សង្គមស៊ីវិលទាមទារឲ្យចាប់ខ្លួនអ្នកបាញ់កម្មករក្នុងខេត្តស្វាយរៀង
ការបាញ់ប្រហារទៅលើក្រុមកម្មករអ្នកតវ៉ាឲ្យរងរបួស៣នាក់កាលពីថ្ងៃទី២០កុម្ភៈក្នុងខេត្តស្វាយរៀងនៅតែជាប្រធានបទក្តៅមួយនៅឡើយ។ ក្រុមសង្គមស៊ីវិលបានស្រែកទាមទារជាបន្តបន្ទាប់ឲ្យអាជ្ញាធរចាប់ខ្លួនជនដៃដល់ដែលបានបាញ់ទៅលើក្រុមកម្មករកម្មការិនីយកមកផ្តន្ទាទោស។ ក្រោយការបាញ់ប្រហារនេះការទាមទាររបស់កម្មករត្រូវបានដោះស្រាយរួចរាល់ហើយ រីឯក្រុមកម្មករក៏បានចូលធ្វើការវិញហើយដែរ ប៉ុន្តែ អ្នករងរបួសនៅមិនទាន់ទទួលបានយុត្តិធម៌នៅឡើយខណៈដែលជនដៃដល់នៅមានសេរីភាព។
ចុះផ្សាយនៅថ្ងៃ៖
ស្តាប់ - ០២:០៧
ក្រៅពីអង្គការ និងសមាគមការពារសិទ្ធិមនុស្ស និងសហជីពកម្មករ ឥឡូវនេះអង្គការសង្គមស៊ីវិលមួយទៀតឈ្មោះបណ្តាញបុរសកម្ពុជាក៏បានចេញសេចក្តីថ្លែងការណ៍អំពាវនាវឲ្យរដ្ឋាភិបាលចាប់ខ្លួនជនប្រដាប់អាវុធដែលបានបាញ់ទៅលើកម្មករនៅក្នុងខេត្តស្វាយរៀងដែរ។ បណ្តាញបុរសកម្ពុជាដែលគេអះអាងថាមានសមាជិកជាង១០០០នាក់បានជំរុញឲ្យអាជ្ញាធររដ្ឋាភិបាលបង្ហាញជំហររឹងប៉ឹងចំពោះការដាក់ទោសដល់ជនល្មើសទៅតាមផ្លូវច្បាប់។ សេចក្តីថ្លែងការណ៍ដែលចេញផ្សាយនៅចុងសប្តាហ៍នេះបានកត់សម្គាល់ថា ការបណ្តែតបណ្តោយឲ្យមានអំពើហិង្សានឹងធ្វើឲ្យអន្តរាយដល់នីតិរដ្ឋ និងធ្វើឲ្យប្រព័ន្ធយុត្តិធម៌ចុះទន់ខ្សោយ។
គួររម្លឹកថា កូដកម្មរបស់កម្មកររោងចក្រស្បែកជើងបានផ្ទុះឡើងកាលពីថ្ងៃចន្ទដើមសប្តាហ៍នេះនៅក្នុងតំបន់សេដ្ឋកិច្ចពិសេសក្រុងបាវិតខេត្តស្វាយរៀង។ នៅខណៈដែលការទាមទាររបស់កម្មករគ្មានដំណោះស្រាយ ដែលបានធ្វើឲ្យមានការប្រឈមមុខដាក់គ្នាយ៉ាងតឹងតែងនោះ សមត្ថកិច្ចបានបាញ់កាំភ្លើងជាច្រើនគ្រាប់ឡើងទៅលើដើម្បីបំបែកហ្វូងកម្មករ។ ស្របពេលជាមួយគ្នានោះ ក៏មានការបាញ់ប្រហារទៅលើក្រុមអ្នកតវ៉ាផងដែរដែលបណ្តាលឲ្យកម្មការិនី៣នាក់រងរបួសធ្ងន់ដោយសារគ្រាប់កាំភ្លើង។ ក្រោយកើតហេតុ គេមិនអាចរកមុខអ្នកបាញ់ឃើញនៅឡើយទេដោយអ្នកខ្លះចោទថាសមត្ថកិច្ចជាអ្នកបាញ់ និងអ្នកខ្លះទៀតថាជាកងសន្តិសុខរបស់ក្រុមហ៊ុន។
យ៉ាងណាក៏ដោយ លោកឧបនាយករដ្ឋមន្ត្រីស ខេង រដ្ឋមន្ត្រីក្រសួងមហាផ្ទៃបានប្រកាសថា គេបានកំណត់អត្តសញ្ញាណជនដៃដល់បានហើយ។ លោកស ខេង ក៏បានអំពាវនាវឲ្យកងកម្លាំងនគរបាលជាតិទាំងអស់បញ្ឈប់ការប្រើប្រាស់អាវុធដើម្បីដោះស្រាយបញ្ហា។ ទោះជាយ៉ាងនេះក្តី រហូតមកទល់ពេលនេះ ជនដៃដល់នៅតែមិនទាន់ត្រូវបានគេចាប់ខ្លួននៅឡើយ។ចំណែកឯក្រុមកម្មករវិញបានចូលធ្វើការវិញជាធម្មតាអស់ហើយលើកលែងតែអ្នករងរបួសដែលកំពុងសម្រាកព្យាបាលនៅក្នុងមន្ទីរពេទ្យ។ រីឯការទាមទារផ្សេងៗរបស់កម្មករក៏ត្រូវបានដោះស្រាយអស់ហើយដែរ។
ការខកខានមិនបានចាប់ខ្លួនជនដៃដល់បានបង្កើតឲ្យមានក្តីបារម្ភជាទូទៅ និងជាមូលហេតុដែលអង្គការសង្គមស៊ីវិលបន្តទាមទារឲ្យរដ្ឋាភិបាលនាំខ្លួនជនដៃដល់ទៅតុលាការ។ កាលពីថ្មីៗនេះ ជនដៃដល់ពីរនាក់ដែលបានបាញ់ប្រហារទៅលើប្រជាពលរដ្ឋអ្នកតវ៉ារឿងដីធ្លីក្នុងខេត្តក្រចេះត្រូវបានចាប់ខ្លួនបញ្ជូនទៅតុលាការ ក្រោយពីមានបទបញ្ជាពីលោកនាយករដ្ឋមន្ត្រី ហ៊ុន សែន៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ