្ឌា រឺក៏ជប៉ុន ដឹងច្បាស់យូរហើយ ហើយកំពុងចូលខ្លួនជាដៃគូសេដ្ឋកិច្ចជាមួយអាហ្វ្រិកកាន់តែខ្លាំងក្លា ដើម្បីទទួលបានផលចំណេញនៅទីនោះ។ ជាក់ស្តែង ជាង១០ឆ្នាំមកនេះ ចិនបានធ្វើអោយបារាំងបាត់បង់ទីផ្សារខ្លួននៅអាហ្វ្រិក ដល់ទៅពាក់កណ្តាល។ នៅចំពោះមុខវត្តមានដ៏សកម្មរបស់បណ្តាប្រទេសអាស៊ី នៅអាហ្វ្រិក កន្លងមក អាមេរិកក៏បានភ្ញាក់ខ្លួន និងត្រៀមធ្វើគ្រប់បែបយ៉ាង ដើម្បីធ្វើជាដៃគូល្អរបស់អាហ្វ្រិក។
នៅមុខប្រទេសដៃគូទាំងនេះ អឺរ៉ុបជាដៃគូសេដ្ឋកិច្ចចំបងរបស់អាហ្វ្រិកគួរអោយកត់សម្គាល់ជាងគេ។ ព្រោះថា ក្នុងប្រវត្តិសាស្ត្រ ប្រទេសអឺរ៉ុបមួយចំនួន ធ្លាប់បានដាក់អាណានិគមនៅអាហ្វ្រិក។ ដូច្នេះ អឺរ៉ុបមិនបោះបង់អាហ្វ្រិកទេ។ ជំនួបថ្ងៃពុធនេះ មានទិសដៅជម្រុញអោយមានកិច្ចព្រមព្រៀងផ្តោះប្តូរពាណិជ្ជកម្មសេរីរវាងអឺរ៉ុបនិងអាហ្វ្រិក។ សហភាពអឺរ៉ុបសន្យាថានឹងលុបចោលរាល់តម្លៃពន្ធគយ នៅពេលដែលកិច្ចព្រមព្រៀងដៃគូសេដ្ឋកិច្ចជាមួយអាហ្វ្រិកចូលជាធរមាន។
ប៉ុន្តែ ក្នុងភាពសហការណ៍ជាដៃគូជាមួយអាហ្វ្រិក រហូតមកដល់ពេលនេះ បណ្តាប្រទេសអឺរ៉ុបតែងបដិសេធមិនព្រមអោយគណៈកម្មការអឺរ៉ុបអនុវត្តសេចក្តីសម្រេចផ្សេងៗ ដែលសម្រេចឡើងក្នុងជំនួបកំពូលជាមួយអាហ្វ្រិកកន្លងមកនោះទេ។ បញ្ហាដែលអឺរ៉ុបនៅបារម្ភខ្លាំង គឺបញ្ហាជនភៀសខ្លួនអន្តោប្រវេសន៍អាហ្វ្រិក ដែលហូរចូលមកអឺរ៉ុប មករកការងារធ្វើនៅអឺរ៉ុប ធ្វើអោយប្រជាជនក្នុងស្រុកប្រឈមនឹងភាពគ្មានការងារកាន់តែខ្ពស់ រឺក៏អាចធ្វើអោយប្រជាជនអឺរ៉ុបបាត់បង់ការងារធ្វើ។ ប្រជាជននៅអាហ្វ្រិកនឹងឡើងចំនួនដល់ពាន់លាននាក់ ហើយនឹងកើនទ្វេដងទៀត នៅឆ្នាំ២០៥០។ បញ្ហាអាហ្វ្រិក បើយើងមើលអោយដល់រឹសគល់ គឺបង្កឡើងដោយសារតែការគ្រប់គ្រងមិនល្អ អំពើពុករលួយក្នុងស្រុក ការដណ្តើមអំណាចគ្នា ធ្វើអោយរាំងស្ទះដល់ការអភិវឌ្ឍន៍សេដ្ឋកិច្ចនិងសង្គម។ ដូច្នេះ ទាល់តែអឺរ៉ុបលូកដៃចូលកិច្ចការផ្ទៃក្នុងអាហ្វ្រិក ទើបអាចជួយដោះស្រាយបាន។ ប៉ុន្តែ អាហ្វ្រិកមិនចូលចិត្តរបៀបរបបនៃការលូកដៃចូលកិច្ចការផ្ទៃក្នុងខ្លួននោះទេ។ ដូច្នេះ សហភាពអឺរ៉ុបត្រូវធ្វើយ៉ាងណា មិនលូកដៃកិច្ចការអាហ្វ្រិក តែនៅតែរក្សាភាពជាដៃគូសេដ្ឋកិច្ចពាណិជ្ជកម្មតាមរយៈសកម្មភាពផ្សេងៗ ព្រោះយ៉ាងហោចណាស់ក៏វាអាចចូលរួមជួយដោះស្រាយបញ្ហាអាហ្វ្រិកបានមួយចំណែកដែរ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ