ក្រុមប្រឹក្សាសន្តិសុខអ.ស.បបើកកិច្ចប្រជុំបន្ទាន់លើបញ្ហាអេបូឡា
កាលពីម៉ោង៣រសៀល ថ្ងៃអង្គារទី ១៤ ខែតុលា (ម៉ោងនៅទីក្រុងញូវយ៉ក) ក្រុមប្រឹក្សាសន្តិសុខរបស់អង្គការសហប្រជាជាតិបានកោះប្រជុំបន្ទាន់មួយដើម្បីស្វែងរកដំណោះស្រាយឆ្លើយតបទៅនឹងការរាតត្បាតមេរោគអេបូឡា ដែលបានឆក់យកជីវិតមនុស្សប្រមាណ ៤ ពាន់នាក់ក្នុងរយៈពេល ៦ខែ នៅតំបន់ភាគពាយ័ព្យទ្វីបអាហ្វ្រិក ជាពិសេសនៅប្រទេសហ្គីណេ លីបេរីយ៉ា និងសៀរ៉ាឡេអូន។
ចុះផ្សាយនៅថ្ងៃ៖
ស្តាប់ - ០២:០៤
នៅចំពោះមុខតំណាងប្រទេសសមាជិកចំនួន ១៥ របស់ក្រុមប្រឹក្សាសន្តិសុខអង្គការសហប្រជាជាតិ លោក Anthony Banbury ប្រមុខបេសកកម្មបន្ទាន់របស់អង្គការសហប្រជាជាតិសំរាប់ប្រយុទ្ធប្រឆាំងមេរោគអេបូឡា (UNMEER) បានសំដែងការព្រួយបារម្ភយ៉ាងខ្លាំងក្រៃលែងចំពោះស្ថានភាពបច្ចុប្បន្ននេះ។ លោកបានធ្វើសេចក្តីរាយការណ៍ថា អត្រាស្លាប់អាចកើនឡើងដល់ ៧០% ចំពោះអ្នកជំងឺដែលឆ្លងមេរោគអេបូឡានៅប្រទេសហ្គីណេ លីបេរីយ៉ា និងសៀរ៉ាឡេអូន ដែលកំពុងទទួលរងការប៉ះពាល់ខ្លាំងជាងគេ។
ដោយនិយាយតាមរយៈប្រព័ន្ធប្រជុំវីដេអូពីប្រទេសហ្គាណា ដែលជាទីស្នាក់ការកណ្តាលរបស់បេសកកម្មពិសេសនេះ លោក Anthony Banbury ក៏បានបញ្ជាក់ផងដែរថា ចាប់ពីពេលនេះដល់ដើមខែធ្នូ ក្នុងមួយសប្តាហ៍ មនុស្សប្រមាណពី ៥ ពាន់ទៅ មួយ ម៉ឺននាក់អាចនឹងឆ្លងមេរោគអេបូឡា។ គេត្រូវការគ្រែចំនួន ៧ពាន់កន្លែងបន្ថែមទៀតដើម្បីត្រៀមទទួលអ្នកជំងឺថ្មី។ ប្រមុខបេសកកម្មរបស់អង្គការសហប្រជាជាតិរូបនេះក៏បានកត់សំគាល់ផងដែរថា៖ «ជារៀងរាល់ថ្ងៃ គេតែងទទួលបានដំណឹងអាក្រក់ស្តីពីមេរោគអេបូឡា។ ប៉ុន្តែ ដំណឹងល្អដែលយើងចង់បាននោះគឺ តើត្រូវធ្វើយ៉ាងណាអាចបញ្ឈប់មេរោគនេះបាន? យើងត្រូវយកឈ្នះមេរោគកំណាចនេះ ហើយយើងត្រូវធ្វើយ៉ាងណាអោយបានលឿនបំផុត។ ប្រសិនបើមេរោគអេបូឡាឈ្នះយើង ពិភពលោកបា្រកដជាបាត់បង់អាយុជីវិតមនុស្សយ៉ាងច្រើនសន្ធឹកសន្ធាប់»។
ឆ្លើយតបទៅនឹងសន្ទុះដ៏លឿនគួរអោយព្រួយបារម្ភនេះ ក្រុមប្រឹក្សាសន្តិសុខរបស់អង្គការសហប្រជាជាតិបានសំរេចដាក់គោលដៅបញ្ឈប់ការរីករាលដាលមេរោគអេបូឡា ដោយធានាថា ពីពេលនេះដល់ដើមខែធ្នូ ត្រូវធ្វើយ៉ាងណាធ្វើការកប់ ឬបូជាសាកសពអ្នកស្លាប់អោយបាន ៧០% និងដាក់អ្នកជំងឺដែលឆ្លងអោយនៅដាច់ដោយឡែកពីគេអោយបាន ៧០% ផងដែរ ដើម្បីចៀសវាងកុំអោយអ្នកជំងឺទាំងនោះមានទំនាក់ទំនងជាមួយមនុស្សទូទៅ។
សូមបញ្ជាក់ផងដែរថា គិតមកដល់ពេលនេះ មេរោគអេបូឡាបានបណ្តាលអោយមនុស្សចំនួនជាង ៤ពាន់នាក់ស្លាប់បាត់បង់ជីវិតក្នុងចំណោមអ្នកជំងឺជាង ៨ ពាន់នាក់។ មុនកិច្ចប្រជុំបន្ទាន់របស់ក្រុមប្រឹក្សាសន្តិសុខអង្គការសហប្រជាជាតិ លោកប្រធានាធិបតី បារ៉ាក់ អូបាម៉ា បានប្រកាសថា ពិភពលោកពុំទាន់ធ្វើអ្វីអោយបានគ្រប់គ្រាន់នៅឡើយទេក្នុងការប្រយុទ្ធប្រឆាំងមេរោគរាតត្បាតអេបូឡា។ លោកបានបញ្ជាក់បន្ថែមថា លោកនឹងនៅតែនិយាយដដែលៗរហូតដល់ស្ថានភាពបានល្អប្រសើរ ហើយលោកសុំអោយប្រទេសដែលមានសមត្ថភាពឆ្លើយតបគ្រប់គ្រាន់ធ្វើយ៉ាងណាជួយចូលរួមប្រយុទ្ធប្រឆាំងទាំងអស់គ្នា៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ