អ.ស.ប.សម្រេចបន្ថែមទណ្ឌកម្មលើកូរ៉េខាងជើងក្រោយការបាញ់សាកល្បងរ៉ុកកែត
កាលពីថ្ងៃពុធ ម្សិលមិញនេះ ក្រុមប្រឹក្សាសន្តិសុខអ.ស.ប.បានសម្រេចបញ្ចូលក្រុមហ៊ុនកូរ៉េខាងជើងចំនួន ៣បន្ថែមទៀត ទៅក្នុងបញ្ជីខ្មៅ ដែលត្រូវជាប់ទណ្ឌកម្ម។ ការបន្ថែមទណ្ឌកម្មនេះត្រូវបានធ្វើឡើង ដើម្បីតបនឹងការបាញ់សាកល្បងរ៉ុកកែតរបស់កូរ៉េខាងជើង កាលពីខែមុន ដែលគេចាត់ទុកថាជាការរំលោភលើសេចក្តីសម្រេចរបស់ក្រុមប្រឹក្សាសន្តិសុខ។
ចុះផ្សាយនៅថ្ងៃ៖
ស្តាប់ - ០២:០១
ការសម្រេចបញ្ចូលក្រុមហ៊ុនកូរ៉េខាងជើង ៣ បន្ថែមទៅក្នុងបញ្ជីខ្មៅ ត្រូវបានធ្វើឡើងដោយគណៈកម្មាធិការទទួលបន្ទុកផ្នែកទណ្ឌកម្ម របស់ក្រុមប្រឹក្សាសន្តិសុខអ.ស.ប.។ តាមសំណើរបស់សហរដ្ឋអាមេរិក សហភាពអឺរ៉ុប ជប៉ុន និងកូរ៉េខាងត្បូង ក្រុមហ៊ុនកូរ៉េខាងជើងចំនួន ៤០ ដែលត្រូវដាក់បន្ថែមចូលទៅក្នុងបញ្ជីខ្មៅនេះ។ ក៏ប៉ុន្តែ ចិនយល់ព្រមឲ្យបញ្ចូលតែ ៣ក្រុមហ៊ុន។
យោងតាមឯកអគ្គរដ្ឋទូតសហរដ្ឋអាមេរិកប្រចាំអ.ស.ប. ក្រុមហ៊ុនទាំង ៣នេះ មានជាប់ពាក់ព័ន្ធនឹងកម្មវិធីនុយក្លេអ៊ែរ និងមីស៊ីលរបស់កូរ៉េខាងជើង។
គួរបញ្ជាក់ថា នៅក្នុងបញ្ជីខ្មៅនេះ គឺរួមមានក្រុមហ៊ុន និងឥស្សរជនកូរ៉េខាងជើង ដែលត្រូវគេហាមឃាត់មិនឲ្យធ្វើដំណើរទៅក្រៅប្រទេស និងត្រូវផ្អាប់ទ្រព្យសម្បត្តិ ព្រមទាំងមុខទំនិញមួយចំនួន ដែលត្រូវហាមឃាត់មិននាំចូល ឬនាំចេញពីកូរ៉េខាងជើង។ នៅមុនពេលបញ្ចូលក្រុមហ៊ុនទាំង៣ កាលពីថ្ងៃពុធម្សិលមិញនេះ នៅក្នុងបញ្ជីខ្មៅ មានក្រុមហ៊ុនកូរ៉េខាងជើងចំនួន ៨ និងឥស្សរជនកូរ៉េខាងជើងចំនួន ៥រូប រួចជាស្រេចហើយ។
មុនពេលសម្រេចបន្ថែមទណ្ឌកម្មនេះ ក្រុមប្រឹក្សាសន្តិសុខក៏បានចេញសេចក្តីថ្លែងការណ៍មួយរួចហើយដែរ កាលពីខែមុន ដើម្បីថ្កោលទោសកូរ៉េខាងជើង ដែលបានបាញ់សាកល្បងរ៉ុកកែត កាលពីថ្ងៃទី១៣មេសា។
កូរ៉េខាងជើងបានអះអាងថា រ៉ុកកែតដែលខ្លួនបាញ់សាកល្បងនេះ គឺជាការបាញ់បង្ហោះផ្កាយរណបស៊ីវិលតែប៉ុណ្ណោះ។ ក៏ប៉ុន្តែ ទោះបីវាជាការបាញ់បង្ហោះផ្កាយរណបក៏ដោយ តែតួរ៉ុកកែតដែលផ្ទុកផ្កាយរណបនេះ គឺត្រូវប្រើបច្ចេកវិទ្យាមីស៊ីលរយៈចម្ងាយឆ្ងាយ។ យោងតាមសេចក្តីសម្រេចអនុម័តកាលពីខែមិថុនា ឆ្នាំ២០០៩ ក្រុមប្រឹក្សាសន្តិសុខបានហាមកូរ៉េខាងជើងមិនឲ្យធ្វើការសាកល្បងអាវុធនុយក្លេអ៊ែរ ឬបាញ់សាកល្បងអ្វីក៏ដោយ ដែលប្រើបច្ចេកវិទ្យាមីស៊ីលរយៈចម្ងាយឆ្ងាយ។
ការណ៍ដែលក្រុមប្រឹក្សាសន្តិសុខអ.ស.ប.ចេញសេចក្តីថ្លែងការណ៍ថ្កោលទោស និងបានសម្រេចបន្ថែមទណ្ឌកម្មលើកូរ៉េខាងជើងបែបនេះ អាចនឹងជាមូលហេតុមួយទៀត ជំរុញឲ្យរដ្ឋាភិបាលក្រុងព្យុងយ៉ាងធ្វើការសាកល្បងអាវុធនុយក្លេអ៊ែរ ដូចដែលធ្លាប់ធ្វើកាលពីឆ្នាំ២០០៦ និងឆ្នាំ២០០៩។ ប្រសិនបើកូរ៉េខាងជើងពិតជាធ្វើការសាកល្បងអាវុធនុយក្លេអ៊ែរជាលើកទី៣នេះមែន ភាពតានតឹងនៅកូរ៉េប្រាកដជានឹងត្រូវកើនឡើងកាន់តែខ្លាំងថែមទៀត៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ